ಬಾಲಿವುಡ್ ಚಿತ್ರರಂಗದಲ್ಲಿ ಹಿರಿಯ ನಟಿ ಪರ್ವೀನ್ ಬಾಬಿ ತಮ್ಮದೇ ಆದ ಮೈಲುಗಲ್ಲು ಸಾಧಿಸಿದವರು. 1973ರಲ್ಲಿ ‘ಚರಿತಾ’ ಮೂಲಕ ಹಿಂದಿ ಚಿತ್ರರಂಗಕ್ಕೆ ಎಂಟ್ರಿಯಾಗಿದ್ದ ಪರ್ವೀನ್ ಬಳಿಕ ‘ಮಜ್ಬೂರ್’, ‘ದೀವಾರ್’, ‘ಅಮರ್ ಅಕ್ಬರ್ ಆಂಥೋನಿ’ ಸೇರಿ ಹಲವು ಹಿಟ್ ಸಿನಿಮಾ ನೀಡಿದ್ದರು. 1970ರಿಂದ 80ರಲ್ಲಿ ಅತಿಹೆಚ್ಚು ಸಂಭಾವನೆ ಪಡೆಯುತ್ತಿದ್ದ ನಟಿ ಹಾಗೂ ‘ಗ್ಲಾಮರಸ್ ನಟಿ’ ಎಂಬ ಖ್ಯಾತಿ ಇವರಿಗಿತ್ತು. 1991ರಲ್ಲಿ ತೆರೆಕಂಡಿದ್ದ ‘ಇರಾದಾ’ ಸಿನಿಮಾದಲ್ಲಿ ನಟಿಸಿದ್ದ ಪರ್ವೀನ್ ಬಳಿಕ ಚಿತ್ರರಂಗದಿಂದ ದೂರ ಉಳಿದಿದ್ದರು. 2005ರಲ್ಲಿ ಅನಾರೋಗ್ಯದಿಂದಾಗಿ ಮೃತರಾಗಿದ್ದರು. ಪರ್ವೀನ್ ಬಾಬಿ ಜೀವನ ಸಾಧನೆ, ಚಿತ್ರರಂಗದ ಪಯಣ ಹಾಗೂ ವೈಯಕ್ತಿಕ ಜೀವನ ಕುರಿತು ಲೇಖಕಿ ಕರೀಷ್ಮಾ ಉಪಾಧ್ಯಾಯ ಪುಸ್ತಕ ರಚಿಸಿದ್ದರು. ಇದೀಗ ಇದೇ ಪುಸ್ತಕ ಆಧಾರಿಸಿ ಪರ್ವೀನ್ ಬಾಬಿ ಜೀವನಾಧಾರಿತ ಸಿನಿಮಾ ಸೆಟ್ಟೇರಲು ಸಿದ್ಧವಾಗಿದೆ. ಈ ಚಿತ್ರದ ನಾಯಕಿಯಾಗಿ ಮೊದಲಿಗೆ ನಟಿ ಊರ್ವಶಿ ರೌಟೇಲಾ ಕಾಣಿಸಿಕೊಳ್ಳಲಿದ್ದಾರೆ ಎನ್ನಲಾಗಿತ್ತು. ಆದರೆ, ಬದಲಾವಣೆಯಾಗಿದ್ದು, ಪರ್ವೀನ್ ಪಾತ್ರದಲ್ಲಿ ‘ಅನಿಮಲ್’, ‘ಬ್ಯಾಡ್ ನ್ಯೂಸ್’ ಖ್ಯಾತಿಯ ತೃಪ್ತಿ ದಿಮ್ರಿ ನಟಿಸಲಿದ್ದಾರೆ ಎನ್ನಲಾಗಿದೆ. ಈ ಸಿನಿಮಾ ನಿರ್ದೇಶಕರು, ನಿರ್ಮಾಪಕರ, ಕಲಾ ಬಳಗದ ಬಗ್ಗೆ ಮಾಹಿತಿ ಸಿಗಬೇಕಷ್ಟೇ. ತೃಪ್ತಿ ದಿಮ್ರಿ ಸದ್ಯ ‘ಭೂಲ್ ಭೂಲಯ್ಯ-3’, ‘ಧಡಕ್-2’ ಚಿತ್ರದಲ್ಲಿ ಬಿಜಿಯಿದ್ದಾರೆ. - ಏಜೆನ್ಸೀಸ್
