ಅಭಿಮಾನಿಗಳು ಅತಿಯಾಗಿ ವರ್ತಿಸಿದರೂ ನಿಧಿ, ಸಮಂತಾ ತೋರಿದ ವರ್ತನೆಗೆ ನೆಟ್ಟಿಗರ ಬಹುಪರಾಕ್​! Samantha, Nidhi Agarwal

Samantha, Nidhi Agarwal ​: ಕೆಲವು ದಿನಗಳ ಹಿಂದೆ ನಟಿ ನಿಧಿ ಅಗರ್ವಾಲ್ ( Nidhi Agarwal ) ಹಾಗೂ ನಟಿ ಸಮಂತಾ ಅವರಿಗೆ ಒಂದೇ ರೀತಿಯ ಕಹಿ ಅನುಭವವಾಯಿತು. ಅದೇನೆಂದರೆ, ಅಭಿಮಾನಿಗಳು ಪ್ರತ್ಯೇಕ ಕಾರ್ಯಕ್ರಮದಲ್ಲಿ ಇಬ್ಬರು ನಟಿಯರನ್ನು ಸುತ್ತವರೆದು ಅತಿಯಾಗಿ ವರ್ತಿಸಿದರು. ಅಭಿಮಾನಿಗಳು ನಡೆಸಿದ ನೂಕು ನುಗ್ಗಾಟದಲ್ಲಿ ನಟಿಯರು ಬಚಾವ್​ ಆಗಿದ್ದೇ ಹೆಚ್ಚು. ನಟಿಯರನ್ನು ಮುಟ್ಟಲು ಪ್ರಯತ್ನಿಸಿದರು. ಇದರಿಂದ ಸ್ಥಳದಲ್ಲಿ ಬಿಗುವಿನ ವಾತಾವರಣ ಉಂಟಾಯಿತು. ಇದರಿಂದ ನಟಿಯರು ಕೂಡ ಮುಜಗಕ್ಕೀಡಾದರು. ಆದರೆ, ಈ ಸನ್ನಿವೇಶವನ್ನು ಇಬ್ಬರು ನಟಿಯರು ನಿಭಾಯಿಸಿದ ರೀತಿ ಮೆಚ್ಚುಗೆಗೆ ಪಾತ್ರವಾಗಿದೆ.

ಅಭಿಮಾನಿಗಳು ಸುತ್ತುವರಿದು ಭಾರಿ ಕಿರಿಕಿರಿ ಉಂಟು ಮಾಡಿದರು ಕೂಡ ನಟಿಯರು ಎಲ್ಲಿಯೂ ತಮ್ಮ ತಾಳ್ಮೆಯನ್ನು ಕಳೆದುಕೊಳ್ಳಲಿಲ್ಲ. ಅಷ್ಟೇ ಏಕೆ ಯಾರ ಮೇಲೂ ಕೂಗಾಡಲಿಲ್ಲ. ಈ ಘಟನೆಯ ಲಾಭ ಪಡೆಯುವ ಕೆಲಸಕ್ಕೂ ಕೈಹಾಕಲಿಲ್ಲ. ಕೆಲ ನಟಿಯರು ಇಂತಹ ಘಟನೆ ನಡೆದಾಗ ಅದನ್ನು ದೊಡ್ಡದು ಮಾಡಿ ಪ್ರಚಾರ ಪಡೆದುಕೊಳ್ಳಲು ಬಯಸುತ್ತಾರೆ. ಆದರೆ, ಸಮಂತಾ ಮತ್ತು ನಿಧಿ ಅಭಿಮಾನಿಗಳೆಡೆಗೆ ಬಹಳ ತಾಳ್ಮೆಯಿಂದ ನಡೆದುಕೊಂಡರು. ಯಾರನ್ನೂ ದೂಷಿಷಲು ಹೋಗಲಿಲ್ಲ. ಆದರೆ, ಕೆಲವರು ನಿಧಿಯನ್ನೇ ಟೀಕಿಸುತ್ತಿದ್ದಾರೆ.

ಹೌದು, ಶಿವಾಜಿ ಎಂಬ ತೆಲುಗು ನಟ ನಿಧಿಯ ವಿರುದ್ಧವೇ ಮಾತನಾಡಿದ್ದಾರೆ. ನಟಿಯರು ಹೊರಗಡೆ ಹೋಗುವಾಗ ಸಾಧಾರಣ ಉಡುಗೆ ತೊಡಬೇಕು. ಬದಲಾಗಿ ಈ ರೀತಿಯ ಬಟ್ಟೆ ಧರಿಸಿದರೆ ಹಿಂಗೇ ಆಗೋದು ಎಂದು ಮಾತನಾಡಿದ್ದಾರೆ. ಶಿವಾಜಿ ಅವರ ಈ ಹೇಳಿಕೆ ವಿವಾದದ ಸ್ವರೂಪ ಪಡೆದುಕೊಂಡಿತು. ಇದನ್ನು ಮನಗಂಡ ಶಿವಾಜಿ, ಕ್ಷಮೆಯಾಚಿಸಿದ್ದಾರೆ. 

ಇಲ್ಲಿ ಸಂತ್ರಸ್ತೆಯನ್ನೇ ದೂಷಿಸುತ್ತಿರುವುದು ನಿಧಿಯ ಗಮನಕ್ಕೆ ಬಂದಿದೆ. ಈ ಹಿನ್ನೆಲೆಯಲ್ಲಿ ಅವರು ತಮ್ಮ ಇನ್​ಸ್ಟಾಗ್ರಾಂನಲ್ಲಿ ಸ್ಟೋರಿ ಹಂಚಿಕೊಳ್ಳುವ ಮೂಲಕ ಟೀಕಾಕಾರರಿಗೆ ತಿರುಗೇಟು ನೀಡಿದ್ದಾರೆ. "ಸಂತ್ರಸ್ತೆಯನ್ನು ದೂಷಣೆ ಮಾಡುವ ನಡೆಯನ್ನು ಕುಟಿಲತೆ" ಎಂದು ಕರೆಯುತ್ತಾರೆ ಅಂತಾ ನಿಧಿ ಬರೆದುಕೊಂಡಿದ್ದಾರೆ. ಈ ಮೂಲಕ ತಮ್ಮ ಆಕ್ರೋಶವನ್ನು ವ್ಯಕ್ತಪಡಿಸಿದ್ದಾರೆ. 

ರೆಬೆಲ್ ಸ್ಟಾರ್ ಪ್ರಭಾಸ್ ನಾಯಕನಾಗಿ ನಟಿಸಿರುವ ದಿ ರಾಜಾ ಸಾಬ್​ ಸಿನಿಮಾ ಬಿಡಗಡೆಗೆ ಸಜ್ಜಾಗಿದೆ. ಮಾರುತಿ ನಿರ್ದೇಶನದ ಹಾರರ್​, ಹಾಸ್ಯ ಮತ್ತು ಪ್ರೇಮ ಕಥಾಹಂದರವುಳ್ಳ ಈ ಸಿನಿಮಾದಲ್ಲಿ ಪ್ರಭಾಸ್​ ಜತೆ ನಟಿ ನಿಧಿ ಅಗರ್ವಾಲ್​, ಮಾಳವಿಕಾ ಮೋಹನನ್ ಮತ್ತು ರಿಧಿ ನಾಯಕಿಯರಾಗಿ ನಟಿಸಿದ್ದಾರೆ. ಬಾಲಿವುಡ್ ನಟ ಸಂಜಯ್ ದತ್ ಈ ಚಿತ್ರದಲ್ಲಿ ಖಳನಾಯಕನಾಗಿ ನಟಿಸಿದ್ದಾರೆ. ತಮನ್ ಸಂಗೀತ ನೀಡಿರುವ ಈ ಚಿತ್ರವನ್ನು ಪೀಪಲ್ಸ್ ಮೀಡಿಯಾ ಫ್ಯಾಕ್ಟರಿ ಬ್ಯಾನರ್ ಅಡಿಯಲ್ಲಿ ವಿಶ್ವ ಪ್ರಸಾದ್ ನಿರ್ಮಾಣ ಮಾಡಿದ್ದಾರೆ. ಈ ಚಿತ್ರದ ಎರಡನೇ ಹಾಡು ಬಿಡುಗಡೆ ಕಾರ್ಯಕ್ರಮ ಇತ್ತೀಚೆಗೆ ಹೈದರಾಬಾದ್‌ನ ಲುಲು ಮಾಲ್‌ನಲ್ಲಿ ನಡೆಯಿತು. ನಿರ್ಮಾಪಕ ವಿಶ್ವ ಪ್ರಸಾದ್, ನಿರ್ದೇಶಕ ಮಾರುತಿ, ಸಂಗೀತ ನಿರ್ದೇಶಕ ತಮನ್ ಮತ್ತು ನಾಯಕಿಯರಾದ ನಿಧಿ ಅಗರ್ವಾಲ್ ಹಾಗೂ ರಿದ್ಧಿ ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದರು. ಅಭಿಮಾನಿಗಳ ಭಾರಿ ಗದ್ದಲದ ನಡುವೆ ಎರಡನೇ ಹಾಡನ್ನು ಬಿಡುಗಡೆ ಮಾಡಲಾಯಿತು. ಆದಾಗ್ಯೂ, ಈ ಕಾರ್ಯಕ್ರಮ ಜನರಿಂದ ಭಾರಿ ಟೀಕೆಗೆ ಗುರಿಯಾಯಿತು. ಇದು ಸಾರ್ವಜನಿಕ ಕಾರ್ಯಕ್ರಮವಾಗಿದ್ದರಿಂದ ಅಭಿಮಾನಿಗಳು ಘರ್ಷಣೆ ನಡೆಸಿ ಜಗಳವಾಡಿ, ಗದ್ದಲ ಎಬ್ಬಸಿದರು. ಇದರ ಪರಿಣಾಮವಾಗಿ, ಈ ಕಾರ್ಯಕ್ರಮವನ್ನು ನಿರೀಕ್ಷೆಗಿಂತ ಸ್ವಲ್ಪ ಮುಂಚಿತವಾಗಿಯೇ ಮುಗಿಸಲಾಯಿತು. ಇನ್ನು ಈ ಕಾರ್ಯಕ್ರಮದಿಂದ ಹಿಂತಿರುಗುವ ಸಂದರ್ಭದಲ್ಲಿ ಅಭಿಮಾನಿಗಳು ನಾಯಕಿ ನಿಧಿ ಅಗರ್ವಾಲ್ ಅವರೊಂದಿಗೆ ಅನುಚಿತವಾಗಿ ವರ್ತಿಸಿದರು. ನಿಧಿಯ ಸುತ್ತ ಸುತ್ತಿಕೊಂಡ ಅಭಿಮಾನಿಗಳು ನೂಕು ನುಗ್ಗಾಟ ನಡೆಸಿದರು. ಈ ವೇಳೆ ನಿಧಿ ಅವರನ್ನು ಮುಟ್ಟಲು ಅಭಿಮಾನಿಗಳು ಪ್ರಯತ್ನಿಸಿದರು. ಸ್ಥಳದಲ್ಲಿ ಭಾರಿ ಬಿಗುವಿನ ವಾತಾವರಣ ಉಂಟಾಯಿತು. ಈ ವೇಳೆ ನಿಧಿ ಅವರನ್ನು ರಕ್ಷಣೆ ಮಾಡಲು ಬೌನ್ಸರ್​ಗಳು ಪ್ರಯತ್ನಿಸಿದರು. ಆದರೂ, ಭಾರಿ ನೂಕು ನುಗ್ಗಲಿನ ನಡುವೆ ಭಾರಿ ಮುಜುಗರಕ್ಕೆ ಒಳಗಾಗ ನಿಧಿ ಅಂತಿಮವಾಗಿ ಹೇಗೋ ಕಾರು ಏರುವಲ್ಲಿ ಯಶಸ್ವಿಯಾದರು. ನೂಕು ನುಗ್ಗಾಟದ ಸಮಯದಲ್ಲಿ ಕೆಲವರು ದುರುದ್ದೇಶದಿಂದ ನಿಧಿ ಅಗರ್ವಾಲ್ ಅನ್ನು ಮುಟ್ಟಲು ಪ್ರಯತ್ನಿಸಿದರು. ಇದಕ್ಕೆ ಸಂಬಂಧಿಸಿದ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್​ ಆಗಿದ್ದು, ತೀವ್ರ ಟೀಕೆಗೆ ಗುರಿಯಾಗಿದೆ. 

ಈ ಘಟನೆ ಸಂಬಂಧಿಸಿದ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ಸಿಕ್ಕಾಪಟ್ಟೆ ವೈರಲ್​ ಆಗಿ ಹಲವರ ಆಕ್ರೋಶಕ್ಕೆ ಕಾರಣವಾಯಿತು. ಅದರಲ್ಲೂ, ಗಾಯಕಿ ಚಿನ್ಮಯಿ ಶ್ರೀಪಾದ ಅವರು ನೇರವಾಗಿ ಪುರಷರನ್ನೇ ಟಾರ್ಗೆಟ್​ ಮಾಡಿ, ಪೋಸ್ಟ್​ ಮಾಡಿರುವ ಟ್ವೀಟ್​ ಜಾಲತಾಣದಲ್ಲಿ ಸಂಚಲನ ಮೂಡಿಸಿತು. ಗುಲ್ಟು ಮಾಧ್ಯಮದ ಎಕ್ಸ್​ ಖಾತೆಯಲ್ಲಿ ಪೋಸ್ಟ್​ ಮಾಡಿರುವ ವಿಡಿಯೋವನ್ನು ಹಂಚಿಕೊಂಡಿದ್ದ ಚಿನ್ಮಯಿ, ನಟಿ ನಿಧಿಯನ್ನು ಸುತ್ತುವರಿದ ಗಂಡಸರು ಕತ್ತೆಕಿರುಬಗಳಿಗಿಂತಲೂ ಅತ್ಯಂತ ಕೆಟ್ಟವರು ಎಂದಿದ್ದರು. ಅಲ್ಲದೆ, ಈ ರೀತಿ ಹೇಳಿ ನಿಜವಾಗಲೂ ಕತ್ತೆಕಿರುಬಗಳನ್ನು ಏಕೆ ಅವಮಾನಿಸಬೇಕು? ಕಿತ್ತೆ ಕಿರುಬಗಳೇ ಎಷ್ಟೋ ವಾಸಿ ಎಂದಿದ್ದರು. ಇಂತಹ ಸಮಾನ ಮನಸ್ಸಿನ ಪುರುಷರನ್ನು ಗುಂಪಾಗಿ ಸೇರಿಸಿದರೆ ಅವರೆಲ್ಲರು ಮಹಿಳೆಗೆ ಇದೇ ರೀತಿ ಕಿರುಕುಳ ನೀಡುತ್ತಾರೆ. ಈ ದೇವರು ಅವರೆಲ್ಲರನ್ನೂ ಏಕೆ ಕರೆದುಕೊಂಡು ಹೋಗಿ ಬೇರೆ ಗ್ರಹದಲ್ಲಿ ಇಡುವುದಿಲ್ಲ ಎಂದು ಚಿನ್ಮಯಿ ತಮ್ಮ ಆಕ್ರೋಶವನ್ನು ಹೊರಹಾಕಿದ್ದರು.

ಸಮಂತಾ ರುತ್ ಪ್ರಭು ಅವರನ್ನು ಇತ್ತೀಚೆಗೆ ಹೈದರಾಬಾದ್‌ನಲ್ಲಿ ನಡೆದ ಒಂದು ಈವೆಂಟ್‌ನಲ್ಲಿ ಅಭಿಮಾನಿಗಳು ದೊಡ್ಡ ಸಂಖ್ಯೆಯಲ್ಲಿ ಆವರಿಸಿಕೊಂಡರು. ಸೆಲ್ಫಿ ಮತ್ತು ಫೋಟೋಗಳಿಗಾಗಿ ಜನರು ಮುಗಿಬಿದ್ದಿದ್ದರಿಂದ ಸೆಕ್ಯೂರಿಟಿ ಸಿಬ್ಬಂದಿ ಸಹಾಯದೊಂದಿಗೆ ಕಾರ್ಯಕ್ರಮದಿಂದ ಹೊರಬರುವುದು ಸಮಂತಾಗೆ ಕಷ್ಟವಾಯಿತು. ಈ ವಿಡಿಯೋ ವೈರಲ್ ಆಗಿದ್ದು, ಅಭಿಮಾನಿಗಳು ನಟಿಯರ ವೈಯಕ್ತಿಕ ವಿಚಾರವನ್ನು ಗೌರವಿಸಬೇಕು ಎಂಬ ಟೀಕೆಗಳು ವ್ಯಕ್ತವಾಗಿವೆ

ಅಂದಹಾಗೆ, ಸಮಂತಾ ಮತ್ತು ನಿಧಿ ಇಬ್ಬರೂ ಅಭಿಮಾನಿಗಳ ಉತ್ಸಾಹವನ್ನು ಗಂಭೀರವಾಗಿ ಪರಿಗಣಿಸದೆ, ತಮ್ಮ ವಿಶಾಲ ಹೃದಯದಿಂದ ವಿವಾದ ಮಾಡದೇ ಬಿಟ್ಟರು. ಸಮಂತಾ ತನಗೆ ಯಾವುದೇ ಭಯವಿಲ್ಲ ಎಂದು ಹೇಳಿದರೆ, ನಿಧಿ ಕೂಡ ತಾನು ದೂರು ನೀಡಿಲ್ಲ ಎಂದು ಹೇಳುವ ಮೂಲಕ ತಾಳ್ಮೆ ತೋರಿಸಿದರು. ಸ್ಟಾರ್ ನಾಯಕಿಯರು ಇಷ್ಟೊಂದು ತಾಳ್ಮೆಯಿಂದಿರುವಾಗ, ಅಭಿಮಾನಿಗಳು ಅವರ ವೈಯಕ್ತಿಕ ಜಾಗವನ್ನು ಸಹ ಗೌರವಿಸಬೇಕು ಎಂದು ನೆಟಿಜನ್‌ಗಳು ಅಭಿಪ್ರಾಯಪಟ್ಟಿದ್ದಾರೆ, (ಏಜೆನ್ಸೀಸ್​).