ಸಮಂತಾ-ರಾಜ್​ ಎರಡನೇ ಮದುವೆ: ಏನಿದು 'ಭೂತ ಶುದ್ಧಿ ವಿವಾಹ' ಸಂಪ್ರದಾಯ? ಏನಿದರ ವಿಶೇಷತೆ? | Actress Samantha

ತಮಿಳುನಾಡು: ಎರಡು ವರ್ಷಗಳ ಕಾಲ ಪ್ರೀತಿಸಿ, ನಾಲ್ಕು ವರ್ಷಗಳ ಕಾಲ ದಾಂಪತ್ಯ ಜೀವನ ನಡೆಸಿ, ಅಂತಿಮವಾಗಿ ನಾಗಚೈತನ್ಯಗೆ ವಿಚ್ಛೇದನ ನೀಡುವ ಮೂಲಕ ಆ ದಾಂಪತ್ಯ ಸಂಬಂಧಕ್ಕೆ ತೆರೆ ಎಳೆದ ಟಾಲಿವುಡ್​ ನಟಿ ಸಮಂತಾ ರುತು ಪ್ರಭು, ಇದೀಗ 'ದಿ ಫ್ಯಾಮಿಲಿ ಮ್ಯಾನ್'​ ವೆಬ್​ ಸರಣಿಯ ನಿರ್ಮಾಪಕ ರಾಜ್​ ನಿಡಿಮೋರು ಅವರೊಂದಿಗೆ ಎರಡನೇ ಮದುವೆಯಾಗುವ ಮೂಲಕ ಹಲವರ ಅಚ್ಚರಿ, ಸಂತಸಕ್ಕೆ ಕಾರಣವಾಗಿದ್ದಾರೆ.

ಇಂದು (ಡಿ.01) ಕೊಯಮತ್ತೂರಿನ ಇಶಾ ಯೋಗ ಕೇಂದ್ರದಲ್ಲಿ ವಿವಾಹವಾದ ಈ ಜೋಡಿ, ಬಹಳ ಸರಳವಾಗಿ ದಾಂಪತ್ಯ ಜೀವನಕ್ಕೆ ಕಾಲಿಟ್ಟಿದ್ದಾರೆ. ವರದಿಗಳ ಪ್ರಕಾರ, ಸಮಂತಾ-ರಾಜ್​ ಇಬ್ಬರಿಗೂ ಇದು ಎರಡನೇ ಮದುವೆ. ವಿಶೇಷವಾಗಿ ಈ ಶುಭಕಾರ್ಯ 'ಭೂತ ಶುದ್ಧಿ ವಿವಾಹ' ರೀತಿಯಲ್ಲಿ ನಡೆಯಿತು. ಈ ವಿಷಯ ಅನೇಕರಿಗೆ ಹೊಸತು ಎನ್ನಿಸಿದ್ದಂತು ಖಂಡಿತ. ಭೂತ ಶುದ್ಧಿ ಮದುವೆ ಎಂಬ ಪದ ಹೊರಬಂದಾಗಿನಿಂದ, ಅನೇಕರು ಇದರ ಬಗ್ಗೆ ತಿಳಿಯಲು ತೀವ್ರ ಕೌತುಕ ವ್ಯಕ್ತಪಡಿಸಿದ್ದಾರೆ.

ಈ ವಿವಾಹ ಸಮಾರಂಭವನ್ನು ಲಿಂಗ ಭೈರವಿ ದೇವಾಲಯಗಳಲ್ಲಿ ಮತ್ತು ಕೆಲವು ಆಯ್ದ ಸ್ಥಳಗಳಲ್ಲಿ ಮಾತ್ರ ನಡೆಸಲಾಗುತ್ತದೆ. ಈ ಪ್ರಕ್ರಿಯೆಯು ದಂಪತಿ ದೇಹದಲ್ಲಿರುವ ಐದು ಅಂಶಗಳನ್ನು ಶುದ್ಧೀಕರಿಸುತ್ತದೆ. ಇದು ದಾಂಪತ್ಯ ಪ್ರಯಾಣಕ್ಕೆ ಸಾಮರಸ್ಯ, ಸಮೃದ್ಧಿ ಮತ್ತು ಆಧ್ಯಾತ್ಮಿಕತೆಯನ್ನು ತರುತ್ತದೆ. ತಮ್ಮ ಮೊದಲ ದಾಂಪತ್ಯ ಜೀವನದಲ್ಲಿ ಒಂದಷ್ಟು ತೊಡಕುಗಳನ್ನು ಎದುರಿಸಿದ ಬಳಿಕ ಸಮಂತಾ-ರಾಜ್ ಜೋಡಿ ತಮ್ಮ ಈ ಬಂಧವನ್ನು ಬಲವಾಗಿಡಲು 'ಭೂತ ಶುದ್ಧಿ ವಿವಾಹ'ಕ್ಕೆ ಮುಂದಾದರು ಎಂಬುದು ಇಲ್ಲಿ ಸ್ಪಷ್ಟ ಎನ್ನಬಹುದು,(ಏಜೆನ್ಸೀಸ್).