ರಾಜಮೌಳಿಯ ವಾರಣಾಸಿ ಚಿತ್ರಕ್ಕೆ ಮುಗಿಬಿದ್ದ ವಿತರಕರು... ಆದ್ರೆ ಜಕ್ಕಣ್ಣನ ಮೆಗಾ ಪ್ಲಾನ್​ ಏನು ಗೊತ್ತಾ? Rajamouli

Rajamouli : ಜಕ್ಕಣ್ಣ ಎಂದೇ ಖ್ಯಾತರಾಗಿರುವ ಭಾರತೀಯ ಸಿನಿಮಾ ರಂಗದ ಸ್ಟಾರ್​ ನಿರ್ದೇಶಕ ರಾಜಮೌಳಿ ಅವರು ಬಾಹುಬಲಿ ಮತ್ತು ಆರ್‌ಆರ್‌ಆರ್ ಚಿತ್ರಗಳ ಮೂಲಕ ಪ್ಯಾನ್ ಇಂಡಿಯಾವನ್ನೂ ಮೀರಿ ಪ್ಯಾನ್ ವರ್ಲ್ಡ್ ಮಟ್ಟಕ್ಕೆ ಗುರುತಿಸಿಕೊಂಡಿದ್ದಾರೆ. ಪ್ರಸ್ತುತ, ಜಕ್ಕಣ್ಣ ಅವರ ಬತ್ತಳಿಕೆಯಿಂದ ಬಹುನಿರೀಕ್ಷಿತ ವಾರಣಾಸಿ ಸಿನಿಮಾ ತಯಾರಾಗುತ್ತಿದೆ. 

ವಾರಣಾಸಿ ಸಿನಿಮಾದಲ್ಲಿ ಟಾಲಿವುಡ್​ ಸೂಪರ್‌ಸ್ಟಾರ್ ಮಹೇಶ್ ಬಾಬು ನಾಯಕನಾಗಿ ನಟಿಸಿದ್ದು, ಬಾಲಿವುಡ್ ಬ್ಯೂಟಿ ಪ್ರಿಯಾಂಕಾ ಚೋಪ್ರಾ ನಾಯಕಿಯಾಗಿ ಬಣ್ಣ ಹಚ್ಚಿದ್ದಾರೆ. ಮಲಯಾಳಂ ನಾಯಕ ಪೃಥ್ವಿ ರಾಜ್ ಸುಕುಮಾರನ್ ವಿಲನ್​ ಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. 

ಪ್ರಸ್ತುತ, ಈ ಸಿನಿಮಾದ ಶೂಟಿಂಗ್​ ಮಿಂಚಿನ ವೇಗದಲ್ಲಿ ನಡೆಯುತ್ತಿದೆ. ಮುಂದಿನ ವರ್ಷ ಅಂದರೆ, 2027, ಏಪ್ರಿಲ್ 7ರಂದು ಈ ಸಿನಿಮಾ ಬಿಡುಗಡೆಯಾಗಲಿದೆ. ಇತ್ತೀಚೆಗೆ ಈ ಸಿನಿಮಾ ಕುರಿತಾದ ಒಂದು ಸುದ್ದಿ ಸಾಮಾಜಿಕ ಜಾಲತಾಣದಲ್ಲಿ ಸಿಕ್ಕಾಪಟ್ಟೆ ವೈರಲ್​ ಆಗುತ್ತಿದೆ. ಆ ಸುದ್ದಿ ಏನೆಂದು ನಾವೀಗ ತಿಳಿದುಕೊಳ್ಳೋಣ.

ಈ ಚಿತ್ರದ ಚಿತ್ರೀಕರಣವು ಕೋಕಾಪೇಟ್ ಮತ್ತು ಹೈದರಾಬಾದ್‌ನ ಅಲ್ಯೂಮಿನಿಯಂ ಫ್ಯಾಕ್ಟರಿ ಸುತ್ತಮುತ್ತ ನಡೆಯುತ್ತಿದೆ. ಸದ್ಯ ಶೆಡ್ಯೂಲ್​ನಲ್ಲಿ ಮಹೇಶ್ ಬಾಬು-ಪ್ರಿಯಾಂಕಾ ಚೋಪ್ರಾ ಅವರ ಕೆಲವು ಪ್ರಮುಖ ದೃಶ್ಯಗಳನ್ನು ಚಿತ್ರೀಕರಿಸಲಾಗುತ್ತಿದೆ. ಈ ಶೆಡ್ಯೂಲ್​ ಮುಗಿದ ತಕ್ಷಣ, ಚಿತ್ರತಂಡ ಜಾರ್ಜಿಯಾಕ್ಕೆ ಹೋಗಲು ಸಿದ್ಧವಾಗಲಿದೆ ಎಂದು ವರದಿಯಾಗಿದೆ. 

ನಾವೀಗ ತಾಜಾ ಸಂಗತಿಯ ಕಡೆಗೆ ಬರೋಣ. ಅದೇನೆಂದರೆ, ಈ ಚಿತ್ರದ ವಿತರಣಾ ಹಕ್ಕುಗಳಿಗಾಗಿ ವಿತರಕರು ಸರತಿ ಸಾಲಿನಲ್ಲಿ ನಿಲ್ಲುತ್ತಿದ್ದಾರೆ ಎಂದು ಟಾಲಿವುಡ್​ ಸಿನಿಗಲ್ಲಿಗಳಲ್ಲಿ ಸಿಕ್ಕಾಪಟ್ಟೆ ಪ್ರಚಾರ ಆಗುತ್ತಿದೆ. ಕೇವಲ ಆಂಧ್ರಪ್ರದೇಶ ಮತ್ತು ಪೂರ್ವ ಗೋದಾವರಿ ಪ್ರದೇಶಕ್ಕೇನೆ 18 ಕೋಟಿ ರೂ.ಗಳ ಆಫರ್ ನೀಡಲಾಗುತ್ತಿದೆ ಎಂದು ಸಿನಿ ವ್ಯಾಪಾರ ಮೂಲಗಳು ಚರ್ಚಿಸುತ್ತಿವೆ. 

ವಾಸ್ತವವಾಗಿ, ಇಷ್ಟೊಂದು ದೊಡ್ಡ ಮಟ್ಟದ ಆಫರ್‌ಗಳು ಬಂದರು ಕೂಡ ರಾಜಮೌಳಿ ಸಿನಿಮಾ ತಂಡವು ತಕ್ಷಣ ವ್ಯವಹಾರವನ್ನು ಪ್ರಾರಂಭಿಸಲು ಯಾವುದೇ ಆಸಕ್ತಿ ಹೊಂದಿಲ್ಲ. ಏಕೆಂದರೆ, ಬಾಹುಬಲಿ ಮತ್ತು ಆರ್‌ಆರ್‌ಆರ್‌ನಂತೆಯೇ ವಾರಣಾಸಿ ಚಿತ್ರಕ್ಕೂ ರಾಜಮೌಳಿ ಅವರು ಒಂದು ತಂತ್ರವನ್ನು ಹೊಂದಿರುತ್ತಾರೆಂದು ಟ್ರೇಡ್​ ಮೂಲಗಳು ವಿಶ್ಲೇಷಿಸುತ್ತಿವೆ. ಅದಕ್ಕಾಗಿಯೇ, ವಾರಣಾಸಿ ಚಿತ್ರದ ಶೂಟಿಂಗ್​ ಮುಗಿದ ಬಳಿಕ ಪೂರ್ಣ ಪ್ರಮಾಣದ ಮಾರುಕಟ್ಟೆ ತಂತ್ರದೊಂದಿಗೆ ವಿತರಣೆ ಮಾಡಲು ರಾಜಮೌಳಿ ತಂಡ ಯೋಜಿಸಿದೆ ಎಂಬ ಸುದ್ದಿ ಟಾಲಿವುಡ್​ ಸಿನಿ ಗಲ್ಲಿಯಲ್ಲಿ ಹರಿದಾಡುತ್ತಿದೆ, (ಏಜೆನ್ಸೀಸ್​).