ಎಲ್ಲ ಚಿತ್ರರಂಗಗಳಲ್ಲೂ ನಟರು, ಆಯಾ ಭಾಷೆ ಅಥವಾ ರಾಜ್ಯಕ್ಕೆ ಸೀಮಿತವಾಗದೇ ಪ್ಯಾನ್ ಇಂಡಿಯಾ, ಪ್ಯಾನ್ ವರ್ಲ್ಡ್ ಸವಾರಿ ಹೊರಟಿದ್ದಾರೆ. "ಹ್ಯಾಪಿ ಡೇಸ್' ಖ್ಯಾತಿಯ ತೆಲುಗು ನಟ ನಿಖಿಲ್ ಸಿದ್ಧಾರ್ಥ್ ಕೂಡ "ಕಾರ್ತಿಕೇಯ 2' (2022) ಮತ್ತು "18 ಪೇಜಸ್' ಯಶಸ್ಸಿನ ಬಳಿಕ ಪ್ಯಾನ್ ಇಂಡಿಯಾ ಹೊರಟಿದ್ದಾರೆ. 2022ರಲ್ಲಿ ಒಂದೇ ವರ್ಷ ಬ್ಯಾಕ್ ಟು ಬ್ಯಾಕ್ ಎರಡು ಹಿಟ್ಗಳನ್ನು ನೀಡಿದ ಅವರು, "ಸ್ಪೈ' (2023) ಮತ್ತು "ಅಪ್ಪುಡೊ ಇಪ್ಪುಡೊ ಎಪ್ಪುಡೊ' (2024) ಚಿತ್ರಗಳಲ್ಲಿ ಯಶಸ್ಸು ಕಾಣಲಿಲ್ಲ. ಇದೀಗ "ಸ್ವಯಂಭೂ' ಮತ್ತು 'ದ ಇಂಡಿಯಾ ಹೌಸ್' ಮೂಲಕ ಪ್ಯಾನ್ ಇಂಡಿಯಾ ಹೊರಟಿರುವ ಅವರು, ಮತ್ತೆ ಗೆಲುವಿನ ಟ್ರ್ಯಾಕ್ಗೆ ಮರಳಲು ಸಿದ್ಧತೆ ನಡೆಸಿದ್ದಾರೆ. ಅದರಲ್ಲಂತೂ ಪೀರಿಯಾಡಿಕಲ್ "ಸ್ವಯಂಭೂ' ಮೇಲೆ ನಿಖಿಲ್, ಬೆಟ್ಟದಷ್ಟು ನಿರೀಕ್ಷೆ ಇಟ್ಟುಕೊಂಡಿದ್ದಾರೆ. ಚಿತ್ರದ ಬಗ್ಗೆ ಇತ್ತೀಚೆಗಷ್ಟೆ ಮಾಹಿತಿ ನೀಡಿರುವ ಅವರು, ""ಸ್ವಯಂಭೂ' ಬಹುಭಾಷೆಗಳ ಪ್ಯಾನ್ ಇಂಡಿಯಾ ಚಿತ್ರವಾಗಿದ್ದು, ವಿಶ್ವಾದ್ಯಂತ ರಿಲೀಸ್ ಆಗಲಿದೆ. ಒಳ್ಳೆ ಸಿನಿಮಾಗಳು ಹೆಚ್ಚು ಸಮಯ ತೆಗೆದುಕೊಳ್ಳುತ್ತವೆ. ಒಂದೇ ಚಿತ್ರಕ್ಕಾಗಿ 175 ದಿನಗಳ ಕಾಲ ಚಿತ್ರೀಕರಣದಲ್ಲಿ ಭಾಗಿಯಾಗುತ್ತೇನೆ, ಅದರಲ್ಲಿ ಬರೋಬ್ಬರಿ 2500 ವಿಎಫ್ಎಕ್ಸ್ ಶಾಟ್ಸ್ ಇರಲಿವೆ ಅಂತ ಖುದ್ದು ನಾನೂ ಅಂದುಕೊಂಡಿರಲಿಲ್ಲ. ಕೆಲವೇ ದಿನಗಳಲ್ಲಿ ಸಿನಿಮಾ ಬಿಡುಗಡೆ ದಿನಾಂಕ ಘೋಷಿಸಲಿದ್ದೇವೆ' ಎಂದು ಹೇಳಿಕೊಂಡಿದ್ದಾರೆ. ಇದಲ್ಲದೇ ಮತ್ತೊಂದು ಸ್ವಾತಂತ್ರ$್ಯಪೂರ್ವ ಐತಿಹಾಸಿಕ ಸಿನಿಮಾ "ದ ಇಂಡಿಯಾ ಹೌಸ್'ನಲ್ಲೂ ನಿಖಿಲ್ ನಟಿಸುತ್ತಿದ್ದಾರೆ.
