ದಳಪತಿ ವಿಜಯ್ ಚಿತ್ರಕ್ಕೆ ಹೈಕೋರ್ಟ್ ಗ್ರೀನ್ ಸಿಗ್ನಲ್! 'ಜನ ನಾಯಗನ್' ಸೆನ್ಸಾರ್ ವಿವಾದಕ್ಕೆ ಸುಖಾಂತ್ಯ! Jana Nayagan

ಚಿತ್ರದ ಬಿಡುಗಡೆಗೆ ತಡೆಯಾಗಿದ್ದ ಸೆನ್ಸಾರ್​ ವಿವಾದದ ಕುರಿತು ವಿಚಾರಣೆ ನಡೆಸಿದ ಮದ್ರಾಸ್​ ಹೈ ಕೋರ್ಟ್​ ಯು/ಎ 16+ ಪ್ರಮಾಣಪತ್ರ ನೀಡುವಂತೆ ಸಿಬಿಎಫ್‌ಸಿಗೆ ಸೂಚನೆ ನೀಡಿದೆ. ಅಂದರೆ, 16 ವರ್ಷ ಮೇಲ್ಪಟ್ಟವರು ಪೋಷಕರ ಸಮ್ಮುಖದಲ್ಲಿ ಈ ಸಿನಿಮಾವನ್ನು ವೀಕ್ಷಿಸಬಹುದು.

ಬುಧವಾರ (ಜ.07) ನಡೆದ ಕೊನೆಯ ವಿಚಾರಣೆಯಲ್ಲಿ ಕೆವಿಎನ್ ಪ್ರೊಡಕ್ಷನ್ಸ್ ಅನ್ನು ಪ್ರತಿನಿಧಿಸುವ ವಕೀಲರು ಮತ್ತು ಕೇಂದ್ರ ಚಲನಚಿತ್ರ ಪ್ರಮಾಣೀಕರಣ ಮಂಡಳಿ ಜನ ನಾಯಗನ್‌ನ ಚಿತ್ರದ ಕುರಿತು ವಾದವನ್ನು ಮಂಡಿಸಿದ್ದಾರೆ. ಈ ಸಂದರ್ಭದಲ್ಲಿ ನ್ಯಾಯಮೂರ್ತಿ ಪಿಟಿ ಆಶಾ ಎರಡೂ ಕಡೆಯವರ ನ್ಯಾಯವನ್ನು ಆಲಿಸಿ ನಂತರ ತೀರ್ಪನ್ನು ನೀಡಿದರು.

ಜನವರಿ 9 ರಂದು ಸಿನಿಮಾ ಬಿಡುಗಡೆಯಾಗುವ ಮೊದಲೇ ಪ್ರಮಾಣಪತ್ರ ಸಿಗದಂತೆ ತಡೆದಿದ್ದ ವ್ಯಕ್ತಿ ಪರಿಶೀಲನಾ ಸಮಿತಿಯ ಸದಸ್ಯರೇ ಎಂಬ ಸ್ಪೋಟಕ ಸತ್ಯ ನ್ಯಾಯಾಲಯದಲ್ಲಿ ಹೊರ ಬಿದ್ದಿತು. ಇದು ವಿಜಯ್ ಚಿತ್ರದ ಪ್ರಮಾಣೀಕರಣ ಪ್ರಕ್ರಿಯೆಯನ್ನು ಸ್ಥಗಿತಗೊಳಿಸುವ ಉದ್ದೇಶವನ್ನು ಹೊಂದಿದೆ ಎಂದು ವಕೀಲರು ವಾದ ಮಂಡಿಸಿದರು.

ಸಿಬಿಎಫ್‌ಸಿಯನ್ನು ಪ್ರತಿನಿಧಿಸುವ ಎಎಸ್‌ಜಿ ಎಆರ್‌ಎಲ್ ಸುಂದರೇಶನ್, ಜನ ನಾಯಗನ್​ ಚಿತ್ರದ ಬಗ್ಗೆ ಬಂದ ದೂರನ್ನು ನ್ಯಾಯಾಲಯಕ್ಕೆ ಹಸ್ತಾಂತರಿಸಿದರು. ಈ ವೇಳೆ ಪರಿಶೀಲನಾ ಸಮಿತಿಯ ಸದಸ್ಯರೊಬ್ಬರು ಸಿನಿಮಾದ ಸೆನ್ಸಾರ್​ ಬಗ್ಗೆ ದೂರನ್ನು ಸಲ್ಲಿಸಿದ್ದರು. ಚಿತ್ರವನ್ನು ವೀಕ್ಷಿಸುವ ಸಂದರ್ಭದಲ್ಲಿ ಅವರ ಆಕ್ಷೇಪಣೆಗಳನ್ನು ದಾಖಲಿಸಲಾಗಲಿಲ್ಲ. ಆದಾಗ್ಯೂ, ಪ್ರಕರಣದಂತೆ ಚಿತ್ರವನ್ನು ಪರೀಕ್ಷಾ ಸಮಿತಿಗೆ ಪ್ರದರ್ಶಿಸಿದ ನಂತರ ಸಿಬಿಎಫ್‌ಸಿ ಅಧಿಕಾರಿಗಳು ಚಿತ್ರವನ್ನು ಪರಿಶೀಲಿಸುವಂತೆ ಆದೇಶಿಸುವ ಅಧಿಕಾರ ಹೊಂದಿದ್ದಾರೆ ಎಂದು ಎಎಸ್‌ಜಿ ವಾದಿಸಿದ್ದಾರೆ.

ವಿನೋತ್ ನಿರ್ದೇಶನದ ಜನ ನಾಯಗನ್​ ಚಿತ್ರದಲ್ಲಿ ವಿಜಯ್, ಮಮಿತಾ ಬೈಜು, ಪೂಜಾ ಹೆಗ್ಡೆ ಮತ್ತು ಬಾಬಿ ಡಿಯೋಲ್ ನಟಿಸಿದ್ದಾರೆ. ಇದು ಜನವರಿ 9 ರಂದು ದೇಶಾದ್ಯಂತ ಬಿಡುಗಡೆಗೊಳ್ಳಬೇಕಿತ್ತು. ಈ ಚಿತ್ರವು ದಳಪತಿಯವರ ಕೊನೆಯ ಚಿತ್ರ ಎಂದು ಹೆಚ್ಚಿನ ಪ್ರಚಾರವನ್ನು ಕೂಡ ಪಡೆದುಕೊಂಡಿತ್ತು. ಈ ಸಿನಿಮಾ ಬುಕಿಂಗ್​ತೆರೆದ ನಂತರ ಟಿಕೆಟ್​ ಬೆಲೆಯಲ್ಲಿ 2000 ದಷ್ಟು ಮಾರಾಟವಾದವು (ಏಜೆನ್ಸೀಸ್​).