ಜೂನಿಯರ್​ ಸಮಂತಾಳ ಮಾತಿನ ಮೋಡಿಗೆ ಬಿದ್ದ ಲಂಡನ್​ ಇಂಜಿನಿಯರ್ ಬರ್ಬಾದ್​: ಆಶು ರೆಡ್ಡಿಯ ಮಹಾನ್​ ನಾಟಕ ಬಯಲು! Ashu Reddy

ಹೈದರಾಬಾದ್​ : ಚಲ್​ ಮೋಹನ್​ ರಂಗ ಚಿತ್ರದ ಮೂಲಕ ಟಾಲಿವುಡ್​ನಲ್ಲಿ ಸಿನಿ ಜರ್ನಿ ಆರಂಭಿಸಿದ ನಟಿ ಆಶು ರೆಡ್ಡಿ (Ashu reddy), ಬಿಗ್​ಬಾಸ್​ ಸಿಸನ್​ 3ರಲ್ಲಿ ಭಾಗವಹಿಸುವ ಮೂಲಕ ತುಂಬಾ ಖ್ಯಾತಿಯನ್ನು ಪಡೆದಿದ್ದಾರೆ. ನೋಡಲು ಸ್ವಲ್ಪ ಸಮಂತಾರನ್ನೇ ಹೋಲುವ ಆಶು ರೆಡ್ಡಿಯನ್ನು ಟಾಲಿವುಡ್ (Tollywood)​ನಲ್ಲಿ ಜೂನಿಯರ್​ ಸಮಂತಾ ಅಂತಾನೇ ಕರೆಯುತ್ತಾರೆ. ಸಾಮಾಜಿಕ ಜಾಲತಾಣದಲ್ಲಿ ಸದಾ ಸಕ್ರೀಯರಾಗಿರುವ ಆಶು ರೆಡ್ಡಿ, ಆಗಾಗ ತಮ್ಮ ಬೋಲ್ಡ್​ ಫೋಟೋ ಹಾಗೂ ವಿಡಿಯೋಗಳನ್ನು ಹರಿಬಿಡುವ ಮೂಲಕ ಪಡ್ಡೆ ಹುಡುಗರ ಮೈ ಬಿಸಿಯೇರಿಸುತ್ತಿರುತ್ತಾರೆ. ಅಲ್ಲದೆ, ತಮ್ಮ ಯೂಟ್ಯೂಬ್​ ಚಾನೆಲ್​ನಲ್ಲಿ ಬೋಲ್ಡ್​ ಕಂಟೆಂಟ್​​ ಮತ್ತು ವಿಡಿಯೋಗಳನ್ನು ಶೇರ್​ ಮಾಡುವ ಮೂಲಕ ಟ್ರೋಲ್​ಗು ಗುರಿಯಾಗುತ್ತಿರುತ್ತಾರೆ. ಅಲ್ಲದೆ, ವಿವಾದಗಳು ಕೂಡ ಇವರಿಗೆ ಹೊಸದೇನೆಲ್ಲ. ಇದೀಗ ಆಶು ರೆಡ್ಡಿ ಮತ್ತೊಂದು ವಿವಾದದಲ್ಲಿ ಸಿಲುಕಿಕೊಂಡಿದ್ದಾರೆ. ಅವರ ವಿರುದ್ಧ ವಂಚನೆ ಆರೋಪ ಕೇಳಿಬಂದಿದೆ. ಈ ಕುರಿತಾದ ಕಂಪ್ಲೀಟ್​ ಮಾಹಿತಿ ಇಲ್ಲಿದೆ.

ಲಂಡನ್​ನಲ್ಲಿ ನೆಲೆಸಿರುವ ಹೈದರಾಬಾದ್​ ಮೂಲದ ಸಾಫ್ಟ್‌ವೇರ್ ಇಂಜಿನಿಯರ್‌ಗೆ ಮದುವೆಯ ಆಮಿಷವೊಡ್ಡಿ ಸುಮಾರು 9.35 ಕೋಟಿ ರೂಪಾಯಿ ವಂಚಿಸಿದ ಆರೋಪದ ಮೇಲೆ ಆಶು ರೆಡ್ಡಿ ಮತ್ತು ಅವರ ಕುಟುಂಬದ ವಿರುದ್ಧ ಹೈದರಾಬಾದ್‌ನ ಸೆಂಟ್ರಲ್ ಕ್ರೈಮ್ ಸ್ಟೇಷನ್ (CCS) ಎಫ್‌ಐಆರ್ ದಾಖಲಿಸಿದೆ. ದೂರುದಾರ ಯೆನುಮುಲ ಸತ್ಯನಾರಾಯಣ ಮೂರ್ತಿ ಅವರ ಪ್ರಕಾರ, ಆಶು ರೆಡ್ಡಿ 2018 ರಲ್ಲಿ ತಮ್ಮ ಮಗ ಧರ್ಮೇಂದ್ರನನ್ನು ಮದುವೆಯಾಗುವುದಾಗಿ ನಂಬಿಸಿ ಕಾರುಗಳು, ಚಿನ್ನಾಭರಣ ಮತ್ತು ಮಾಣಿಕೊಂಡದಲ್ಲಿನ ಫ್ಲಾಟ್ ಸೇರಿದಂತೆ ವಿವಿಧ ಆಸ್ತಿಗಳಿಗಾಗಿ ಹಣ ಪಡೆದಿದ್ದರು. ಆದರೆ, 2020 ಮತ್ತು 2025 ರಲ್ಲಿ ಎರಡು ಬಾರಿ ಮದುವೆ ನಿರಾಕರಿಸಿದ್ದಲ್ಲದೆ, ನಟಿ ಹೇಮಾ ಅವರ ಸಮ್ಮುಖದಲ್ಲಿ ನಡೆದ ಸಂಧಾನದ ವೇಳೆ ನೀಡಲಾಗಿದ್ದ ಖಾಲಿ ಚೆಕ್‌ಗಳನ್ನು ಸಹ ಹರಿದು ಹಾಕಿದ್ದಾರೆ ಎಂದು ಆರೋಪಿಸಿದ್ದಾರೆ. ಈ ವಂಚನೆ ಪ್ರಕರಣದಲ್ಲಿ ಆಶು ರೆಡ್ಡಿ ಅವರ ಪೋಷಕರು ಮತ್ತು ಸಹೋದರಿಯೂ ಶಾಮೀಲಾಗಿದ್ದಾರೆ ಎಂದು ದೂರಿನಲ್ಲಿ ತಿಳಿಸಲಾಗಿದೆ.

ಎಫ್​ಐಆರ್​ನಲ್ಲಿರುವ ಮಾಹಿತಿಯ ಪ್ರಕಾರ, ದೂರುದಾರರ ಮಗ ವೈ.ವಿ. ಧರ್ಮೇಂದ್ರ ಲಂಡನ್‌ನಲ್ಲಿ ಸಾಫ್ಟ್‌ವೇರ್ ಇಂಜಿನಿಯರ್ ಆಗಿದ್ದು, 2018ರಲ್ಲಿ ಭಾರತಕ್ಕೆ ಬಂದಿದ್ದಾಗ ಪರಿಚಯಸ್ಥರ ಮೂಲಕ ಆಶು ರೆಡ್ಡಿ ಅವರನ್ನು ಭೇಟಿಯಾಗಿದ್ದರು. ತಾನು ಅಮೆರಿಕದಲ್ಲಿ ಸ್ನಾತಕೋತ್ತರ ಪದವಿ ಮುಗಿಸಿರುವ ನಟಿ ಎಂದು ಪರಿಚಯಿಸಿಕೊಂಡ ಆಶು ರೆಡ್ಡಿ, ಕೇವಲ ಎರಡು ತಿಂಗಳಲ್ಲೇ ಧರ್ಮೇಂದ್ರ ಅವರನ್ನು ಪ್ರೀತಿಸುತ್ತಿರುವುದಾಗಿ ಮತ್ತು ಮದುವೆಯಾಗುವುದಾಗಿ ನಂಬಿಸಿದರು. ನನಗೆ ಈ ಮೊದಲೇ ಮದುವೆಯಾಗಿದ್ದು ವಿಚ್ಛೇದನ ಪ್ರಕ್ರಿಯೆ ನಡೆಯುತ್ತಿದೆ ಎಂದು ಧರ್ಮೇಂದ್ರ ಅವರು ಸ್ಪಷ್ಟಪಡಿಸಿದರು ಕೂಡ ಆಶು ರೆಡ್ಡಿ ತಮ್ಮ ಸಂಬಂಧವನ್ನು ಮುಂದುವರಿಸಿದ್ದರು. ಪ್ರೇಮ ಪ್ರಸ್ತಾಪವನ್ನು ಒಪ್ಪಿಕೊಂಡ ನಂತರ, ತಮಗೆ ಎಚ್‌-1ಬಿ (H1B) ವೀಸಾದಲ್ಲಿ ಸಮಸ್ಯೆಯಿದೆ ಎಂದು ತಿಳಿಸಿದ ಆಶು ರೆಡ್ಡಿ, ತಮಗೆ ಇನ್ನು ಮುಂದೆ ಓದು ಮುಂದುವರಿಸಲು ಆಸಕ್ತಿಯಿಲ್ಲ ಎಂಬ ಸಂಗತಿಯನ್ನು ಧರ್ಮೇಂದ್ರ ಅವರ ಬಳಿ ಒಪ್ಪಿಕೊಂಡಿದ್ದರು ಎಂದು ಎಫ್‌ಐಆರ್‌ನಲ್ಲಿ ಉಲ್ಲೇಖಿಸಲಾಗಿದೆ.

ಆಕೆ ತನ್ನ ಶಿಕ್ಷಣ ಸಾಲ ಬಾಕಿ ಇರುವುದಾಗಿ ಮತ್ತು ತಂದೆಯಿಂದ ಆರ್ಥಿಕ ನೆರವು ನಿಂತುಹೋಗಿದೆ ಎಂದು ಧರ್ಮೇಂದ್ರಗೆ ಹೇಳಿದ್ದಳು. ತನಗೆ ನಟನೆಯಲ್ಲಿ ಆಸಕ್ತಿಯಿದ್ದು, ಭಾರತಕ್ಕೆ ಮರಳಿ ವೃತ್ತಿ ಜೀವನ ಆರಂಭಿಸಲು ಆರ್ಥಿಕ ಸಹಾಯ ಮಾಡುವಂತೆ ಧರ್ಮೇಂದ್ರನ ಬಳಿ ನೆರವು ಕೋರಿದ್ದಳು. ಇದೇ ವೇಳೆ, ಆತನನ್ನು ಮದುವೆಯಾಗುವುದಾಗಿ ಪದೇ ಪದೇ ಭರವಸೆ ನೀಡಿದ್ದರಿಂದ, ಆತ ಅವಳನ್ನು ಸಂಪೂರ್ಣವಾಗಿ ನಂಬಿ, ಆಕೆಯ ಎಲ್ಲಾ ಆರ್ಥಿಕ ಅಗತ್ಯಗಳನ್ನು ಪೂರೈಸಲು ಮುಂದಾದನು ಎಂದು ದೂರಿನಲ್ಲಿ ಉಲ್ಲೇಖಿಸಲಾಗಿದೆ.

ಅಲ್ಲದೆ, ಮದುವೆಗೆ ತನ್ನ ತಂದೆಯ ಒಪ್ಪಿಗೆ ಪಡೆಯಲು ಐಷಾರಾಮಿ ಜೀವನಶೈಲಿ ಅಗತ್ಯವೆಂದು ನಂಬಿಸಿ, ಕಳೆದ ಎರಡು ವರ್ಷಗಳಿಂದ ಮಾಸಿಕ ಖರ್ಚು, ಕಾರುಗಳು, ಚಿನ್ನ ಹಾಗೂ ತನ್ನ ಹೆಸರಿಗೆ ಆಸ್ತಿಗಳನ್ನು ಮಾಡಿಸಿಕೊಂಡಿದ್ದರು ಎನ್ನಲಾಗಿದೆ. ಆದರೆ, ಜುಲೈ 2020ರಲ್ಲಿ ಮದುವೆಯ ಮಾತುಕತೆ ನಡೆಸಲು ಮುಂದಾದಾಗ ಯಾವುದೇ ಸರಿಯಾದ ಕಾರಣ ನೀಡದೆ ಮದುವೆಗೆ ನಿರಾಕರಿಸಿದ್ದಾರೆ. ಈ ಹಿನ್ನೆಲೆಯಲ್ಲಿ ನೊಂದ ವ್ಯಕ್ತಿಯು ತಾನು ನೀಡಿದ್ದ ಹಣ ಮತ್ತು ಚಿನ್ನಾಭರಣಗಳನ್ನು ಮರಳಿ ನೀಡುವಂತೆ ಆಶು ರೆಡ್ಡಿ ಅವರನ್ನು ಒತ್ತಾಯಿಸಿದ್ದಾರೆ ಎಂದು ದೂರಿನಲ್ಲಿ ತಿಳಿಸಲಾಗಿದೆ.

ಅಶು ರೆಡ್ಡಿಗೆ ನೀಡಿದ್ದ ಹಣ ಮತ್ತು ಆಸ್ತಿಯನ್ನು ಹಿಂತಿರುಗಿಸುವಂತೆ ಧರ್ಮೇಂದ್ರ ಅವರು ಕೇಳಿದಾಗ, ಆಕೆ ಸರಿಯಾಗಿ ಪ್ರತಿಕ್ರಿಯಿಸದೆ ತಪ್ಪಿಸಿಕೊಳ್ಳುತ್ತಿದ್ದಳು. ಈ ವಿವಾದವನ್ನು ಬಗೆಹರಿಸಲು ಟಾಲಿವುಡ್ ನಟಿ ಹೇಮಾ ಅವರ ಮಧ್ಯಸ್ಥಿಕೆಯಲ್ಲಿ ನಡೆದ ಸಭೆಯಲ್ಲಿ, ಆಶು ರೆಡ್ಡಿ 70 ಲಕ್ಷ ರೂಪಾಯಿಗಳನ್ನು ಹಿಂತಿರುಗಿಸಲು ಒಪ್ಪಿ, ಅದರ ಭರವಸೆಯಾಗಿ ಖಾಲಿ ಚೆಕ್‌ಗಳನ್ನು ನೀಡಿದ್ದರು. ಆದರೆ, ನಂತರ ಹೇಮಾ ಅವರಿಂದ ಆ ಚೆಕ್‌ಗಳನ್ನು ಪಡೆದು ಹರಿದು ಹಾಕುವ ಮೂಲಕ ಸಾಕ್ಷ್ಯನಾಶಪಡಿಸಿದ ಅಶು ರೆಡ್ಡಿ, ಹಣವನ್ನು ಮಾತ್ರ ಹಿಂತಿರುಗಿಸಲಿಲ್ಲ. ಇದಾದ ಬಳಿಕ ನವೆಂಬರ್ 2020 ರಲ್ಲಿ, ಆಶು ರೆಡ್ಡಿ ಅವರ ಸಹೋದರಿ ದಿವ್ಯಾ ರೆಡ್ಡಿ ಮತ್ತು ತಾಯಿ ಯಶೋದಾ ರೆಡ್ಡಿ ಅವರು ಧರ್ಮೇಂದ್ರರನ್ನು ಸಂಪರ್ಕಿಸಿ, ಬ್ರೇಕ್‌ಅಪ್ ನಂತರ ಆಶು ರೆಡ್ಡಿ ಮಾನಸಿಕವಾಗಿ ಕುಗ್ಗಿದ್ದಾರೆ ಎಂದು ತಿಳಿಸಿದ್ದರು.

ಆಶು ರೆಡ್ಡಿ ಅವರು ಖಿನ್ನತೆಯಿಂದ ಬಳಲುತ್ತಿದ್ದಾಳೆ ಮತ್ತು ಧರ್ಮೇಂದ್ರನಿಂದ ಮಾತ್ರ ಆಕೆ ಸಹಜ ಸ್ಥಿತಿಗೆ ಮರಳಲು ಸಾಧ್ಯ ಎಂದು ಆಶು ರೆಡ್ಡಿ ಕುಟುಂಬ ನಂಬಿಸಿತ್ತು. ಅಲ್ಲದೆ, ಹಣಕಾಸಿನ ವಿವಾದಗಳನ್ನು ಮರೆತು ಸಂಬಂಧವನ್ನು ಮುಂದುವರಿಸುವಂತೆ ಹಾಗೂ ಮದುವೆಯಾಗುವ ಭರವಸೆಯನ್ನು ಕುಟುಂಬ ನೀಡಿತ್ತು. ಇದನ್ನು ನಂಬಿದ ಧರ್ಮೇಂದ್ರ 2020 ರಿಂದ ಮತ್ತೆ ಆಕೆಯೊಂದಿಗೆ ಸಂಬಂಧವನ್ನು ಮುಂದುವರಿಸಿದ್ದರು. ಮದುವೆಯ ಮಾತುಕತೆಗಾಗಿ ದೂರುದಾರರು ಆಶು ರೆಡ್ಡಿ ಅವರ ತಂದೆ ವೆಂಕಟ ಕೃಷ್ಣ ಕೊಯ್ಯ ಅವರನ್ನು ಭೇಟಿಯಾದಾಗ, ಅವರು ಕೂಡ ಮದುವೆಗೆ ಸಮ್ಮತಿ ಸೂಚಿಸಿ ಶೀಘ್ರದಲ್ಲೇ ದಿನಾಂಕ ನಿಗದಿಪಡಿಸುವುದಾಗಿ ಭರವಸೆ ನೀಡಿದ್ದರು. ಮದುವೆಯ ಪ್ರಕ್ರಿಯೆಯನ್ನು ಮತ್ತಷ್ಟು ನಂಬಿಸಲು, ಆಶು ರೆಡ್ಡಿ ಅವರು ಅಕ್ಟೋಬರ್ 2024ರಲ್ಲಿ ಜ್ಯೋತಿಷಿ ವೇಣು ಸ್ವಾಮಿ ಅವರ ಬಳಿ ಜಾತಕ ಹೊಂದಾಣಿಕೆಯನ್ನು ಕೂಡ ಪರಿಶೀಲಿಸಿದ್ದರು. ಈ ಎಲ್ಲಾ ಬೆಳವಣಿಗೆಗಳಿಂದಾಗಿ ದೂರುದಾರರು ಮತ್ತು ಅವರ ಮಗ ಧರ್ಮೇಂದ್ರ ಮದುವೆ ನಡೆಯುವುದು ಖಚಿತ ಎಂದು ನಂಬಿ ದೊಡ್ಡ ಮಟ್ಟದ ಹಣಕಾಸು ವರ್ಗಾವಣೆಗಳನ್ನು ಮಾಡಿದ್ದರು. ಆದರೆ 2020 ರಿಂದ 2025 ರವರೆಗೆ ವಿವಿಧ ಕಾರಣಗಳನ್ನು ನೀಡಿ ಮದುವೆಯನ್ನು ಮುಂದೂಡುತ್ತಾ, ಆಶು ರೆಡ್ಡಿ ಮತ್ತು ಅವರ ಕುಟುಂಬದವರು ತಮ್ಮನ್ನು ನಂಬಿಸಿ ವಂಚಿಸಿದ್ದಾರೆ ಎಂದು ದೂರಿನಲ್ಲಿ ತಿಳಿಸಲಾಗಿದೆ.

ಆಶು ರೆಡ್ಡಿ ಮತ್ತು ಅವರ ಕುಟುಂಬದ ವಿರುದ್ಧ ಸುಮಾರು 9.35 ಕೋಟಿ ರೂಪಾಯಿ ವಂಚನೆ ಮತ್ತು ಹನಿ ಟ್ರ್ಯಾಪ್ ಮಾಡಿದ ಆರೋಪದ ಮೇಲೆ ಎಫ್‌ಐಆರ್ ದಾಖಲಾಗಿದೆ. ದೂರುದಾರ ಯೇನುಮುಲ ಸತ್ಯನಾರಾಯಣ ಮೂರ್ತಿ ಅವರ ಪ್ರಕಾರ, ಮದುವೆಯ ಆಮಿಷವೊಡ್ಡಿದ ಆಶು ರೆಡ್ಡಿ, ಕಳೆದ ಐದು ವರ್ಷಗಳಲ್ಲಿ ತಮ್ಮ ಮಗನಿಂದ 5 ಕೆಜಿ ಚಿನ್ನ, ಐಷಾರಾಮಿ ಕಾರುಗಳು ಮತ್ತು ಮಣಿಕೊಂಡದಲ್ಲಿ 3 ಕೋಟಿ ರೂಪಾಯಿ ಮೌಲ್ಯದ ಫ್ಲಾಟ್ ಸೇರಿದಂತೆ ಭಾರಿ ಮೊತ್ತದ ಹಣವನ್ನು ಪಡೆದಿದ್ದಾರೆ. ಆಶು ರೆಡ್ಡಿ ಕುಟುಂಬದವರು ಧರ್ಮೇಂದ್ರನನ್ನು "ಅಳಿಯ" ಎಂದು ಸಂಬೋಧಿಸಿ ಆರ್ಥಿಕ ಸಹಾಯ ಪಡೆಯುತ್ತಿದ್ದರು ಆದರೆ, 2025ರಲ್ಲಿ ಮದುವೆಯಾಗಲು ನಿರಾಕರಿಸಿ ಬೆದರಿಕೆ ಹಾಕಲು ಪ್ರಾರಂಭಿಸಿದ್ದಾರೆ ಎಂದು ದೂರಿನಲ್ಲಿ ತಿಳಿಸಲಾಗಿದೆ. ಈ ವಂಚನೆಯಲ್ಲಿ ಆಶು ರೆಡ್ಡಿ ಅವರ ತಂದೆ, ಸಹೋದರಿ ಮತ್ತು ಆಕೆಯ ಪ್ರಿಯತಮ ಎನ್ನಲಾದ ನಮ್ಮಿ ಶಿವ ಜಯಂತ್ ಕೂಡ ಭಾಗಿಯಾಗಿದ್ದಾರೆ ಎಂದು ಆರೋಪಿಸಲಾಗಿದೆ. ಮದುವೆಯ ಸುಳ್ಳು ಭರವಸೆ ನೀಡಿ ಹಣದ ಆಸೆ ತೋರಿಸುವುದು, ಕ್ರಿಮಿನಲ್ ಪಿತೂರಿ ಮತ್ತು ನಂಬಿಕೆ ದ್ರೋಹ ಎಸಗಿರುವ ಹಿನ್ನೆಲೆಯಲ್ಲಿ ಪೊಲೀಸರು ತನಿಖೆ ಕೈಗೊಂಡಿದ್ದಾರೆ. ಸಂತ್ರಸ್ತ ಯುವಕ ಈ ಘಟನೆಯಿಂದ ತೀವ್ರ ಹಣಕಾಸಿನ ನಷ್ಟ ಮತ್ತು ಮಾನಸಿಕ ಸಂಕಟಕ್ಕೆ ಒಳಗಾಗಿದ್ದು, ವಂಚನೆಯಿಂದ ಪಡೆದ ಆಸ್ತಿಗಳನ್ನು ಮರುಪಡೆಯಲು ಮತ್ತು ತಪ್ಪಿತಸ್ಥರ ವಿರುದ್ಧ ಕಠಿಣ ಕಾನೂನು ಕ್ರಮ ಕೈಗೊಳ್ಳುವಂತೆ ದೂರುದಾರರು ವಿನಂತಿಸಿದ್ದಾರೆ, (ಏಜೆನ್ಸೀಸ್​).