ಮುಖಕ್ಕೆ ಮಾತ್ರವಲ್ಲ! ಎಲ್ಲೆಲ್ಲಿ ಕಾಣಿಸುತ್ತೋ... ಚಿತ್ರರಂಗದ ಕರಾಳತೆ ಬಿಚ್ಚಿಟ್ಟ ಖ್ಯಾತ ನಟಿ ಸಮೀರಾ ಓಪನ್ ಟಾಕ್​ | Sameera Reddy

ಆಂಧ್ರಪ್ರದೇಶ: ಬಾಲಿವುಡ್​, ಟಾಲಿವುಡ್ ಚಿತ್ರಗಳು​ ಸೇರಿದಂತೆ ಕನ್ನಡದ ಒಂದು ಸಿನಿಮಾದಲ್ಲಿಯೂ ನಟಿಸಿರುವ ಬಹುಭಾಷಾ ತಾರೆ ಸಮೀರಾ ರೆಡ್ಡಿ (Sameera Reddy ) ಇದೀಗ ಚಿತ್ರರಂಗದ ಕರಾಳತೆ ಕುರಿತಂತೆ ಇತ್ತೀಚಿನ ಸಂದರ್ಶನವೊಂದರಲ್ಲಿ ನೀಡಿದ ಹೇಳಿಕೆಗಳು ಸದ್ಯ ಚಿತ್ರರಂಗದಲ್ಲಿ ಮತ್ತು ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ಚರ್ಚೆಗೆ ಗ್ರಾಸವಾಗಿದೆ. ಹಾಗೂ ಹಲವರ ಅಸಮಾಧಾನಕ್ಕೂ ಕಾರಣವಾಗಿದೆ. 

ನಟನೆಯಿಂದ ಸದ್ಯ ದೂರ ಉಳಿದಿರುವ ಸಮೀರಾ, ಪತಿ-ಮಕ್ಕಳು ಕುಟುಂಬವೆಂದು ತಮ್ಮ ಸಂಸಾರವನ್ನು ನೋಡಿಕೊಳ್ಳವುದರಲ್ಲಿ ಬಿಜಿಯಾಗಿದ್ದಾರೆ. ಈ ಮಧ್ಯೆ, ಸೋಷಿಯಲ್ ಮೀಡಿಯಾದಲ್ಲಿ ಸಖತ್ ಆಕ್ಟೀವ್ ಆಗಿರುವ ಈ ಬ್ಯೂಟಿ, ರೀಲ್ಸ್​ ಮತ್ತು ವಿಡಿಯೋಗಳ ಮೂಲಕ ತಮ್ಮ ಅಭಿಮಾನಿಗಳೊಂದಿಗೆ ಇಂದಿಗೂ ಟಚ್​ನಲ್ಲಿದ್ದಾರೆ. ಚಿತ್ರರಂಗದಿಂದ ಲಾಂಗ್​ ಗ್ಯಾಪ್​ ತೆಗೆದುಕೊಂಡಿರುವ ನಟಿ, ಸಂದರ್ಶನವೊಂದರಲ್ಲಿ ಭಾಗಿಯಾಗಿ, ತಮಗಾದ ಬಾಡಿ ಶೇಮಿಂಗ್ ಬಗ್ಗೆ ಮುಕ್ತವಾಗಿ ಮಾತನಾಡಿದ್ದಾರೆ.

ಒಂದು ಕಾಲದಲ್ಲಿ ತೆಲುಗು ಮತ್ತು ಹಿಂದಿ ಸಿನಿಮಾಗಳಲ್ಲಿ ಬ್ಯಾಕ್​ ಟು ಬ್ಯಾಕ್​ ಕೆಲಸ ಮಾಡುತ್ತಿದ್ದ ಈ ತೆಲುಗಿನ ಬ್ಯೂಟಿ, ವೃತ್ತಿಜೀವನದ ಆರಂಭದಲ್ಲಿ ಬಣ್ಣ ತಾರತಮ್ಯ, ದೇಹವನ್ನು ಅಣಕಿಸುವುದು ಸೇರಿದಂತೆ ಒಂದಷ್ಟು ಕಠಿಣ ಸವಾಲುಗಳನ್ನು ಚಿತ್ರರಂಗದಲ್ಲಿ ಎದುರಿಸಿದ್ದಾಗಿ ಹೇಳಿದ್ದಾರೆ. ನನ್ನ ಮೈಬಣ್ಣ ಅಷ್ಟು ಬಿಳಿಯಾಗಿರಲಿಲ್ಲ. ಆದರೆ, ನೈಸರ್ಗಿಕ ಬಣ್ಣಕ್ಕಿಂತ ಹೆಚ್ಚು ಬಿಳಿಯಾಗಿ ಕಾಣುವಂತೆ ಮಾಡಲು, ಚಿತ್ರತಂಡ ನನ್ನ ಮುಖಕ್ಕೆ ಮಾತ್ರವಲ್ಲ, ದೇಹದ ಭಾಗ ಎಲ್ಲೆಲ್ಲಿ ಕಾಣಿಸುತ್ತೋ, ಅಲ್ಲಿಗೆಲ್ಲ ಮೇಕಪ್ ಮಾಡಿಕೊಳ್ಳುವಂತೆ ಒತ್ತಡ ಹೇರುತ್ತಿದ್ದರು ಎಂದಿದ್ದಾರೆ.

ನಾನು ತುಂಬ ಸುಂದರವಾಗಿದ್ದೇನೆ ಎನ್ನುವಂತೆ ಪರದೆಯ ಮೇಲೆ ಮೇಕಪ್​ ಮಾಡಿ ತೋರಿಸುತ್ತಿದ್ದರು. ಇದರೊಟ್ಟಿಗೆ, ನನ್ನ ಹೈಟ್​ ಮತ್ತು ತೂಕ ಕೂಡ ಟೀಕೆಗಳಿಗೆ ಅಸ್ತ್ರವಾಗಿತ್ತು. ಇದು ತುಂಬಾನೇ ಮನಸ್ಸಿಗೆ ಘಾಸಿಯುಂಟು ಮಾಡಿತು. ಅವರಿಗೆ, ಪ್ರತಿಭೆಗಿಂತಲೂ ದೇಹದ ಆಕಾರವೇ ದೊಡ್ಡದಾಗಿತ್ತು. ಅದರಲ್ಲೂ, ನನಗೆ ಮೊದಲ ಮಗು ಜನಿಸಿದಾಗ, ನನ್ನಲ್ಲಿದ್ದ ವಿಶ್ವಾಸ ಇನ್ನಷ್ಟು ಕುಸಿದು ಹೋಯಿತು. ನೆಗೆಟಿವ್ ಕಮೆಂಟ್​ಗಳು, ಸರಣಿ ಟೀಕೆ, ವ್ಯಂಗ್ಯಗಳು ಭಾರೀ ಬೇಸರಕ್ಕೆ ದೂಡಿತ್ತು ಎಂದು ಹೇಳಿದ್ದಾರೆ.

ಅದೇ ಎರಡನೇ ಬಾರಿ ನಾನು ತಾಯಿ ಆದಾಗ, ನನ್ನ ಹಿಂದಿನ ಯೋಚನೆಗಳು ಬದಲಾಯಿತು. ಸೋಷಿಯಲ್​ ಮೀಡಿಯಾದಿಂದ ದೂರವಿದ್ದ ನಾನು, ಹೆಚ್ಚು ಆಕ್ಟೀವ್ ಆಗಲು ಶುರುಮಾಡಿದೆ. ಕಮ್​ಬ್ಯಾಕ್​ ಆದಮೇಲೂ ನೆಟ್ಟಿಗರು ನನ್ನ ಬಿಳಿ ಕೂದಲು ಮತ್ತು ಹೆಚ್ಚುವರಿ ತೂಕವನ್ನು ಟೀಕಿಸಿ, ಟ್ರೋಲ್ ಮಾಡಿದರು. ಆದರೆ, ಮುಂಚಿನಂತೆ ನನಗೆ ಯಾವುದೇ ಬೇಸರ ಅಥವಾ ಘಾಸಿಯಾಗಲಿಲ್ಲ. ಕಾರಣ, ಅದಕ್ಕೆಲ್ಲ ನಾನು ತಲೆಯೇ ಕೆಡಿಸಿಕೊಳ್ಳುವುದಿಲ್ಲ ಎಂದು ಹೇಳಿದ್ದಾರೆ,(ಏಜೆನ್ಸೀಸ್).