ನಟಿ ಪ್ರತ್ಯುಷಾ ಡೆತ್ ಕೇಸ್​: ಪ್ರಿಯಕರ ಸಿದ್ಧಾರ್ಥ್​ ರೆಡ್ಡಿ ಅರ್ಜಿ ವಜಾಗೊಳಿಸಿದ 'ಸುಪ್ರೀಂ'; 4 ವಾರಗಳ ಡೆಡ್​ಲೈನ್​ | Actress Prathyusha

ನವದೆಹಲಿ: ಕಳೆದ ಎರಡು ದಶಕಗಳ ಹಿಂದೆ ತೆಲುಗು ರಾಜ್ಯಗಳಲ್ಲಿ ಭಾರೀ ಸಂಚಲನ ಮೂಡಿಸಿದ್ದ ನಟಿ ಪ್ರತ್ಯುಷಾ ಕೊಲೆ ಪ್ರಕರಣದಲ್ಲಿ ಇಂದು (ಫೆ.17) ಸುಪ್ರೀಂ ಕೋರ್ಟ್ ಅಂತಿಮ ಹಾಗೂ ಮಹತ್ವದ ತೀರ್ಪು ನೀಡಿದೆ.

ಈ ಪ್ರಕರಣದಲ್ಲಿ ಹೈಕೋರ್ಟ್ ತೀರ್ಪನ್ನು ಪ್ರಶ್ನಿಸಿ ಆರೋಪಿ ಸ್ಥಾನದಲ್ಲಿರುವ ಸಿದ್ಧಾರ್ಥ ರೆಡ್ಡಿ ಸಲ್ಲಿಸಿದ್ದ ಮೇಲ್ಮನವಿಯನ್ನು ಇದೀಗ ಸುಪ್ರೀಂ ಕೋರ್ಟ್ ವಜಾಗೊಳಿಸಿದೆ. ಆರೋಪಿಗಳಿಗೆ ಹೈಕೋರ್ಟ್ ನೀಡಿದ್ದ ಶಿಕ್ಷೆಯನ್ನು ಎತ್ತಿ ಹಿಡಿದ ಸುಪ್ರೀಂ, ಸಿದ್ಧಾರ್ಥ ರೆಡ್ಡಿಗೆ ಮುಂದಿನ ನಾಲ್ಕು ವಾರಗಳಲ್ಲಿ ಶರಣಾಗುವಂತೆ ತಾಕೀತು ಮಾಡಿದೆ. ಮತ್ತೊಂದೆಡೆ, ಆರೋಪಿ ಸಿದ್ಧಾರ್ಥ್​ ಜೈಲು ಶಿಕ್ಷೆಯನ್ನು ವಿಸ್ತರಿಸುವಂತೆ ಕೋರಿ ಪ್ರತ್ಯುಷಾ ಅವರ ತಾಯಿ ಸಲ್ಲಿಸಿದ್ದ ಅರ್ಜಿಯನ್ನೂ ಕೋರ್ಟ್ ವಜಾಗೊಳಿಸಿದೆ.

20ರ ದಶಕದಲ್ಲಿ ತೆಲುಗು ಅಂಗಳದಲ್ಲಿ ಹೆಚ್ಚು ಜನಪ್ರಿಯವಾಗಿದ್ದ ನಟಿ ಪ್ರತ್ಯುಷಾ ಸಾವಿನ ಪ್ರಕರಣ ಇಡೀ ಟಾಲಿವುಡ್‌ ಮಾತ್ರವಲ್ಲದೆ ತೆಲುಗು ರಾಜ್ಯಗಳಲ್ಲಿಯೂ ಭಾರೀ ಸಂಚಲನ ಸೃಷ್ಟಿಸಿತು. ಟಾಲಿವುಡ್ ಉದ್ಯಮದಲ್ಲಿ ಅನೇಕ ಸಿನಿಮಾಗಳನ್ನು ಮಾಡಿ, ಸಿನಿಪ್ರಿಯರ ಮೆಚ್ಚುಗೆಗೆ ಪಾತ್ರವಾಗಿದ್ದ ಪ್ರತ್ಯುಷಾ, ಸಿದ್ಧಾರ್ಥ್​ ರೆಡ್ಡಿಯೊಂದಿಗೆ ಪ್ರೀತಿಯಲ್ಲಿದ್ದರು. ಫೆಬ್ರವರಿ 23, 2002ರಂದು, ಪ್ರತ್ಯುಷಾ ಮತ್ತು ಅವರ ಗೆಳೆಯ ಸಿದ್ಧಾರ್ಥ ರೆಡ್ಡಿ ತಮ್ಮ ಮನೆಯವರು ಪ್ರೀತಿಯನ್ನು ಒಪ್ಪದ ಕಾರಣ, ಕೀಟನಾಶಕ ಸೇವಿಸಿ ಆತ್ಮಹತ್ಯೆಗೆ ಮುಂದಾದರು. ಈ ವೇಳೆ, ಇಬ್ಬರನ್ನು ಹತ್ತಿರದ ಆಸ್ಪತ್ರೆಗೆ ದಾಖಲಿಸಲಾಯಿತು. ಚಿಕಿತ್ಸೆ ಫಲಿಸದೆ ನಟಿ ಸಾವನ್ನಪ್ಪಿದರೆ, ಸಿದ್ಧಾರ್ಥ್​ ಪ್ರಾಣಪಾಯದಿಂದ ಪಾರಾದರು.

ಕೂಲ್​ ಡ್ರಿಂಕ್ಸ್​ನಲ್ಲಿ ಕೀಟನಾಶಕ ಬೆರೆಸಿರುವುದು ಲ್ಯಾಬ್​ ಟೆಸ್ಟ್​ಗಳಲ್ಲಿ ಬಹಿರಂಗವಾಯಿತು. ರಾಜ್ಯ ಸರ್ಕಾರ ನೇಮಿಸಿದ ಮೂವರು ವೈದ್ಯರ ತಂಡವು ಪ್ರತ್ಯೂಷ ಆರ್ಗನೋಫಾಸ್ಫೇಟ್‌ನಿಂದ ಮೃತಪಟ್ಟಿದ್ದಾರೆ ಮತ್ತು ಸಾವಿಗೆ ಮುನ್ನ ಯಾವುದೇ ಉಸಿರುಗಟ್ಟುವಿಕೆ ಅಥವಾ ಲೈಂಗಿಕ ದೌರ್ಜನ್ಯ ನಡೆದಿಲ್ಲ ಎಂದು ವರದಿ ನೀಡಿದ್ದಾರೆ. ಇದರ ಆಧಾರದ ಮೇಲೆ, ಸಿಬಿಐ ತನಿಖೆ ಕೈಗೊಂಡಿತು.

ಆರೋಪಿ ಸಿದ್ಧಾರ್ಥ ರೆಡ್ಡಿ ವಿರುದ್ಧ ಸಿಬಿಐ ವಿವಿಧ ಸೆಕ್ಷನ್‌ಗಳ ಅಡಿಯಲ್ಲಿ ಆರೋಪಪಟ್ಟಿ ಸಲ್ಲಿಸಿದೆ. ಫೆಬ್ರವರಿ 23, 2004ರಂದು ಹೈದರಾಬಾದ್ ಮೆಟ್ರೋಪಾಲಿಟನ್ ಸೆಷನ್ಸ್ ನ್ಯಾಯಾಧೀಶರು ಆರೋಪಿ ಸಿದ್ಧಾರ್ಥ್​ ರೆಡ್ಡಿಗೆ ಐದು ವರ್ಷಗಳ ಕಠಿಣ ಜೈಲು ಶಿಕ್ಷೆ ಮತ್ತು 5,000 ರೂ. ದಂಡ ವಿಧಿಸಿದರು. ಇದರ ವಿರುದ್ಧ ರೆಡ್ಡಿ ಹೈಕೋರ್ಟ್ ಮೆಟ್ಟಿಲೇರಿದರು. ಡಿಸೆಂಬರ್ 28, 2011ರಂದು ನ್ಯಾಯಾಲಯವು, ಜೈಲು ಶಿಕ್ಷೆಯನ್ನು ಎರಡು ವರ್ಷಗಳಿಗೆ ಇಳಿಸಿ ಮತ್ತು ದಂಡವನ್ನು 50,000 ರೂ.ಗೆ ಹೆಚ್ಚಿಸಿ ಎಂದು ತೀರ್ಪು ನೀಡಿತು.

ಆದರೆ, ಹೈಕೋರ್ಟ್ ತೀರ್ಪನ್ನು ಪ್ರಶ್ನಿಸಿ, ಪ್ರತ್ಯೂಷ ಕೊಲೆ ಪ್ರಕರಣದಲ್ಲಿ ತಾನು ತಪ್ಪಿತಸ್ಥನಲ್ಲ ಎಂದು ಸುಪ್ರೀಂ ಕೋರ್ಟ್​ಗೆ ಸಿದ್ಧಾರ್ಥ್​ ಮೇಲ್ಮನವಿ ಸಲ್ಲಿಸಿದರು. ಇದೇ ಸಮಯದಲ್ಲಿ, ಪ್ರತ್ಯೂಷಾ ತಾಯಿ ಸರೋಜಿನಿ ದೇವಿ 2012ರಲ್ಲಿ ರೆಡ್ಡಿಗೆ ವಿಧಿಸಿರುವ ಜೈಲು ಶಿಕ್ಷೆಯನ್ನು ವಿಸ್ತರಿಸಬೇಕು ಎಂದು ಅರ್ಜಿ ಸಲ್ಲಿಸಿದ್ದರು. ಆದರೆ, ಇಂದಿನ ತೀರ್ಪಿನಲ್ಲಿ, ಸಿದ್ಧಾರ್ಥ್​ ರೆಡ್ಡಿ ಮತ್ತು ಸರೋಜಿನಿ ದೇವಿ ಅವರ ಅರ್ಜಿಗಳನ್ನು ನ್ಯಾಯಾಲಯ ವಜಾಗೊಳಿಸಿದೆ. ಹೈಕೋರ್ಟ್ ನೀಡಿದ ತೀರ್ಪನ್ನು ಎತ್ತಿಹಿಡಿದ ಸುಪ್ರೀಂ ಕೋರ್ಟ್, ನಾಲ್ಕು ವಾರಗಳಲ್ಲಿ ಸಿದ್ಧಾರ್ಥ್​ಗೆ ಶರಣಾಗುವಂತೆ ಆದೇಶಿಸಿದೆ,(ಏಜೆನ್ಸೀಸ್).