ಸತಿ ಸಾಯಿ ಮಂಜ್ರೇಕರ್​; "ದ ಇಂಡಿಯಾ ಹೌಸ್​' ಚಿತ್ರದಲ್ಲಿ ನಟಿಯ ಲುಕ್​ ಬಿಡುಗಡೆ

ಹಿರಿಯ ನಟ, ನಿರ್ದೇಶಕ ಮಹೇಶ್​ ಮಂಜ್ರೇಕರ್​ ಪುತ್ರಿ ಸಾಯಿ ಮಂಜ್ರೇಕರ್​ 2019ರಲ್ಲಿ "ದಬಂಗ್​ 3' ಮೂಲಕ ನಾಯಕಿಯಾಗಿ ಪದಾರ್ಪಣೆ ಮಾಡಿದ್ದರು. ಅದಾಗಿ ಮೂರು ವರ್ಷಗಳ ಗ್ಯಾಪ್​ ನಂತರ 2022ರಲ್ಲಿ "ನಿ' ಚಿತ್ರದ ಮೂಲಕ ಟಾಲಿವುಡ್​ಗೆ ಪದಾರ್ಪಣೆ ಮಾಡಿದ್ದ ಸಾಯಿ, ಸದ್ಯ ತೆಲುಗು ಮತ್ತು ಹಿಂದಿ ಚಿತ್ರಗಳಲ್ಲಿ ಬಿಜಿಯಾಗಿದ್ದಾರೆ.

ಈ ವರ್ಷ "ಕುಚ್​ ಮೀಠಾ ಹೋ ಜಾಯೇ' ಮತ್ತು "ಔರೋ ಮೇ ಕಹಾ ದಮ್​ ಥಾ' ಸಿನಿಮಾಗಳಲ್ಲಿ ಕಾಣಿಸಿಕೊಂಡಿರುವ ಅವರು, ಸದ್ಯ ತೆಲುಗು ನಟ ನಿಖಿಲ್​ ಸಿದ್ಧಾರ್ಥ್​ಗೆ ನಾಯಕಿಯಾಗಿ "ದ ಇಂಡಿಯಾ ಹೌಸ್​' ಎಂಬ ಪ್ಯಾನ್​ ಇಂಡಿಯಾ ಚಿತ್ರದಲ್ಲಿ ನಟಿಸುತ್ತಿದ್ದಾರೆ. "ಭೈರವಗೀತಾ' ಖ್ಯಾತಿಯ ರಾಮ್​ ವಂಶಿ ಕೃಷ್ಣ ಆ್ಯಕ್ಷನ್​-ಕಟ್​ ಹೇಳುತ್ತಿರುವ ಐತಿಹಾಸಿಕ ಸಿನಿಮಾ "ದ ಇಂಡಿಯಾ ಹೌಸ್​'.

1905ರಲ್ಲಿ ಲಂಡನ್​ನಲ್ಲಿ ನಡೆದ ಭಾರತದ ಸ್ವಾತಂತ್ರ್ಯ ಹೋರಾಟದ ಸುತ್ತ ಚಿತ್ರದ ಕಥೆ ಸಾಗುತ್ತದೆ. ಮಂಗಳವಾರ (ಡಿ. 24) 22ನೇ ಹುಟ್ಟುಹಬ್ಬ ಆಚರಿಸಿಕೊಂಡ ಸಾಯಿಗೆ ಚಿತ್ರತಂಡ ಪೋಸ್ಟರ್​ ಉಡುಗೊರೆ ನೀಡಿದ್ದು, ಅವರಿಲ್ಲಿ ಸತಿ ಎಂಬ ಪಾತ್ರದಲ್ಲಿ ನಟಿಸುತ್ತಿದ್ದಾರೆ.