ಏಳುಮಲೆಯಲ್ಲಿ ಎದೆ ನಡುಗಿಸಿದ ಪ್ರೇಮಕಥೆ; ಮೂರು ಭಾಷೆಗಳಲ್ಲಿ ಮೂಡಿಬರಲಿದೆ ಪುನೀತ್​ ರಂಗಸ್ವಾಮಿ ಚೊಚ್ಚಲ ಚಿತ್ರ

ವಿಜಯವಾಣಿ ಸುದ್ದಿಜಾಲ ಬೆಂಗಳೂರು:

ತರುಣ್​ ಸುಧೀರ್​ ನಿರ್ದೇಶಿಸಿದ್ದ, ದರ್ಶನ್​ ನಟಿಸಿದ್ದ "ಕಾಟೇರ' ಚಿತ್ರ ಕಳೆದ ಡಿ. 29ರಂದು ರಿಲೀಸ್​ಆಗಿ ಬಾಕ್ಸಾಫಿಸಿನಲ್ಲಿ ಭರ್ಜರಿ ಗಳಿಕೆ ಮಾಡಿಕೊಂಡಿತ್ತು. ಆ ಬಳಿಕ ನಟ ದರ್ಶನ್​ ಜತೆ ತರುಣ್​ ಸುಧೀರ್​ ಕಳೆದ ಫೆ. 16ರಂದು "ವೀರ ಸಿಂಧೂರ ಲಕ್ಷ್ಮಣ' ಬಯೋಪಿಕ್​ ಘೋಷಿಸಿದ್ದರು. ಆದರೆ, ಆ ನಂತರ ನಡೆದ ಘಟನಾವಳಿಗಳಿಂದಾಗಿ ನಟ ದರ್ಶನ್​ ಕೆಲ ತಿಂಗಳಿನಿಂದ ನಟನೆಯಿಂದ ದೂರವಾಗಿದ್ದಾರೆ. ಹೀಗಾಗಿ ನಿರ್ದೇಶಕ ತರುಣ್​ ಸುಧೀರ್​ ಇದೀಗ ನಿರ್ಮಾಣದತ್ತ ಗಮನ ಹರಿಸಿದ್ದು, ಗುರುವಾರ ಹೊಸ ಸಿನಿಮಾ ಘೋಷಿಸಿದ್ದಾರೆ. 2022ರಲ್ಲಿ ಜಡೇಶ್​ ಹಂಪಿ ನಿರ್ದೇಶಿಸಿದ್ದ "ಗುರು ಶಿಷ್ಯರು' ನಿರ್ಮಿಸಿದ್ದ ತರುಣ್​, ಈಗ "ಪ್ರೊಡಕ್ಷನ್​ ನಂ. 2' ಅನೌನ್ಸ್​ ಮಾಡಿದ್ದು, ಅವರ ಜತೆ ಅಟ್ಲಾಂಟಾ ನಾಗೇಂದ್ರ ಕೈ ಜೋಡಿಸಿದ್ದಾರೆ. ಪುನೀತ್​ ಗುರುಸ್ವಾಮಿ ಈ ಚಿತ್ರಕ್ಕೆ ಆ್ಯಕ್ಷನ್-ಕಟ್​ ಹೇಳಲಿದ್ದು, ಕನ್ನಡದ ಜತೆ ತಮಿಳು, ತೆಲುಗು ಭಾಷೆಗಳಲ್ಲೂ ಈ ಸಿನಿಮಾ ಮೂಡಿಬರಲಿದೆ. ಚಿತ್ರದ ಬಗ್ಗೆ ತರುಣ್​, ""ಕಾಟೇರ' ಚಿತ್ರದಲ್ಲಿ ಪುನೀತ್​ ಸಹ&ನಿರ್ದೇಶಕನಾಗಿ ಕೆಲಸ ಮಾಡಿದ್ದರು. ಆ ಸಮಯದಲ್ಲೇ ನನಗೆ ಈ ಕಥೆ ಹೇಳಿದ್ದರು. ಆಗಿನಿಂದಲೂ ಕಥೆಯ ಬಗ್ಗೆ ಚರ್ಚಿಸುತ್ತಿದ್ದೆವು. ಬೇರೆ ಭಾಷೆಗಳಲ್ಲೂ ಜನರಿಗೆ ರೀಚ್​ ಆಗುವ ಗಟ್ಟಿತನವಿರುವ ಕಥೆ ಅಂತನ್ನಿಸಿತು. ಹೀಗಾಗಿ ಮೂರು ಭಾಷೆಗಳಲ್ಲಿ ಸಿನಿಮಾ ರಿಲೀಸ್​ ಮಾಡಲಿದ್ದೇವೆ' ಎನ್ನುತ್ತಾರೆ.

ನೈಜ ಟನೆಯಾಧಾರಿತ ಚಿತ್ರ:

ಇದು ಕರ್ನಾಟಕ ಮತ್ತು ತಮಿಳುನಾಡು ಗಡಿಯಲ್ಲಿ ನಡೆದ ನೈಜ ಘಟನೆಯಾಧಾರಿತ ಸಿನಿಮಾ ಆಗಿದ್ದು, "2000ರಲ್ಲಿ ಮಲೆಮಹದೇಶ್ವರದಲ್ಲಿ ನಡೆದ ಇಂಟೆನ್ಸ್​ ಲವ್​ಸ್ಟೋರಿ. ಬಹುತೇಕರಿಗೆ ಗೊತ್ತಿರುವ ನೈಜ ಟನೆಯಾದರೂ, ಅದರ ಹಿಂದೆ ನಡೆದ ಹಲವು ಥ್ರಿಲ್ಲಿಂಗ್​ ಅಂಶಗಳು ಚಿತ್ರದಲ್ಲಿರಲಿವೆ. ಇದೇ ತಿಂಗಳ 25ರಿಂದ ಶೂಟಿಂಗ್​ ಪ್ರಾರಂಭಿಸಲಿದ್ದೇವೆ. ಸದ್ಯಕ್ಕೆ ಶೀರ್ಷಿಕೆ ಅಂತಿಮವಾಗಿಲ್ಲ. ಹೀಗಾಗಿ ಸಂಕ್ರಾಂತಿಗೆ ಹಬ್ಬಕ್ಕೆ ಟೈಟಲ್​ ಅನೌನ್ಸ್​ ಮಾಡುವ ಪ್ಲ್ಯಾನ್​ ಇದೆ. ಮುಂದಿನ ವರ್ಷದ ಮೊದರ್ಲಧದಲ್ಲೇ ಚಿತ್ರ ರಿಲೀಸ್​ ಮಾಡಲು ಯೋಜಿಸಿದ್ದೇವೆ' ಎಂದು ಮಾಹಿತಿ ನೀಡುತ್ತಾರೆ ತರುಣ್​ ಸುಧೀರ್​.

ಸಿಂಧೂರ ಲಕ್ಷ್ಮಣ ಬಯೋಪಿಕ್​ ಯಾವಾಗ?

"ಕಾಟೇರ' ಯಶಸ್ಸಿನ ಬೆನ್ನಲ್ಲೇ ದರ್ಶನ್​ ಮತ್ತು ತರುಣ್​ ಸುಧೀರ್​ ಕಾಂಬಿನೇಷನ್​ನಲ್ಲಿ ಘೋಷಣೆಯಾಗಿದ್ದ "ವೀರ ಸಿಂಧೂರ ಲಕ್ಷ್ಮಣ' ಬಯೋಪಿಕ್​ ಬಗ್ಗೆ ಕುತೂಹಲ, ನಿರೀಕ್ಷೆಗಳು ಹೆಚ್ಚಿದ್ದವು. ಆದರೆ, ರೇಣುಕಾಸ್ವಾಮಿ ಕೊಲೆ ಪ್ರಕರಣದ ಸಂಬಂಧ ಸದ್ಯ ಅನಾರೋಗ್ಯದಿಂದಾಗಿ ಬೇಲ್​ ಪಡೆದಿರುವ ದರ್ಶನ್​ ಚಿಕಿತ್ಸೆ ಪಡೆಯುತ್ತಿದ್ದಾರೆ. ಇದರಿಂದಾಗಿ ಪ್ರಕಾಶ್​ ವೀರ್​ ನಿರ್ದೇಶಿಸುತ್ತಿರುವ "ಡೆವಿಲ್​' ಚಿತ್ರೀಕರಣ ಸ್ಥಗಿತಗೊಂಡಿದ್ದು, ಸಿಂಧೂರ ಲಕ್ಷ್ಮಣ ಕೂಡ ತಡವಾಗಿದೆ. ಈ ಬಗ್ಗೆ ತರುಣ್​, "ಸಿಂಧೂರ ಲಕ್ಷ್ಮಣ ಕಥೆ ರೆಡಿಯಿದೆ. ಆದರೆ, ಸಿನಿಮಾ ಯಾವಾಗ ಪ್ರಾರಂಭಿಸಬೇಕು ಎಂಬುದರ ಬಗ್ಗೆ ಯಾವುದೇ ನಿರ್ಧಾರ ತೆಗೆದುಕೊಂಡಿಲ್ಲ' ಎನ್ನುತ್ತಾರೆ.