'ನಿಮಗೊಂದು ಸಿಹಿ ಸುದ್ದಿ' ಕೊಟ್ಟ ಕಾವ್ಯಾ

ಬೆಂಗಳೂರು: ಕರೊನಾ ಲಾಕ್​ಡೌನ್​ನಿಂದ ಓವರ್ ದಿ ಟಾಪ್​ಗೆ (ಓಟಿಟಿ) ಸಾಕಷ್ಟು ಬೇಡಿಕೆ ಬಂದಿದೆ..ಸಾಲು ಸಾಲು ಸಿನಿಮಾಗಳು ಮತ್ತು ವೆಬ್​ಸಿರೀಸ್​ಗಳು ಅನೇಕ ಓಟಿಟಿಯಲ್ಲಿ ಬಿಡುಗಡೆಯಾಗುತ್ತಿವೆ. ಇದೀಗ ಕನ್ನಡದಲ್ಲಿಯೇ ಇನ್ನೊಂದು ಹೊಸ ವೆಬ್​ಸಿರೀಸ್ ಸೆಟ್ಟೇರಿದ್ದು, ಓಟಿಟಿಗಾಗಿಯೇ ತಯಾರಾಗುತ್ತಿದೆ. ಅದೇ ‘ನಿಮಗೊಂದು ಸಿಹಿಸುದ್ದಿ’.

ಪುರುಷ ಗರ್ಭಧಾರಣೆಯನ್ನೇ ಮುಖ್ಯ ವಿಷಯವಾಗಿಟ್ಟುಕೊಂಡು, ಅದನ್ನೇ ವೆಬ್​ಸಿರೀಸ್ ರೂಪದಲ್ಲಿ ನಿರ್ದೇಶಕ ಸುಧೀಂದ್ರ ನಾಡಿಗೇರ್ ತೆರೆಗೆ ತರುತ್ತಿದ್ದಾರೆ. ರಘು ಭಟ್ ಕಥೆ ಬರೆಯುವುದರ ಜತೆಗೆ ಮುಖ್ಯಭೂಮಿಕೆಯಲ್ಲಿಯೂ ನಟಿಸಲಿದ್ದಾರೆ. ನಾಯಕಿಯಾಗಿ ಕಾವ್ಯಾ ಶೆಟ್ಟಿ ನಟಿಸಲಿದ್ದು, ವೆಬ್​ಸರಣಿಯ ಪರಿಕಲ್ಪನೆ ಕೇಳಿ ಅಚ್ಚರಿಯಲ್ಲಿಯೇ ನಟಿಸಲು ಒಪ್ಪಿಕೊಂಡಿದ್ದಾರಂತೆ.

‘ಈ ಹಿಂದೆ ವೆಬ್​ಸರಣಿಯ ಹಲವು ಅವಕಾಶಗಳು ಬಂದಿದ್ದವು. ಆದರೆ, ಅದ್ಯಾವುದಕ್ಕೂ ನಾನು ಒಪ್ಪಿಗೆ ಸೂಚಿಸಿರಲಿಲ್ಲ. ಆದರೆ, ಈ ಕಾನ್ಸೆಪ್ಟ್ ಕೇಳುತ್ತಿದ್ದಂತೆಯೇ ತಕ್ಷಣ ಒಪ್ಪಿಕೊಂಡೆ. ಕಥೆಯೂ ವಿಚಿತ್ರವಾಗಿದೆ. ಪುರುಷ ಗರ್ಭಧಾರಣೆ ಕುರಿತ ಕಥೆ ಆಗಿರುವುದರಿಂದ ನೋಡುಗರಿಗೂ ಸಖತ್ ಕುತೂಹಲ ಮೂಡಿಸಲಿದೆ. ಸೆಪ್ಟೆಂಬರ್ 15ರ ನಂತರ ಚಿತ್ರೀಕರಣದಲ್ಲಿ ಪಾಲ್ಗೊಳ್ಳಲಿದ್ದೇನೆ’ ಎಂದು ಮಾಹಿತಿ ನೀಡುತ್ತಾರೆ ಕಾವ್ಯಾ.

ಅಂದಹಾಗೆ, ಒಟ್ಟು 9 ಎಪಿಸೋಡ್​ಗಳಿರುವ ಈ ವೆಬ್​ಸರಣಿಯಲ್ಲಿ ಪ್ರತಿ ಕಂತು 30 ನಿಮಿಷ ಇರಲಿದೆ. ಸೆಪ್ಟೆಂಬರ್ 15ರಿಂದ 30 ದಿನ ಶೂಟಿಂಗ್ ನಡೆಯಲಿದ್ದು, ವರ್ಷಾಂತ್ಯಕ್ಕೆ ಪ್ರದರ್ಶನ ಕಾಣಲಿದೆ. ವಿಶೇಷ ಏನೆಂದರೆ, ಈ ವೆಬ್​ಸರಣಿ ಮುಂದಿನ ದಿನಗಳಲ್ಲಿ ಸೀಸನ್ ರೂಪದಲ್ಲಿಯೂ ತಯಾರಾಗಲಿದೆಯಂತೆ.