5 ರೂ. ವೈದ್ಯರ ಪಾತ್ರದಲ್ಲಿ ರಜಿನಿ? 'ತಲೈವಾ' ಮುಂದಿನ ಚಿತ್ರಕ್ಕೆ ಕರ್ನಾಟಕ ಡಾಕ್ಟರ್​ ಕಥೆಯೇ ಜೀವಾಳ?

Thalaivar173: ತಮಿಳಿನ ಸೂಪರ್‌ಸ್ಟಾರ್ ರಜನಿಕಾಂತ್ ಪ್ರಸ್ತುತ ಬಹುನಿರೀಕ್ಷಿತ 'ಜೈಲರ್ 2' ಚಿತ್ರದ ಕೆಲಸಗಳಲ್ಲಿ ಸಖತ್​ ಬಿಜಿಯಾಗಿದ್ದಾರೆ. ಸಾಕಷ್ಟು ಬಾರಿ ವಿಳಂಬಗಳನ್ನು ಎದುರಿಸುತ್ತಿರುವ ಈ ಚಿತ್ರದ ಒಂದಷ್ಟು ಭಾಗಗಳನ್ನು ಮತ್ತೆ ರೀ-ಶೂಟ್​ ಮಾಡಲಾಗುತ್ತಿದೆ. ಹೀಗಾಗಿ, ರಿಲೀಸ್​ ದಿನಾಂಕ ಇನ್ನೂ ಸ್ಪಷ್ಟವಾಗಿಲ್ಲ. ಈ ಮಧ್ಯೆ, ರಜಿನಿ ಅವರ ಮುಂಬರುವ ಸಿನಿಮಾದ ಕಥೆಯ ಎಳೆಯೊಂದು ಸದ್ಯ ಅಭಿಮಾನಿಗಳ ಕುತೂಹಲ ಕೆರಳಿಸಿದೆ.

ತಾತ್ಕಾಲಿಕವಾಗಿ 'ತಲೈವರ್ 173' ಎಂದು ಶೀರ್ಷಿಕೆ ಹೊಂದಿರುವ ಈ ಚಿತ್ರವನ್ನು ಆರಂಭದಲ್ಲಿ ಸುಂದರ್.ಸಿ ನಿರ್ದೇಶಿಸಲು ಮುಂದಾಗಿದ್ದರು. ಆದರೆ, ನಂತರ ಅವರು ಪ್ರಾಜೆಕ್ಟ್​ನಿಂದ ಹೊರನಡೆದರು. ಆ ನಂತರ ಸಿ.ಬಿ. ಚಕ್ರವರ್ತಿ ಅವರನ್ನು ಆಯ್ಕೆ ಮಾಡಲಾಯಿತು. ಆದರೆ, ಅವರೂ ಸಹ ಮುಂದುವರಿಯಲಿಲ್ಲ. ಆದರೀಗ, ಪ್ರದೀಪ್ ರಂಗನಾಥನ್ ನಟಿಸಿದ ಸೂಪರ್​​ಹಿಟ್​ 'ಡ್ರ್ಯಾಗನ್' ಚಿತ್ರವನ್ನು ನಿರ್ದೇಶಿಸಿದ ಅಶ್ವಥ್ ಮಾರಿಮುತ್ತು, ರಜಿನಿ ಅವರ ಚಿತ್ರವನ್ನು ನಿರ್ದೇಶಿಸುವ ಜವಾಬ್ದಾರಿಯನ್ನು ಹೊತ್ತುಕೊಂಡಿದ್ದಾರೆ ಎಂಬ ವರದಿಗಳಿವೆ.

ವಿಶೇಷವೆಂದರೆ, ಈ ಚಿತ್ರದಲ್ಲಿ ಪ್ರಪ್ರಥಮ ಬಾರಿಗೆ ರಜಿನಿಕಾಂತ್ ಅವರು ತಮ್ಮ ಸಿನಿ ಬದುಕಿನಲ್ಲಿ ವೈದ್ಯರ ಪಾತ್ರದಲ್ಲಿ ನಟಿಸಲಿದ್ದು, 5 ರೂ. ಫೀಜ್​ ಪಡೆಯುವ ವೈದ್ಯನ ಪಾತ್ರವನ್ನು ನಿರ್ವಹಿಸಲಿದ್ದಾರೆ ಎನ್ನಲಾಗಿದೆ. ತೆಲುಗು ಸಿನಿಮಾ ವರದಿ ಪ್ರಕಾರ, ಚಿತ್ರದ ಕಥೆಯು ಕರ್ನಾಟಕದ ಮಂಡ್ಯ ಜಿಲ್ಲೆಯ ಖ್ಯಾತಿಯ ಐದು ರೂ. ವೈದ್ಯರಿಂದ ಸ್ಫೂರ್ತಿ ಪಡೆದಿದೆ ಎಂದು ಹೇಳಲಾಗಿದೆ. ಆದ್ರೆ, ಖಚಿತವಾಗಿ ಅವರೇ ಜೀವನವನ್ನೇ ಇಲ್ಲಿ ತರಲಾಗಿದೆ ಎಂಬುದು ಇನ್ನೂ ಅಸ್ಪಷ್ಟ.

ಚಿತ್ರವನ್ನು ರಾಜ್ ಕಮಲ್ ಫಿಲ್ಮ್ಸ್ ಇಂಟರ್ನ್ಯಾಷನಲ್ ಬ್ಯಾನರ್ ಅಡಿಯಲ್ಲಿ ಕಮಲ್ ಹಾಸನ್ ನಿರ್ಮಿಸುವ ನಿರೀಕ್ಷೆಯಿದ್ದು, ಪೂರ್ಣ ಪ್ರಮಾಣದಲ್ಲಿ ವೈದ್ಯರಾಗಿ ರಜಿನಿ ಹೇಗೆ ತೆರೆಯಲ್ಲಿ ಕಾಣಿಸಿಕೊಳ್ಳಬಹುದು? ಅವರ ಪಾತ್ರ ಹೇಗಿರಲಿದೆ? ಎಂಬ ಕುತೂಹಲ ಸದ್ಯ ಸಿನಿಪ್ರಿಯರು ಮತ್ತು ಅಭಿಮಾನಿಗಳಲ್ಲಿ ಕಾಡತೊಡಗಿದೆ. ಈ ಚಿತ್ರದ ಬಗ್ಗೆ ಇನ್ನಷ್ಟು ಹೆಚ್ಚಿನ ಅಪ್ಡೇಟ್​ಗಳು ಶೀಘ್ರವೇ ಹೊರಬೀಳಲಿದೆ,(ಏಜೆನ್ಸೀಸ್).