KAPATI Review; ಡಾರ್ಕ್​ವೆಬ್​ ಎಂಬ ಭೂಗತಲೋಕ

ಚಿತ್ರ: ಕಪಟಿ

ನಿರ್ದೇಶನ: ರವಿಕಿರಣ್​, ಚೇತನ್​

ನಿರ್ಮಾಣ: ದಯಾಳ್​ ಪದ್ಮನಾಭನ್​

ತಾರಾಗಣ: ಸುಕೃತಾ ವಾಗ್ಲೆ, ದೇವ್​ ದೇವಯ್ಯ, ಸಾತ್ವಿಕ್​ ಕೃಷ್ಣನ್​, ಪವನ್​, ಅಜಿತ್​ ಮತ್ತಿತರರು.

ಹರ್ಷವರ್ಧನ್​ ಬ್ಯಾಡನೂರು

ತಂತ್ರಜ್ಞಾನ ಮುಂದುವರಿದಂತೆ, ಅದರಿಂದ ಉಪಯೋಗವೂ ಹೆಚ್ಚು, ದುರುಪಯೋಗವೂ ಹೆಚ್ಚು. ಅದಕ್ಕೆ ಉದಾಹರಣೆ ಇಂರ್ಟನೆಟ್​. ಜಗತ್ತನೇ ಮುಷ್ಠಿಯಲ್ಲಿ ಹಿಡಿಯುವಂತೆ ಮಾಡಿದ ಈ ಅಂತರ್ಜಾಲ, ಜನರ ಸುತ್ತ ಮಾಯಾಜಾಲ ಹೆಣೆದು ಕೂಡಿಹಾಕಿದೆ. ಅದರಲ್ಲೂ ಡಾರ್ಕ್​ವೆಬ್​ನಲ್ಲಿ ಎಂಬ ಕರಾಳ ಲೋಕವನ್ನು ಸೃಷ್ಟಿಸಿ, ಕೂತ ಜಾಗದಿಂದಲೇ ಅಮಾಯಕ ಜನರನ್ನು ಲೂಟಿ ಮಾಡುತ್ತಿದ್ದಾರೆ. ಪ್ರತಿದಿನ ನೂರಾರು ಪ್ರಕರಣಗಳು ಬೆಳಕಿಗೆ ಬರುತ್ತಿದ್ದರೂ, ಮೋಸ ಮಾಡುವವರೂ ಕಡಿಮೆಯಾಗಿಲ್ಲ, ಮೋಸ ಹೋಗುವವರೂ ಕಡಿಮೆಯಾಗಿಲ್ಲ. ಇಂತಹ ಡಾರ್ಕ್​ವೆಬ್​ ಸುತ್ತ ಸುತ್ತುವ ಕಥೆಯೇ "ಕಪಟಿ'.

ಪ್ರಿಯಾ (ಸುಕೃತಾ) ಹೆಸರಾಂತ ವಸ್ತ್ರವಿನ್ಯಾಸಕಿ. ತಮ್ಮ ಬಿದ್ದು ಪೆಟ್ಟು ಮಾಡಿಕೊಂಡು ಹಾಸಿಗೆ ಹಿಡಿದಿದ್ದರೆ, ತಂದೆ ಅದೇ ನೋವಿನಲ್ಲಿ ಕುಡಿತಕ್ಕೆ ದಾಸರಾಗಿರುತ್ತಾರೆ. ಹೊಸ ಜಾಗಕ್ಕೆ ಶ್ಟ್​ಿ ಆದರೆ ಏನಾದರೂ ಬದಲಾವಣೆ ಆಗಬಹುದೆಂಬ ಕಾರಣಕ್ಕೆ, ಕುಟುಂಬದ ಜತೆ ಪ್ರಿಯಾ ಹೊಸ ಮನೆಗೆ ಶಿಫ್ಟ್​ ಆಗುತ್ತಾಳೆ. ಅಲ್ಲಿ ಆಕೆಗೆ ವಿಚಿತ್ರ ಅನುಭವಗಳು ಆಗತೊಡಗುತ್ತವೆ. ಅದಕ್ಕೆ ಕಾರಣ ಹುಡುಕಲು ಹೋದರೆ, ಅಲ್ಲಿ ಡಾರ್ಕ್​ವೆಬ್​ನ ಕರಾಳ ಲೋಕದ ಅನಾವರಣವಾಗುತ್ತದೆ. ಆನ್​ಲೈನ್​ ವಂಚನೆಯಿಂದ ಹಿಡಿದು ಡಾರ್ಕ್​ವೆಬ್​ ಎಂಬ ಭೂಗತ ಜಗತ್ತನ್ನು ಎಳೆಎಳೆಯಾಗಿ ರವಿಕಿರಣ್​ ಮತ್ತು ಚೇತನ್​ "ಕಪಟಿ' ಮೂಲಕ ತೆರೆದಿಟ್ಟಿದ್ದಾರೆ.

ಹೊರಗೆ ಅಂಡರ್​ವರ್ಲ್ಡ್​ ಇರುವಂತೆಯೇ ಇಂಟರ್​ನೆಟ್​ನಲ್ಲೂ ಒಂದು ಅಂಡರ್​ವರ್ಲ್ಡ್​ ಇದ್ದು, ಅದು ಹೇಗೆ ಕೆಲಸ ಮಾಡುತ್ತದೆ? ಎಂಬುದನ್ನು ಇಲ್ಲಿ ನೋಡಬಹುದು. ಕೆಲವೆಡೆ ಟ್ವಿಸ್ಟ್​ಗಳಿದ್ದರೂ, ಚಿತ್ರಕಥೆಗೆ ಸ್ವಲ್ಪ ವೇಗ ನೀಡಿದ್ದರೆ ಪ್ರೇಕ್ಷಕರನ್ನು ಸೀಟಂಚಲ್ಲಿ ಕೂರಿಸುವ ಅವಕಾಶವಿತ್ತು. ಮಾನಸಿಕ ಖಿನ್ನತೆಗೆ ಒಳಗಾದ ಪ್ರಿಯಾ ಪಾತ್ರದಲ್ಲಿ ಸುಕೃತಾ, ಅಮೆರಿಕದಲ್ಲಿ ನರ್ಸಿಂಗ್​ ಓದಿ ಬಂದು ಆನ್​ಲೈನ್​ನಲ್ಲಿ ಕಳ್ಳಾಟವಾಡುವ ಸುಮನ್​ ಆಗಿ ದೇವ್​ ದೇವಯ್ಯ, ಪುಡಿರೌಡಿ ಚಕ್ರಿ ಅಲಿಯಾಸ್​ ಜುಟ್ಟು ಪಾತ್ರದಲ್ಲಿ ಸಾತ್ವಿಕ್​ ಕೃಷ್ಣನ್​ ಪಾತ್ರಗಳನ್ನು ಅಚ್ಚುಕಟ್ಟಾಗಿ ನಿಭಾಯಿಸಿದ್ದಾರೆ.