ಡಾಲಿಯೇ ಬೇರೆ, ಸೀನನೇ ಬೇರೆ: ‘ಟಗರು’ ಚಿತ್ರದಲ್ಲಿ ಧನಂಜಯ ಪಾತ್ರ ನೋಡಿ ಇಡೀ ಕರುನಾಡೇ ಫಿದಾ ಆಗಿತ್ತು. ಈಗ ಅದೇ ಸೂರಿ ನಿರ್ದೇಶನದ ‘ಪಾಪ್ಕಾರ್ನ್ ಮಂಕಿ ಟೈಗರ್’ನಲ್ಲಿ ಮಂಕಿ ಸೀನನನ್ನೂ ಡಿಸೈನ್ ಮಾಡಿದ್ದಾರಂತೆ ಸೂರಿ. ‘ ಡಾಲಿಗೂ, ಮಂಕಿ ಸೀನನಿಗೂ ಸಂಬಂಧ ಇಲ್ಲ. ಇಬ್ಬರದ್ದು ಬೇರೆಯದೇ ಮನಸ್ಥಿತಿ. ಅಲ್ಲಿ ಕ್ರೖೆಂ ಲೋಕದ ನಂಟಿತ್ತು. ಇಲ್ಲಿ ಅದರ ಜತೆಗೆ ಫಿಲಾಸಫಿಕಲ್ ಜರ್ನಿಯನ್ನೂ ಬೆರೆಸಲಾಗಿದೆ. ನೋಡಿರುವ ಬದುಕಿಗೆ ಒಂದಷ್ಟು ಕನ್ನಡಿ ಹಿಡಿಯಲಾಗಿದೆ. ಸಂಬಂಧಗಳ ಮೌಲ್ಯಗಳ ಸುತ್ತ ಸಿನಿಮಾ ಸಾಗಲಿದೆ’ ಎನ್ನುವ ಧನು, ಸೀನನ ಪಾತ್ರದ ಬಗ್ಗೆಯೂ ವಿವರಿಸುತ್ತಾರೆ. ‘ಸೀನ ಪಾತ್ರದಲ್ಲಿ ಆರೇಳು ವರ್ಷದ ಜರ್ನಿ ಇದೆ. ಕೆಲವೊಂದಿಷ್ಟು ಏರುಪೇರುಗಳಿವೆ, ಘಟ್ಟಗಳಿವೆ. ಟೈಗರ್ ಸೀನನಾಗಿ, ಮಂಕಿ ಸೀನ, ಪಾಪ್ಕಾರ್ನ್ ಸೀನ ಹೀಗೆ ಆತ ಬಂದು ಹೋಗುತ್ತಾನೆ. ಆತ ಕ್ರೂರಿ ಅಲ್ಲ. ಆತನ ಬದುಕಿನಲ್ಲಿ ಬಂದು ಹೋಗುವ ಘಟನಾವಳಿಗಳೂ ಆ ರೀತಿ ಕಾಣಿಸುತ್ತಿರುತ್ತವೆ’ ಎಂದು ಪಾತ್ರವಾದ ವಿವರ ಹೇಳಿಕೊಳ್ಳುತ್ತಾರೆ.
