ಖಾಸಗಿ ಬ್ಯಾಂಕ್ ಮ್ಯಾನೇಜರ್ ಆಗಿದ್ದ ಶನೀಲ್ ಗೌತಮ್, 2013ರಲ್ಲಿ ಸಿನಿಮಾ ಕನಸಿನ ಬೆನ್ನು ಹತ್ತಿ ಕೆಲಸಕ್ಕೆ ರಾಜೀನಾಮೆ ಕೊಟ್ಟು, ಆಡಿಷನ್ ಮೂಲಕ ರಾಜ್ ಬಿ. ಶೆಟ್ಟಿ ನಟಿಸಿ, ನಿರ್ದೇಶಿಸಿದ್ದ "ಒಂದು ಮೊಟ್ಟೆಯ ಕಥೆ' ತಂಡ ಸೇರಿದವರು. ನಂತರ ನಟನೆಯ ಜತೆಗೆ ಬರವಣಿಗೆ ಮತ್ತು ನಿರ್ದೇಶನ ವಿಭಾಗದಲ್ಲೂ ತೊಡಗಿಸಿಕೊಂಡಿರುವ ಅವರು "ಸರ್ಕಾರಿ ಹಿರಿಯ ಪ್ರಾಥಮಿಕ ಪಾಠಶಾಲೆ', "ಗರುಡ ಗಮನ ವೃಷಭ ವಾಹನ', "ಕಾಂತಾರ' ಮತ್ತು ಇದೀಗ "ಕಾಂತಾರ ಚಾಪ್ಟರ್ 1' ಚಿತ್ರದ ಸ್ಕ್ರಿಪ್ಟ್ನಲ್ಲೂ ಕೆಲಸ ಮಾಡಿದ್ದಾರೆ. ಶನೀಲ್ ಗುರು ಅಂತಿದ್ದ ಹೆಸರನ್ನು "ಸು ಫ್ರಮ್ ಸೋ' ಚಿತ್ರದಲ್ಲೇ ಶನೀಲ್ ಗೌತಮ್ ಎಂದು ಬದಲಿಸಿಕೊಂಡ ಅವರು, 2023ರ ಆಗಸ್ಟ್ನಲ್ಲಿ ಗೃಹಸ್ತಾಶ್ರಮ ಪ್ರವೇಶಿಸಿದ್ದಾರೆ. "ಹೆಸರು ಬದಲಿಸಿದ ಪರಿಣಾಮವೋ, ಮನೆಗೆ ಮಡದಿ ಬಂದ ಕಾಲ್ಗುಣವೋ ಗೊತ್ತಿಲ್ಲ. ಆದರೆ, ಕಾಕತಾಳಿಯ ಎಂಬಂತೆ ಈ ಯಶಸ್ಸು ದೊರೆತಿರುವುದು ತುಂಬ ಖುಷಿ ನೀಡಿದೆ. ನನ್ನ ಪಾತ್ರದ ಸಂಪೂರ್ಣ ಕ್ರೆಡಿಟ್ ನಿರ್ದೇಶಕ ಜೆಪಿ ತುಮಿನಾಡ್ಗೆ ಸಲ್ಲುತ್ತದೆ. ಪಾತ್ರದ ಬಗ್ಗೆ ತಿಳಿದು, ನಾನು ಸಿದ್ಧತೆ ನಡೆಸುತ್ತಿದ್ದೆ. ಆದರೆ, ಯಾವಾಗ ವರ್ಕ್ಶಾಪ್ ಪ್ರಾರಂಭವಾಯಿತೋ ಎಲ್ಲ ಸಿದ್ಧತೆಗಳೂ ಠುಸ್ ಆದವು. ಏಕೆಂದರೆ ಜೆಪಿಗೆ ರವಿ ಅಣ್ಣ ಪಾತ್ರ ಹೀಗೇ ಇರಬೇಕು ಎಂಬ ಸ್ಪಷ್ಟತೆ ಇತ್ತು. ಅವರು ನನ್ನಿಂದ ಮಾಡಿಸಿದ್ದು ಇವತ್ತು ಇಷ್ಟು ದೊಡ್ಡ ಮಟ್ಟದಲ್ಲಿ ಜನರು ಗುರುತಿಸುವಂತಾಗಿದೆ. ನಾನು ನಿರ್ದೇಶಕರ ಮಗು, ಸ್ಪಷ್ಟತೆ ಇರುವ ನಿರ್ದೇಶಕರು ಸಿಕ್ಕರೆ ನನ್ನನ್ನು ಹೇಗೆ ಬೇಕಾದರೂ ಮೌಲ್ಡ್ ಮಾಡಬಹುದು' ಎಂದು ಹೇಳಿಕೊಳ್ಳುತ್ತಾರೆ.
