ಬಾಲಿವುಡ್ ಬೆಡಗಿ ಶ್ರೀದೇವಿ ಎಲ್ಲರನ್ನೂ ಅಗಲಿ ಫೆ. 24ಕ್ಕೆ ಭರ್ತಿ ಎರಡು ವರ್ಷ. ಹೀಗಾಗಿ ಶ್ರೀದೇವಿ ಈಗ ಮತ್ತೆ ಸುದ್ದಿಯಲ್ಲಿದ್ದಾರೆ. ವಿಶೇಷವೆಂದರೆ ಅವರ ಅಭಿನಯದ ಯಶಸ್ವಿ ಸಿನಿಮಾ, 1987ರಲ್ಲಿ ತೆರೆ ಕಂಡಿದ್ದ ‘ಮಿಸ್ಟರ್ ಇಂಡಿಯಾ’ ಕೂಡ ಇದೇ ಸಂದರ್ಭದಲ್ಲಿ ಸದ್ದು ಮಾಡುತ್ತಿದೆ. ಒಟ್ಟಿನಲ್ಲಿ ‘ಮಿಸ್ಟರ್ ಇಂಡಿಯಾ’ ಹಾಗೂ ಶ್ರೀದೇವಿ ಹೆಸರು ಎರಡೂ ಒಟ್ಟೊಟ್ಟಿಗೇ ಕೇಳಿ ಬರುತ್ತಿದ್ದು, ಬಾಲಿವುಡ್ನಲ್ಲಿ ಇದೀಗ ಚರ್ಚೆಗೆ ಈಡಾಗಿದೆ. ಅಂದಹಾಗೆ ಇಷ್ಟಕ್ಕೆಲ್ಲ ಕಾರಣ, ‘ಮಿಸ್ಟರ್ ಇಂಡಿಯಾ 2’. ಹಾಗಂತ ಅದ್ಯಾರು ಎಂದು ಅಚ್ಚರಿ ಪಡಬೇಕಾಗಿಲ್ಲ. ‘ಮಿಸ್ಟರ್ ಇಂಡಿಯಾ 2’ ಬೇರಾರೂ ಅಲ್ಲ, ‘ಮಿಸ್ಟರ್ ಇಂಡಿಯಾ’ ಸಿನಿಮಾದ ಸೀಕ್ವೆಲ್. ಹೌದು.. ‘ಮಿ. ಇಂಡಿಯಾ’ ಸಿನಿಮಾದ ಸೀಕ್ವೆಲ್ ಮಾಡುವುದಾಗಿ ನಿರ್ದೇಶಕ ಅಲಿ ಅಬ್ಬಾಸ್ ಜಫರ್ ಘೋಷಣೆ ಮಾಡಿಕೊಂಡಿರುವುದೇ ಸದ್ಯದ ಚರ್ಚೆಗೆ ಕಾರಣ. ಈ ಹಿನ್ನೆಲೆಯಲ್ಲಿ ಶ್ರೀದೇವಿ ಅವರ ಹಳೇ ಸಂದರ್ಶನದ ವಿಚಾರ ಕೂಡ ವೈರಲ್ ಆಗಿದ್ದು, ಅವರ ಇಚ್ಛೆಗೆ ವಿರುದ್ಧವಾಗಿ ಸೀಕ್ವೆಲ್ ನಿರ್ಮಾಣ ಆಗುತ್ತಿದೆ ಎಂಬ ಅಸಮಾಧಾನವೂ ವ್ಯಕ್ತವಾಗಿದೆ.
