ಆರ್​ಆರ್​ಆರ್ ತಂಡದಲ್ಲಿ ಶ್ರಿಯಾ; ಅಜಯ್ ದೇವಗನ್​ಗೆ ಜೋಡಿ

ದಕ್ಷಿಣ ಭಾರತೀಯ ಚಿತ್ರರಂಗದ ಖ್ಯಾತ ನಟಿ ಶ್ರಿಯಾ ಸರನ್ ಇದೀಗ ಎಸ್.ಎಸ್.ರಾಜಮೌಳಿ ನಿರ್ದೇಶನದ ಮತ್ತೊಂದು ಸಿನಿಮಾದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ಅವರು ಬಹುಭಾಷಾ ಚಿತ್ರ ‘ಆರ್​ಆರ್​ಆರ್’ನಲ್ಲಿ ಬಾಲಿವುಡ್ ನಟ ಅಜಯ್ ದೇವಗನ್​ಗೆ ಜತೆಯಾಗಿ ಅಭಿನಯಿಸಲಿದ್ದಾರೆ. ಹೀಗೊಂದು ಸುದ್ದಿ ಹರಿದಾಡಿ ಭಾರಿ ಸದ್ದು ಮಾಡುತ್ತಿದೆ.

ಅಜಯ್ ಅಭಿನಯಿಸುತ್ತಿರುವ ಪಾತ್ರಕ್ಕೆ ನಾಯಕಿ ಆಗಿ ಶ್ರಿಯಾ ಪರ್ಫೆಕ್ಟ್ ಮ್ಯಾಚ್ ಆಗುತ್ತಾರಂತೆ. ಹೀಗಾಗಿ ಅವರನ್ನು ನಿರ್ದೇಶಕ ರಾಜಮೌಳಿ ಆಯ್ಕೆ ಮಾಡಿದ್ದಾರೆ ಎಂದು ಹೇಳಲಾಗುತ್ತಿದೆ. ಆದರೆ ಈ ಬಗ್ಗೆ ಚಿತ್ರತಂಡದಿಂದ ಅಧಿಕೃತ ಮಾಹಿತಿ ಹೊರಬಿದ್ದಿಲ್ಲ. ಈ ಹಿಂದೆ ರಾಜಮೌಳಿ ನಿರ್ದೇಶನದ ‘ಛತ್ರಪತಿ’ ಸಿನಿಮಾದಲ್ಲಿ ಶ್ರಿಯಾ ಅಭಿನಯಿಸಿದ್ದರು.

ಪವರ್​ಸ್ಟಾರ್ ಪುನೀತ್ ರಾಜ್​ಕುಮಾರ್ ಅಭಿನಯದ ‘ಅರಸು’ ಚಿತ್ರದಲ್ಲಿ ಅತಿಥಿ ಪಾತ್ರದಲ್ಲಿ ಕಾಣಿಸಿಕೊಳ್ಳುವ ಮೂಲಕ ಸ್ಯಾಂಡಲ್​ವುಡ್​ಗೆ ಎಂಟ್ರಿ ಕೊಟ್ಟಿದ್ದ ಈ ಚೆಲುವೆ, ಬಳಿಕ ರೂಪಾ ಅಯ್ಯರ್ ನಿರ್ದೇಶನದ ‘ಚಂದ್ರ’ ಚಿತ್ರದಲ್ಲಿ ನಾಯಕಿಯ ಪಾತ್ರ ಮಾಡಿದ್ದರು.

ಪ್ಯಾನ್ ಇಂಡಿಯಾ ಸಿನಿಮಾ ಆಗಿರುವ ‘ಆರ್​ಆರ್​ಆರ್’, ಬ್ರಿಟಿಷ್ ಆಡಳಿತದಲ್ಲಿ ತೆಲುಗು ಬುಡಕಟ್ಟು ಸಮುದಾಯದ ಮುಖಂಡರಾಗಿದ್ದ ಅಲ್ಲೂರಿ ಸೀತಾರಾಮರಾಜು ಹಾಗೂ ಕೊಮರಾಮ್ ಭೀಮ್ ಅವರ ಕುರಿತ ಕಥೆ ಆಧಾರಿತ ಚಿತ್ರ. ರಾಮ್ರಣ್ ತೇಜ, ಜೂನಿಯರ್ ಎನ್​ಟಿಆರ್, ಆಲಿಯಾ ಭಟ್ ಸೇರಿ ವಿದೇಶಿ ಕಲಾವಿದರೂ ಚಿತ್ರದಲ್ಲಿ ಅಭಿನಯಿಸಿದ್ದಾರೆ.