ಮೂರೂವರೆ ದಶಕದ ಪಯಣವನ್ನು ಕಿರಿದಾಗಿ ನೆನಪಿಸಿಕೊಂಡರು. ‘ಶುಕ್ರವಾರಕ್ಕೆ ‘ಆನಂದ’ ಚಿತ್ರದ ಮುಹೂರ್ತವಾಗಿ 35 ವರ್ಷವಾಯ್ತು. ಆವತ್ತಿನ ಸಂದರ್ಭ ಹೇಗಿತ್ತು ಎಂಬುದು ಈಗಲೂ ನನಗೆ ನೆನಪಿದೆ. ಚಾಮುಂಡೇಶ್ವರಿ ಸ್ಟುಡಿಯೋದಲ್ಲಿ ಅದ್ದೂರಿ ಕಾರ್ಯಕ್ರಮ ನಡೆದಿತ್ತು. ಅಪ್ಪಾಜಿ, ಅಮ್ಮ, ಉದಯಶಂಕರ್ ಸೇರಿ ಹಲವರಿದ್ದರು. ಲಕ್ಷ್ಮಣ್ ರಾವ್ ಮೊದಲ ದೃಶ್ಯಕ್ಕೆ ಕ್ಲಾಪ್ ಮಾಡಿದ್ದರು. ಆಗ ತುಂಬ ಭಾವುಕನಾಗಿದ್ದೆ. ಯಾಕೆ ಕಣ್ಣೀರು ಬಂತು ಎಂಬುದು ನನಗೇ ತಿಳಿದಿರಲಿಲ್ಲ’ ಎನ್ನುವ ಶಿವಣ್ಣ, ಸೋಲು ಮತ್ತು ಗೆಲುವನ್ನೂ ತಮ್ಮದೇ ಧಾಟಿಯಲ್ಲಿ ವಿವರಿಸುತ್ತಾರೆ. ‘ಸೋಲು ಮತ್ತು ಗೆಲುವು ಎರಡನ್ನೂ ಒಂದೇ ರೀತಿಯಲ್ಲಿ ಸ್ವೀಕರಿಸಬೇಕು. ಏಕೆಂದರೆ, ಆ ಸೋಲಿಗೆ ಮತ್ತು ಗೆಲುವಿಗೆ ಕಾರಣಕರ್ತರು ನಾವೇ ಆಗಿರುತ್ತೇವೆ. ಹಾಗಾಗಿ ಪಾಸಿಟಿವ್ ಪ್ರತಿಕ್ರಿಯೆ ನಮ್ಮದಾಗಿರಬೇಕು’ ಎಂಬುದು ಅವರ ಮಾತು.
