ಬೆಂಗಳೂರು: ನಂದಕಿಶೋರ್ ನಿರ್ದೇಶನದ ‘ಪೊಗರು’ ಸಿನಿಮಾಕ್ಕೆ ಛಾಯಾಗ್ರಾಹಕರಾಗಿ ಕೆಲಸ ಮಾಡುತ್ತಿರುವ ವಿಜಯ್ ಮಿಲ್ಟನ್ ಸದ್ಯ ಸುದ್ದಿಯಲ್ಲಿದ್ದಾರೆ. ಅದಕ್ಕೆ ಕಾರಣ ಸೆಂಚುರಿ ಸ್ಟಾರ್ ಶಿವರಾಜ್ಕುಮಾರ್! ಹೌದು, ಶಿವಣ್ಣ ನಟನೆಯ 124ನೇ ಚಿತ್ರಕ್ಕೆ ವಿಜಯ್ ಮಿಲ್ಟನ್ ಆಕ್ಷನ್ ಕಟ್ ಹೇಳಲಿದ್ದಾರೆ ಎಂಬ ಸುದ್ದಿ ಸ್ಯಾಂಡಲ್ವುಡ್ನಲ್ಲಿ ಸದ್ದು ಮಾಡುತ್ತಿದೆ. ಸದ್ಯ ‘ಭಜರಂಗಿ 2’ ಮತ್ತು ರವಿ ಅರಸು ನಿರ್ದೇಶನದಲ್ಲಿ ತಯಾರಾಗಲಿರುವ ‘ಆರ್ಡಿಎಕ್ಸ್’ ಚಿತ್ರದಲ್ಲಿ ಶಿವಣ್ಣ ಬಿಜಿಯಾಗಿದ್ದು, ಈ ಎರಡು ಸಿನಿಮಾ ಕೆಲಸಗಳು ಮುಗಿಯುತ್ತಿದ್ದಂತೆ, ಮಿಲ್ಟನ್ ಜತೆ ಕೈ ಜೋಡಿಸಲಿದ್ದಾರಂತೆ. ಅಷ್ಟೇ ಅಲ್ಲ ‘ಟಗರು’ ಚಿತ್ರದಲ್ಲಿ ಶಿವಣ್ಣನೆದುರಿಗೆ ಖಳನಾಗಿ ಅಬ್ಬರಿಸಿದ್ದ ಡಾಲಿ ಧನಂಜಯ ಸಹ ಈ ಹೊಸ ಸಿನಿಮಾದಲ್ಲಿರಲಿದ್ದಾರಂತೆ. ಅಷ್ಟೇ ಅಲ್ಲ ಇನ್ನೋರ್ವ ನಾಯಕನ ಎಂಟ್ರಿಯೂ ಆಗಲಿದೆಯಂತೆ. ಈಗಾಗಲೇ ಶಿವರಾಜ್ಕುಮಾರ್ಗೆ ಚಿತ್ರದ ಪೂರ್ತಿ ಕಥೆಯನ್ನು ಹೇಳಿರುವ ಮಿಲ್ಟನ್, ಅವರಿಂದ ಹಸಿರು ನಿಶಾನೆಯನ್ನೂ ಗಿಟ್ಟಿಸಿಕೊಂಡಿದ್ದಾರಂತೆ. ಛಾಯಾಗ್ರಹಣದ ಜತೆಗೆ ನಿರ್ದೇಶಕನಾಗಿಯೂ ಮಿಲ್ಟನ್ ಯಶಸ್ಸು ಕಂಡಿದ್ದಾರೆ. ‘ಗೋಲಿಸೋಡ’, ‘10 ಎಂದ್ರಾತುಕುಳ್ಳ’, ‘ಕಡಗು’, ‘ಗೋಲಿಸೋಡ 2’ ಚಿತ್ರಗಳಿಗೆ ಆಕ್ಷನ್-ಕಟ್ ಹೇಳಿದ್ದಾರೆ. ಇದೀಗ ಮೊದಲ ಬಾರಿ ಶಿವಣ್ಣನ ಸಿನಿಮಾದ ಜತೆಗೆ ಕನ್ನಡಕ್ಕೂ ನಿರ್ದೇಶಕನಾಗಿ ಪಾದಾರ್ಪಣೆ ಮಾಡುವ ತುಡಿತದಲ್ಲಿದ್ದಾರೆ.
