ಬೆಂಗಳೂರು: ಕರೊನಾ ಮೊದಲ ಅಲೆ ಮುಗಿಯುತ್ತಿದ್ದಂತೆಯೇ ಪ್ರಾರಂಭವಾಗಿತ್ತು ‘ಶಂಭೋ ಶಿವ ಶಂಕರ’ ಸಿನಿಮಾ. ಈಗ ಚಿತ್ರೀಕರಣ ಮುಗಿದಿದೆ, ಬಿಡುಗಡೆಯಾಗುವುದಕ್ಕೂ ಸಜ್ಜಾಗಿದೆ. ಈ ಮಧ್ಯೆ, ಹಾಡುಗಳು ಹೊರಬಂದಿವೆ. ಕಲಾವಿದರ ಸಂಘದಲ್ಲಿ ನಡೆದ ಸಮಾರಂಭದಲ್ಲಿ ಹಾಡುಗಳನ್ನು ಬಿಡುಗಡೆ ಮಾಡುವುದಕ್ಕೆಂದು ವಸಿಷ್ಠ ಸಿಂಹ ಮತ್ತು ನಿರ್ವಪಕ ಉಮಾಪತಿ ಶ್ರೀನಿವಾಸ ಗೌಡ ಬಂದಿದ್ದರು. ಹಾಡುಗಳನ್ನು ಬಿಡುಗಡೆ ಮಾಡಿ ಚಿತ್ರತಂಡಕ್ಕೆ ಶುಭ ಹಾರೈಸಿ ಬೆನ್ನುತಟ್ಟಿದ್ದಾರೆ. ಈ ಚಿತ್ರವನ್ನು ನಿರ್ದೇಶಿಸಿರುವುದು ಶಂಕರ್ ಕೋನಮಾನಹಳ್ಳಿ. ಅವರು ಈ ಹಿಂದೆ ಕಿರುತೆರೆಯಲ್ಲಿ ಒಂದಿಷ್ಟು ಧಾರಾವಾಹಿಗಳನ್ನು ನಿರ್ದೇಶಿಸಿದ್ದರಂತೆ. ಇದೇ ಮೊದಲ ಬಾರಿಗೆ ಚಿತ್ರ ನಿರ್ದೇಶಿಸಿದ್ದಾರೆ. ಇದೇ ವೇಳೆ ತಮ್ಮ ಕನಸಿಗೆ ಜೀವ ತುಂಬಿದ ನಿರ್ವಪಕರಿಗೆ ಮತ್ತು ಚಿತ್ರತಂಡದವರಿಗೆ ಥ್ಯಾಂಕ್ಸ್ ಸಹ ಹೇಳಿದರು.
