ರಿಲೀಸ್ ಆದ 48 ಗಂಟೆಯಲ್ಲೇ ಸತ್ಲುಜ್ ಗೇಟ್‌ಪಾಸ್! ದಿಲ್ಜಿತ್ ದೋಸಾಂಜ್ ಸಿನಿಮಾದ ಪರವಾಗಿ ನೆಟ್ಟಿಗರು ರೊಚ್ಚಿಗೆದ್ದಿದ್ದೇಕೆ? ಇಲ್ಲಿದೆ ಅಸಲಿ ಕಥೆ.. Satluj

ಈ ಮೊದಲು ಸಟ್ಲಜ್ ಮೂಲತಃ ಚಿತ್ರಮಂದಿರಗಳಲ್ಲಿ ಬಿಡುಗಡೆಗಾಗಿ ಅರ್ಜಿ ಸಲ್ಲಿಸಿತ್ತು. ಆದರೆ, ಸಲ್ಲಿಸಿದ ರೂಪದಲ್ಲಿ ಅನುಮತಿ ನೀಡಿರಲಿಲ್ಲ. ಹಾಗಾಗಿ ಚಿತ್ರಮಂದಿರಗಳಲ್ಲಿ ಬಿಡುಗಡೆಯಾಗುವ ಬದಲು ನೇರವಾಗಿ ಒಟಿಟಿ ವೇದಿಕೆಯಲ್ಲಿ ಬಿಡುಗಡೆ ಮಾಡಲಾಯಿತು.

ಮೂಲಗಳ ಪ್ರಕಾರ, ಚಿತ್ರವು ಒಟಿಟಿ ವೇದಿಕೆಯಲ್ಲಿ ಡಿಜಿಟಲ್ ಬಿಡುಗಡೆಯಾದ ತಕ್ಷಣವೇ ಅದರ ಕೆಲವು ನಿರ್ದಿಷ್ಟ ಭಾಗಗಳು ಮತ್ತು ದೃಶ್ಯಗಳ ಬಗ್ಗೆ ತೀವ್ರ ಆಕ್ಷೇಪ ಹಾಗೂ ಕಳವಳಗಳು ವ್ಯಕ್ತವಾಗಿದ್ದವು. ಚಿತ್ರದಲ್ಲಿನ ಆ ಸೂಕ್ಷ್ಮ ಭಾಗಗಳನ್ನು ಭಾರತ ವಿರೋಧಿ ಶಕ್ತಿಗಳು ತಮ್ಮ ದೇಶವಿರೋಧಿ ಪ್ರಚಾರಕ್ಕಾಗಿ ಅಥವಾ ಸಮಾಜದಲ್ಲಿ ಅಶಾಂತಿ ಮೂಡಿಸಲು ದುರುಪಯೋಗಪಡಿಸಿಕೊಳ್ಳುವ ಗಂಭೀರ ಸಾಧ್ಯತೆಗಳಿವೆ ಎಂದು ಹೇಳಿದ್ದರಿಂದ ಅಧಿಕಾರಿಗಳು ಸ್ಟ್ರೀಮಿಂಗ್ ವೇದಿಕೆಯಿಂದ ಸಂಪೂರ್ಣವಾಗಿ ತೆಗೆದುಹಾಕಲು ಪ್ರಯತ್ನಿಸಿದರು.

ಮಾನವ ಹಕ್ಕುಗಳ ಕಾರ್ಯಕರ್ತ ಜಸ್ವಂತ್ ಸಿಂಗ್ ಖಲ್ರಾ ಅವರ ಜೀವನವನ್ನು ಆಧರಿಸಿದ ಈ ಚಿತ್ರದ ಸುತ್ತಲಿನ ವಿವಾದವನ್ನು ಈ ಬೆಳವಣಿಗೆ ಮತ್ತೆ ಹುಟ್ಟುಹಾಕಿದೆ. ಮೂಲತಃ ಘಲ್ಲುಘರ ಎಂದು ಹೆಸರಿಸಲಾದ ಈ ಚಿತ್ರವನ್ನು ಪಂಜಾಬ್ 95 ಎಂದು ಮರುನಾಮಕರಣ ಮಾಡಲಾಯಿತು. ಅಂತಿಮವಾಗಿ ಸಟ್ಲುಜ್ ಎಂದು ಮರುನಾಮಕರಣ ಮಾಡಲಾಯಿತು. ಆದರೆ, ಈ ಯೋಜನೆಯು ಪ್ರಮಾಣೀಕರಣ ಸಮಸ್ಯೆಗಳು ಮತ್ತು ಬಹು ಶೀರ್ಷಿಕೆ ಬದಲಾವಣೆಗಳ ನಡುವೆ ವರ್ಷಗಳ ಕಾಲ ಸ್ಪಷ್ಟ ನಿರ್ಣಯಕ್ಕೆ ಬರಲು ಸಾಧ್ಯವಾಗಿರಲಿಲ್ಲ.

ಆದಾಗ್ಯೂ, ಈ ಚಿತ್ರವನ್ನು ಒಟಿಟಿಯಿಂದ ಹಠಾತ್ ಆಗಿ ತೆಗೆದುಹಾಕಿರುವುದು ಪಂಜಾಬ್‌ನಲ್ಲಿ ತೀವ್ರ ರಾಜಕೀಯ ಚರ್ಚೆಗೆ ಗ್ರಾಸವಾಗಿದೆ. ಶಿರೋಮಣಿ ಅಕಾಲಿ ದಳದ ಅಧ್ಯಕ್ಷ ಸುಖ್‌ಬೀರ್ ಸಿಂಗ್ ಬಾದಲ್ ಈ ಕ್ರಮವನ್ನು ಕಟುವಾಗಿ ಟೀಕಿಸಿದ್ದರೆ, ಶಿರೋಮಣಿ ಗುರುದ್ವಾರ ಪ್ರಬಂಧಕ್ ಸಮಿತಿ (SGPC) ಮಾನವ ಹಕ್ಕುಗಳ ಹೋರಾಟಗಾರ ಜಸ್ವಂತ್ ಸಿಂಗ್ ಖಲ್ರಾ ಅವರ ಜೀವನ ಆಧರಿತ ಈ ಚಿತ್ರವನ್ನು ತೆಗೆದುಹಾಕುವ ನಿರ್ಧಾರವನ್ನು ಬಲವಾಗಿ ಪ್ರಶ್ನಿಸಿದೆ. ವಿವಿಧ ಪಕ್ಷಗಳ ನಾಯಕರು ಈ ವಿವಾದದ ಬಗ್ಗೆ ಪರ-ವಿರೋಧದ ಅಭಿಪ್ರಾಯಗಳನ್ನು ವ್ಯಕ್ತಪಡಿಸುತ್ತಿದ್ದಾರೆ.

ಚಿತ್ರ ತೆಗೆಯುವಿಕೆಗೆ ಪ್ರತಿಕ್ರಿಯಿಸಿದ ದಿಲ್ಜಿತ್ ದೋಸಾಂಜ್, ಜಸ್ವಂತ್ ಸಿಂಗ್ ಖಲ್ರಾ ಅವರಂತೆಯೇ ಚಿತ್ರಕ್ಕೂ ಗತಿಯಾಗಿದೆ ಎಂದು ಹೇಳಿದರು. ಚಿತ್ರವನ್ನು ಈಗ ತೆಗೆದುಹಾಕಿರುವಂತೆಯೇ ಆಗ ಕಾರ್ಯಕರ್ತರ ಬಾಯಿಯನ್ನು ಮುಚ್ಚಿಸಲಾಯಿತು. ನಿರ್ದೇಶಕ ಹನಿ ಟ್ರೆಹನ್ ಕೂಡ ಈ ನಿರ್ಧಾರದ ಬಗ್ಗೆ ನಿರಾಶೆ ವ್ಯಕ್ತಪಡಿಸಿದ್ದು, ವರ್ಷಗಳ ವಿಳಂಬದ ನಂತರ ಚಿತ್ರವು ಅಂತಿಮವಾಗಿ ಪ್ರೇಕ್ಷಕರನ್ನು ತಲುಪಿದೆ ಮತ್ತು ಬಿಡುಗಡೆಯಾದ ಸ್ವಲ್ಪ ಸಮಯದ ನಂತರ ಅದನ್ನು ತೆಗೆದುಹಾಕಲಾಗಿದೆ ಎಂದು ಹೇಳಿದರು.

ಪ್ರಸ್ತುತ ಇರುವ ನಿಯಮಗಳ ಪ್ರಕಾರ, ಒಟಿಟಿ ಪ್ಲಾಟ್‌ಫಾರ್ಮ್‌ಗಳಲ್ಲಿ ನೇರವಾಗಿ ಬಿಡುಗಡೆಯಾಗುವ ಸಿನಿಮಾಗಳಿಗೆ ಸೆನ್ಸಾರ್ ಮಂಡಳಿಯಿಂದ ಮುಂಚಿತವಾಗಿಯೇ ಪ್ರಮಾಣಪತ್ರ ಪಡೆಯುವ ಅಗತ್ಯವಿರುವುದಿಲ್ಲ. ಆದಾಗ್ಯೂ, ಈ ಸ್ಟ್ರೀಮಿಂಗ್ ಸಂಸ್ಥೆಗಳು ಸ್ವಯಂ-ನಿಯಂತ್ರಣದ ಅಡಿಯಲ್ಲಿ ಕಾರ್ಯನಿರ್ವಹಿಸುತ್ತವೆ. ದೇಶದ ಭದ್ರತೆಗೆ ಧಕ್ಕೆ ತರುವ ಅಥವಾ ಸಮಾಜದಲ್ಲಿ ಅಶಾಂತಿ ಮೂಡಿಸುವಂತಹ ಸೂಕ್ಷ್ಮ ಮತ್ತು ಹಾನಿಕಾರಕ ವಿಷಯಗಳಿದ್ದಾಗ, ಕೇಂದ್ರ ಸರ್ಕಾರವು ಮಧ್ಯಪ್ರವೇಶಿಸಿ ಸೂಕ್ತ ಕ್ರಮ ಕೈಗೊಳ್ಳುವ ಸಂಪೂರ್ಣ ಅಧಿಕಾರವನ್ನು ಹೊಂದಿರುತ್ತದೆ.

ಮುಂದಿನ ಸೂಚನೆ ಬರುವವರೆಗೂ ಸಟ್ಲಜ್ ಭಾರತದಲ್ಲಿ ಲಭ್ಯವಿಲ್ಲ ಎಂದು ZEE5 ದೃಢಪಡಿಸಿದೆ. ಆದರೆ, ಅದು ಚಿತ್ರ ಮತ್ತು ಅದರ ನಿರ್ಮಾಪಕರ ಪರವಾಗಿ ನಿಲ್ಲುತ್ತದೆ ಮತ್ತು ಭಾರತೀಯ ಪ್ರೇಕ್ಷಕರಿಗೆ ಶೀರ್ಷಿಕೆಯನ್ನು ಮರುಸ್ಥಾಪಿಸುವ ಭರವಸೆಯಲ್ಲಿ ಸೂಕ್ತ ಪ್ರಕ್ರಿಯೆಯನ್ನು ಅನುಸರಿಸುತ್ತಿದೆ ಎಂದು ಹೇಳಿಕೊಂಡಿದೆ (ಏಜೆನ್ಸೀಸ್​).