ಮಾರ್ಚ್ 3, 1934 ಕನ್ನಡಿಗರ ಪಾಲಿಗೆ ಇದು ಅವಿಸ್ಮರಣೀಯವಾದ ದಿನ. ಏಕೆಂದರೆ, 86 ವರ್ಷಗಳ ಹಿಂದೆ ಕನ್ನಡದ ಮೊದಲ ವಾಕ್ಚಿತ್ರ ‘ಸತಿ ಸುಲೋಚನ’ ಬಿಡುಗಡೆಯಾಗಿತ್ತು. ಅಲ್ಲಿಂದ ಪ್ರಾರಂಭವಾದ ಒಂದು ಭವ್ಯ ಪರಂಪರೆ ಅವ್ಯಾಹತವಾಗಿ ಮುಂದುವರಿದಿದೆ. ‘ಸತಿ ಸುಲೋಚನ’ ಚಿತ್ರಕ್ಕೂ ಮುನ್ನ ಕನ್ನಡದಲ್ಲಿ ಚಿತ್ರಗಳು ನಿರ್ವಣವಾಗಿಲ್ಲ ಎಂದೇನಲ್ಲ. ಆದರೆ, ಅದಕ್ಕೂ ಮುನ್ನ ಬಿಡುಗಡೆಯಾದ ಚಿತ್ರಗಳು ಮೂಕಿ ಚಿತ್ರಗಳಾಗಿದ್ದವು. ‘ಸತಿ ಸುಲೋಚನ’ ಮೊದಲ ಟಾಕಿ ಚಿತ್ರವಾದ್ದರಿಂದ, ಆ ಚಿತ್ರದ ಬಿಡುಗಡೆಯ ದಿನಾಂಕದಿಂದ ಚಿತ್ರರಂಗದ ಪ್ರಾರಂಭವವನ್ನು ಗುರುತಿಸಲಾಗುತ್ತದೆ. ಬರೀ ಕನ್ನಡದಲ್ಲಷ್ಟೇ ಅಲ್ಲ, ಎಲ್ಲ ಭಾಷೆಗಳ ಮೊದಲ ವಾಕ್ಚಿತ್ರಗಳ ಬಿಡುಗಡೆಯ ದಿನಾಂಕದಿಂದ ಆ ಭಾಷೆಯ ಚಿತ್ರರಂಗದ ಪ್ರಾರಂಭವನ್ನು ಗುರುತಿಸಲಾಗುತ್ತದೆ.
