ದ ರೈಸ್​ ಆಫ್​ ಅಶೋಕ ಚಿತ್ರದಲ್ಲಿ ಕಾಂತಾರ ಲೀಲಾ; ನೀನಾಸಂ ಸತೀಶ್​ಗೆ ಜೋಡಿಯಾದ ಸಪ್ತಮಿ ಗೌಡ

ವಿಜಯವಾಣಿ ಸುದ್ದಿಜಾಲ ಬೆಂಗಳೂರು:

ಸತೀಶ್​ ನೀನಾಸಂ ನಾಯಕನಾಗಿರುವ "ಅಶೋಕ ಬ್ಲೇಡ್​' ಇದೀಗ "ದ ರೈಸ್​ ಆಫ್​ ಅಶೋಕ' ಹೆಸರಿನಲ್ಲಿ ಮೂಡಿಬರುತ್ತಿರುವುದು ಗೊತ್ತಿದೆ. ಹಾಗೇ ನಿರ್ದೇಶಕ ವಿನೋದ್​ ಧೋಂಡಾಲೆ ನಿಧನದ ಬಳಿಕ ಸಂಕಲನಕಾರ ಮನು ಶೇಡ್ಗಾರ್​ ನಿರ್ದೇಶನದ ಜವಾಬ್ದಾರಿ ಹೊತ್ತಿದ್ದು, ಸದ್ಯ ಚಿತ್ರತಂಡ ಎರಡನೇ ಹಂತದ ಶೂಟಿಂಗ್​ನಲ್ಲಿ ಬಿಜಿಯಾಗಿದೆ. ಆದರೆ, ನಾಯಕ ಸತೀಶ್​ ನೀನಾಸಂಗೆ ನಾಯಕಿಯಾಗಿ ಯಾರು ನಟಿಸಲಿದ್ದಾರೆ ಎಂಬ ಪ್ರಶ್ನೆ ಹಲವರದ್ದಾಗಿತ್ತು. ಇದೀಗ ಚಿತ್ರತಂಡ ಆ ಪ್ರಶ್ನೆಗೆ ಉತ್ತರ ನೀಡಿದೆ. "ದ ರೈಸ್​ ಆಫ್​ ಅಶೋಕ' ಚಿತ್ರಕ್ಕೆ ನಾಯಕಿಯಾಗಿ ಸಪ್ತಮಿ ಗೌಡ ಆಯ್ಕೆಯಾಗಿದ್ದಾರೆ. ಎರಡನೇ ಹಂತದ ಶೂಟಿಂಗ್​ನಲ್ಲಿ ಪಾಲ್ಗೊಂಡಿರುವ ಅವರು ಈಗಾಗಲೇ ಕೆಲ ಮಾತಿನ ಭಾಗ ಹಾಗೂ ಒಂದು ಹಾಡಿನ ಚಿತ್ರೀಕರಣ ಪೂರ್ಣಗೊಳಿಸಿದ್ದಾರೆ.

ನಾಯಕಿಯ ಆಯ್ಕೆಯ ಬಗ್ಗೆ ನಾಯಕ ಸತೀಶ್​, "ಚಿತ್ರದಲ್ಲಿ ಸುಂದರ ಲವ್​ಸ್ಟೋರಿ ಇದೆ. ಮಾಡೆಲ್​ಗಳಂತೆ ಗ್ಲಾಮರಸ್​ ಆಗಿ ಕಾಣುವವರು ಈ ಪಾತ್ರಕ್ಕೆ ಬೇಕಿರಲಿಲ್ಲ. ಅಚ್ಚುಕಟ್ಟಾಗಿ ಚಾಮರಾಜನಗರ, ನಂಜನಗೂಡಿನ ಕನ್ನಡದಲ್ಲಿ ಮಾತನಾಡುವಂತಹ ಹುಡುಗಿಗಾಗಿ ಹುಡುಕಾಟ ನಡೆಸಿದ್ದೆವು. ಅಂಬಿಕಾ ಪಾತ್ರಕ್ಕೆ ಸಪ್ತಮಿ ಚೆನ್ನಾಗಿ ಸೂಟ್​ ಆಗುತ್ತಾರೆ ಅಂತನ್ನಿಸಿತು. ನಮ್ಮಿಬ್ಬರ ಕಾಂಬಿನೇಷನ್​ ಬರುತ್ತೆ ಅಂತ ಬೇರೆಯವರಿರಲಿ ನಾವೂ ಯೋಚಿಸಿರಲಿಲ್ಲ. ಅವರು ಸಹ ಕಥೆ ಕೇಳಿ ಇಷ್ಟಪಟ್ಟು, ಖುಷಿಯಾಗಿ ನಟಿಸಲು ಒಪ್ಪಿಕೊಂಡರು. ಸಪ್ತಮಿ ಹಳ್ಳಿ ಹಿನ್ನೆಲೆಯಿರುವ ಹುಡುಗಿಯಾದ ಕಾರಣ ಭಾಷೆಯ ಮೇಲೂ ಒಳ್ಳೆ ಹಿಡಿತವಿದ್ದು, ಸಲೀಸಾಗಿ ನಟಿಸಿದರು. "ಕಾಂತಾರ' ಮತ್ತು "ಪಾಪ್​ಕಾರ್ನ್​ ಮಂಕಿ ಟೈಗರ್​' ಪಾತ್ರಗಳ ಛಾಯೆ ಕಾಣಿಸದಂತೆ ಪಾತ್ರವನ್ನು ಡಿಸೈನ್​ ಮಾಡಲಾಗಿದ್ದು, ಅವರ ಪಾತ್ರದಲ್ಲಿ ನಾಚಿಕೆ, ಬಿಗುಮಾನ, ಹೊಸತನ ಎಲ್ಲವೂ ಇರಲಿದೆ' ಎಂದು ಮಾಹಿತಿ ನೀಡುತ್ತಾರೆ.

70ರ ದಶಕದ ಕಥೆ:

""ದ ರೈಸ್​ ಆಫ್​ ಅಶೋಕ' 70ರ ದಶಕದ ಕಥೆ' ಎನ್ನುವ ಸತೀಶ್​, "ಇನ್ನು 15 ದಿನಗಳ ಶೂಟಿಂಗ್​ ಮಾತ್ರ ಬಾಕಿಯಿದೆ. ಏ. 20ರ ಒಳಗೆ ಚಿತ್ರೀಕರಣ ಪೂರ್ಣಗೊಳ್ಳಲಿದೆ. ಮೇಕಿಂಗ್​, ಕಾಸ್ಟ್ಯೂಮ್​, ಭಾಷೆ, ಹಿನ್ನೆಲೆ, ಪಾತ್ರಗಳು, ವಿಎ್​ಎಕ್ಸ್​, ಹಿನ್ನೆಲೆ ಸಂಗೀತ ಎಲ್ಲದರ ಮೂಲಕ ಅಂದಿನ ಕಾಲಟ್ಟವನ್ನೇ ಕಣ್ಣಮುಂದೆ ತರಲು, ಪ್ರೇಕ್ಷಕರನ್ನು 70ರ ದಶಕಕ್ಕೆ ಮತ್ತೆ ಕರೆದೊಯ್ಯಲು ಪ್ರಯತ್ನಿಸಿದ್ದೇವೆ. ಹೀಗಾಗಿ ಸಿನಿಮಾ ಕೂಡ ದೊಡ್ಡ ಬಜೆಟ್​ನಲ್ಲಿ ಮೂಡಿಬರಲಿದೆ' ಎಂದು ಹೇಳಿಕೊಳ್ಳುತ್ತಾರೆ.

ನಾನು ಹೂ ಮಾರುವ ಹುಡುಗಿ ಪಾತ್ರದಲ್ಲಿ ನಟಿಸುತ್ತಿದ್ದೇನೆ. ಪಾತ್ರ ತುಂಬ ಚೆನ್ನಾಗಿದೆ. ನಿರ್ದೇಶಕರು ಲುಕ್​ ಟೆಸ್ಟ್​ ಮಾಡಿದ ದಿನವೇ ಪಾತ್ರದ ಬಗ್ಗೆ ಹೇಳಿದ್ದರು. ಅದಕ್ಕೆ ತಕ್ಕಂತೆ ನಾನು ಸಿದ್ಧತೆ ಮಾಡಿಕೊಂಡೆ. "ಪಾಪ್​ಕಾರ್ನ್​ ಮಂಕಿ ಟೈಗರ್​'ನಲ್ಲಿ ಉದ್ದದ ಡೈಲಾಗ್ಸ್​ ಇತ್ತು. ಆ ಬಳಿಕ "ದ ರೈಸ್​ ಆಫ್​ ಅಶೋಕ'ದಲ್ಲಿ ಲೆಂಥಿ ಡೈಲಾಗ್ಸ್​ ಇವೆ. ಅಶೋಕ ಮತ್ತು ಅಂಬಿಕಾಳ ಲವ್​ಸ್ಟೋರಿ ಒಂದೆಡೆ ಮತ್ತೊಂದೆಡೆ ಸಮುದಾಯಗಳ ನಡುವಿನ ಸಂರ್ಷ ಹೀಗೆ ಎರಡು ಟ್ರ್ಯಾಕ್​​ಗಳಲ್ಲಿ ಕಥೆ ಸಾಗುತ್ತದೆ.

- ಸಪ್ತಮಿ ಗೌಡ, ನಾಯಕಿ