25 ವರ್ಷಗಳ ಬಳಿಕ ಮತ್ತೊಮ್ಮೆ ರಿಲೀಸ್ ಆಗುತ್ತಿದೆ ‘ಯಜಮಾನ’

ಡಾ. ವಿಷ್ಣುವರ್ಧನ್‌ಗೆ ‘ಕರ್ನಾಟಕ ರತ್ನ’ ಪ್ರಶಸ್ತಿ ಸಂದ ಹಿನ್ನೆಲೆಯಲ್ಲಿ ಚಿತ್ರವನ್ನು ಮರುಬಿಡುಗಡೆ ಮಾಡಲಾಗತ್ತಿದ್ದು, ಶುಕ್ರವಾರ (ನ. 7) 100ಕ್ಕೂ ಅಧಿಕ ಚಿತ್ರಮಂದಿರಗಳಲ್ಲಿ ರಿ-ರಿಲೀಸ್ ಆಗುತ್ತಿದೆ. ತಾಂತ್ರಿಕವಾಗಿ ಸ್ವಲ್ಪ ಬದಲಾವಣೆ ಮಾಡಲಾಗಿದ್ದು, ಕಲರಿಂಗ್ ಹಾಗೂ ಸೌಂಡ್ ಎಫೆಕ್ಟ್ ನವೀಕರಣಗೊಂಡು ಹೊಸದಾಗಿ, ಇಂದಿನ ಪ್ರೇಕ್ಷಕರ ಅಭಿರುಚಿಗೆ ತಕ್ಕಂತೆ ಚಿತ್ರವನ್ನು ತೆರೆ ಮೇಲೆ ತರಲಾಗುತ್ತಿದೆ.

ನಟ ಶಶಿಕುಮಾರ್, ‘‘ಯಜಮಾನ’ ಐತಿಹಾಸಿಕ ದಾಖಲೆ ನಿರ್ಮಿಸಿರುವ ಚಿತ್ರ. ಈ ಚಿತ್ರದ ದಾಖಲೆಯನ್ನು ಇಂದಿಗೂ ಯಾವ ಸಿನಿಮಾಗಳೂ ಮುರಿಯಲು ಅಸಾಧ್ಯ. ಸಂಸದನಾಗಿರುವಾಗಲೇ ಈ ಚಿತ್ರದ ಭಾಗವಾಗಿದ್ದು ನನಗೆ ಖುಷಿಯ ವಿಚಾರ. ವಿಷ್ಣುವರ್ಧನ್ ಸರ್ ನನಗೆ ಅಣ್ಣನಿದ್ದಂತೆ. ಅವರ ಅನೇಕ ಸಿನಿಮಾಗಳಲ್ಲಿ ನಾನು ನಟಿಸಿದ್ದೇನೆ. ‘ಯಜಮಾನ’ ರಿ-ರಿಲೀಸ್ ಆಗುತ್ತಿರುವುದು ಅವಿಸ್ಮರಣೀಯ’ ಎಂದು ಸಂತಸ ಹಂಚಿಕೊಂಡರು. ವಿತರಕ ಮುನಿಸ್ವಾಮಿ, ‘ಈಗಾಗಲೇ 100ಕ್ಕೂ ಅಧಿಕ ಥಿಯೇಟರ್‌ಗಳು ಮುಂಗಡ ಬುಕಿಂಗ್ ಆಗಿವೆ. ಕಲರಿಂಗ್ ಹಾಗೂ ಸೌಂಡಿಂಗ್ ನವೀಕರಿಸಲಾಗಿದೆ’ ಎಂದರು.

ಆರ್. ಶೇಷಾದ್ರಿ-ರಾಧಾ ಭಾರತಿ ನಿರ್ದೇಶಿಸಿದ್ದ ‘ಯಜಮಾನ’ ಚಿತ್ರದಲ್ಲಿ ವಿಷ್ಣುವರ್ಧನ್ ದ್ವಿಪಾತ್ರದಲ್ಲಿದ್ದರು. ಅವರ ಜತೆಗೆ ಅಭಿಜಿತ್, ಶಶಿಕುಮಾರ್, ರಮೇಶ್ ಭಟ್, ಪ್ರೇಮಾ ಕಲಾಬಳಗದಲ್ಲಿದ್ದರು. ರಾಜೇಶ್ ರಾಮನಾಥ್ ಸಂಗೀತ, ರಮೇಶ್ ಬಾಬು ಛಾಯಾಗ್ರಹಣ ಚಿತ್ರಕ್ಕಿತ್ತು.