ತಾಯಿಯಾಗಿ ಯೋಚಿಸುವುದಾದರೆ ಮುಂದಿನ ಪೀಳಿಗೆಯ ಮಕ್ಕಳಿಗೆ ನಾಡು, ಭಾಷೆ ಹಾಗೂ ಸಂಸ್ಕೃತಿ ಕುರಿತು ಸರಿಯಾಗಿ ತಿಳಿವಳಿಕೆ ಹೇಳುವ ಅಗತ್ಯವಿದೆ. ಹಾಡು, ಸಾಹಿತ್ಯ, ಕಲೆ ಅಥವಾ ಹಬ್ಬಗಳ ಮೂಲಕವಾದರೂ ನಮ್ಮ ಇತಿಹಾಸ, ಸಂಸ್ಕೃತಿಯ ಜ್ಞಾನದ ಅರಿವು ಮೂಡಿಸಬೇಕು. ಕನ್ನಡಾಭಿಮಾನ ಅಥವಾ ಕಾಳಜಿ ಮನೆಯಿಂದಲೇ ಆರಂಭವಾಗಬೇಕು. ಭಾಷೆಯ ಬೇರು ಆಳವಾಗಿದ್ದಾಗಲೇ ಎತ್ತರವಾಗಿ ಬೆಳೆಯಲು ಸಾಧ್ಯ. ಚಿಕ್ಕಂದಿನಲ್ಲಿರುವಾಗ ತಂದೆ-ತಾಯಿ ನಮಗೆ ಸಂಗೀತ, ಸಾಹಿತ್ಯ, ರಂಗಭೂಮಿ ಹೀಗೆ ಅನೇಕ ವಿಚಾರಗಳ ಆಸಕ್ತಿ ಮೂಡಿಸಿದ್ದರು. ನಮ್ಮ ಭಾಷೆಯ ಬೇರುಗಳು ಇಂತಹ ಸಾಂಸ್ಕೃತಿಕ ಕ್ಷೇತ್ರಗಳಲ್ಲಿಯೇ ಅಡಗಿರುವುದು. ಇವತ್ತು ನಾವೇನೇ ಸಾಧಿಸಿದ್ದರೂ ಅದರ ಎಲ್ಲ ಶ್ರೇಯಸ್ಸು ಪಾಲಕರಿಗೆ ಸಲ್ಲಬೇಕು.
