Ritvik Mathad - ಗಿಣಿರಾಮ ಹುಡುಗನ ಸಿಕ್ಸ್​ ಪ್ಯಾಕ್​ ಸಿದ್ಧತೆ

"ನಿನಗಾಗಿ', "ಗಿಣಿರಾಮ' ಧಾರಾವಾಹಿಗಳ ಖ್ಯಾತಿಯ ನಟ ರಿತ್ವಿಕ್​ ಮಠದ್​ ನಟಿಸಿದ್ದ "ಮಾರ್ನಮಿ' ಕಳೆದ ಫೆಬ್ರವರಿಯಲ್ಲಿ ರಿಲೀಸ್​ ಆಗಿತ್ತು. ರಿಷಿತ್​ ಶೆಟ್ಟಿ ನಿರ್ದೇಶಿಸಿದ್ದ ಈ ಫ್ಯಾಮಿಲಿ ಥ್ರಿಲ್ಲರ್​ ಡ್ರಾಮಾಗೆ ಪ್ರೇಕ್ಷಕರಿಂದ ಮೆಚ್ಚುಗೆ ವ್ಯಕ್ತವಾಗಿತ್ತು. ಜತೆಗೆ ರಿತ್ವಿಕ್​ ನಟನೆಗೂ ಬೆನ್ನು ತಟ್ಟಿದ್ದರು. "ಮಾರ್ನಮಿ' ಬಳಿಕ ರಿತ್ವಿಕ್​ ಸಿನಿಮಾಗಳತ್ತ ಹೆಚ್ಚು ಗಮನ ಹರಿಸಿದ್ದಾರಂತೆ. ""ಮಾರ್ನಮಿ'ಗೆ ತುಂಬ ಒಳ್ಳೆ ಪ್ರತಿಕ್ರಿಯೆ ದೊರೆಯಿತು. ಹಲವರು ನಿಮಗೆ ಆ್ಯಕ್ಷನ್​ ಪಾತ್ರಗಳು ಚೆನ್ನಾಗಿ ಹೊಂದುತ್ತವೆ ಎಂದರು. ಆ ಚಿತ್ರದ ಬಳಿಕ 11 ಕಥೆಗಳನ್ನು ಕೇಳಿದ್ದೇನೆ. ಹಲವು ಧಾರಾವಾಹಿಗಳಿಗೂ ಅವಕಾಶಗಳು ಬಂದವು. ಸಿನಿಮಾ ಜತೆ ಧಾರಾವಾಹಿ ಕಮಿಟ್​ ಆದರೆ, ಕುಟುಂಬಕ್ಕೆ ಹೆಚ್ಚು ಸಮಯ ನೀಡಲಾಗುವುದಿಲ್ಲ. ಸೀರಿಯಲ್​ ಶೂಟಿಂಗ್​ಗೆ ಬೆಳಗ್ಗೆ 7ಗಂಟೆಗೆ ಹೋದರೆ ರಾತ್ರಿ 10ರ ನಂತರ ಮನೆಗೆ ಬರುತ್ತಿದ್ದೆ. ಈಗಿನ್ನೂ ಮಗಳು ಲಿಪಿಗೆ ಒಂದು ವರ್ಷವಷ್ಟೇ. ಈ ಸಮಯದಲ್ಲಿ ಆಕೆಗೆ, ಕುಟುಂಬಕ್ಕೆ ಹೆಚ್ಚು ಸಮಯ ನೀಡಬೇಕು ಅಂತನ್ನಿಸಿತು. ಹೀಗಾಗಿ ಸಿನಿಮಾಗೆ ಹೆಚ್ಚು ಸಮಯ ನೀಡಬೇಕು ಅಂತ ಕಿರುತೆರೆಯಿಂದ ಬ್ರೇಕ್​ ತೆಗೆದುಕೊಂಡಿದ್ದೇನೆ. ನನ್ನ ನಟನೆಯನ್ನು ಮೆಚ್ಚಿ ಹೆಸರಾಂತ ನಿರ್ದೇಶಕರೊಬ್ಬರು ಸಂಪರ್ಕಿಸಿದರು. ಅವರು ಹೇಳಿದ ಎರಡು ಕಥೆಗಳೂ ಇಷ್ಟವಾಗಿವೆ. ಸದ್ಯ ಅವರು ಒಂದು ಸಿನಿಮಾದಲ್ಲಿ ಬಿಜಿಯಿರುವ ಕಾರಣ, ನಮ್ಮ ಸಿನಿಮಾ ಅಕ್ಟೋಬರ್​ನಲ್ಲಿ ಘೋಷಣೆಯಾಗಲಿದೆ' ಎಂದು ಮಾಹಿತಿ ನೀಡುತ್ತಾರೆ.

"ಮಾರ್ನಮಿ' ಚಿತ್ರಕ್ಕಾಗಿ ತೂಕ ಹೆಚ್ಚಿಸಿಕೊಂಡಿದ್ದ ರಿತ್ವಿಕ್​ ಇದೀಗ ಹೊಸ ಚಿತ್ರಕ್ಕಾಗಿ ಮೊದಲ ಬಾರಿಗೆ ಸಿಕ್ಸ್​ ಪ್ಯಾಕ್​ ಲುಕ್​ನಲ್ಲಿ ಕಾಣಿಸಿಕೊಳ್ಳಲಿದ್ದಾರಂತೆ. "ನಾನು ಮೊದಲಿನಿಂದಲೂ ಫಿಟ್​ ಆಗಿದ್ದೆ. ಆದರೆ, ಸಿಕ್ಸ್​ ಪ್ಯಾಕ್​ ಟೆ ಮಾಡಿರಲಿಲ್ಲ. ಇದೊಂದು ಆ್ಯಕ್ಷನ್​, ್ಯಾಂಟಸಿ, ಕಾಮಿಡಿ ಜತೆಗೆ ಸಸ್ಪೆನ್ಸ್​ ಅಂಶಗಳಿರುವ ಕಮರ್ಷಿಯಲ್​ ಸಿನಿಮಾ. ನಾನು ಹಿಟ್​ಮ್ಯಾನ್​ ಪಾತ್ರದಲ್ಲಿ ಕಾಣಿಸಿಕೊಳ್ಳಬೇಕಿದೆ. ಅದಕ್ಕಾಗಿ ರಾ ಲುಕ್​ ಬೇಕಿದೆ. ಹೀಗಾಗಿ ಸಿಕ್ಸ್​ ಪ್ಯಾಕ್​ ಜತೆಗೆ ಉದ್ದ ಗಡ್ಡ ಬಿಡುತ್ತಿದ್ದೇನೆ. ಇದೆರಡೂ ನನಗೆ ಹೊಸ ಅನುಭವವೇ. ಜತೆಗೆ ಕಳರಿಪಾಯಟ್ಟು ಸಮರಕಲೆ ಕಲಿಯಬೇಕಿದೆ. ಶೂಟಿಂಗ್​ ಸಮಯದಲ್ಲಿ ತರಬೇತಿ ಪಡೆಯಲಿದ್ದೇನೆ' ಎಂದು ಹೇಳಿಕೊಳ್ಳುತ್ತಾರೆ ರಿತ್ವಿಕ್​.