ನಾಡಿಯಾ, ಗಂಗಾ, ಮೆಲ್ಲಿಸಾ... ಯಶ್​ 'ಟಾಕ್ಸಿಕ್'​ ಬ್ಯೂಟಿಗಳ ಸಂಭಾವನೆ ಕೇಳಿದ್ರೆ ನಿಮ್ಮ ಹುಬ್ಬೇರೋದು ಖಚಿತ | Toxic Beauties

Toxic Beauties: ಸ್ಯಾಂಡಲ್​ವುಡ್​ನ ರಾಕಿಂಗ್​ ಸ್ಟಾರ್,​ ನಟ ಯಶ್ ಅಭಿನಯದ ಹಾಗೂ ಮಾಲಿವುಡ್​ ನಿರ್ದೇಶಕಿ ಗೀತು ಮೋಹನ್ ದಾಸ್ ನಿರ್ದೇಶನದ ಬಹುನಿರೀಕ್ಷಿತ 'ಟಾಕ್ಸಿಕ್: ಎ ಫೇರಿಟೇಲ್ ಫಾರ್ ಗ್ರೋನ್ ಅಪ್ಸ್' ಚಿತ್ರದ ಹವಾ ಸದ್ಯ ಭಾರತೀಯ ಚಿತ್ರೋದ್ಯಮದಲ್ಲಿ ಬಲು ಜೋರಾಗಿದೆ. ಇದೇ ಆಗಸ್ಟ್ 26ರಂದು ಏಕಕಾಲಕ್ಕೆ ಬಹುತೇಕ ಚಿತ್ರಮಂದಿರಗಳಲ್ಲಿ ಪ್ಯಾನ್​ ವರ್ಲ್ಡ್​ ರಿಲೀಸ್ ಆಗಲು ಸಜ್ಜಾಗಿರುವ ಸಿನಿಮಾದ ಟ್ರೇಲರ್​ ನಿನ್ನೆಯಷ್ಟೇ (ಆ.07) ಬೆಂಗಳೂರಿನಲ್ಲಿ ಅದ್ಧೂರಿಯಾಗಿ ಬಿಡುಗಡೆಗೊಂಡಿದ್ದು, ಸಿನಿಪ್ರಿಯರ ಕುತೂಹಲವನ್ನು ದುಪ್ಪಟ್ಟಾಗಿಸಿದೆ. 

ಆರಂಭದಲ್ಲಿ ಸಿನಿಮಾದ ಟೀಸರ್ ಮೂಲಕ ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ಸದ್ದು ಮಾಡಿದ್ದ ಟಾಕ್ಸಿಕ್​, ಒಂದಷ್ಟು ಹಸಿಬಿಸಿ ದೃಶ್ಯಗಳಿಂದ ಭಾರಿ ಟೀಕೆ, ಅಸಮಾಧಾನಕ್ಕೆ ಗುರಿಯಾಗಿತ್ತು. ಚಿತ್ರವನ್ನು ಹಾಲಿವುಡ್​ ರೇಂಜಿಗೆ ತೋರಿಸಲಾಗಿದ್ದು, ಮುಜುಗರಕ್ಕೀಡು ಮಾಡುವ ಸೀನ್​ಗಳನ್ನು ಚಿತ್ರೀಕರಿಸಲಾಗಿದೆ ಎಂದು ಅನೇಕರು ಅಭಿಪ್ರಾಯ ವ್ಯಕ್ತಪಡಿಸಿದ್ದರು. ಆದರೆ, ಬಿಡುಗಡೆಗೊಂಡ ಟ್ರೇಲರ್​ನಲ್ಲಿ ಕಂಪ್ಲೀಟ್​ ಹೊಡೆದಾಟ, ಬಡಿದಾಟ, ರಕ್ತಸಿಕ್ತ​ಹಾಗೂ ಐವರು ನಟಿಮಣಿಯರ ಝುಲಕ್​ ಮತ್ತು ಯಶ್​ ಅವರ ದ್ವಿಪಾತ್ರ ದೃಶ್ಯಗಳೇ ತುಂಬಿದೆ. ಇದರೊಟ್ಟಿಗೆ ಸ್ವತಃ ನಟನೇ ಹೇಳಿರುವಂತೆ, ತಮ್ಮ ಸಿನಿಮಾವನ್ನು ಹೆಮ್ಮೆಯಿಂದಲೇ ನೋಡಿ, ನೋಡಬಹುದು ಎಂಬ ಮಾತುಗಳು ಫ್ಯಾನ್ಸ್​ಗಳಲ್ಲಿ ಚಿತ್ರದ ಅಸಲಿ ಕಥೆ ಬಗ್ಗೆ ಕುತೂಹಲ ಕೆರಳಿಸಿದೆ.   

2026ರ ಮಾರ್ಚ್ 19ರಂದೇ ಜಾಗತಿಕವಾಗಿ ತೆರೆ ಕಾಣಲು ಸಿದ್ಧವಾಗಿದ್ದ 'ಟಾಕ್ಸಿಕ್'​ ಚಿತ್ರದಲ್ಲಿ ದೊಡ್ಡ ತಾರಾಬಳಗವೇ ಇದೆ. ಆ್ಯಕ್ಷನ್-ಥ್ರಿಲ್ಲರ್ ಸಿನಿಮಾದಲ್ಲಿ ಭಾರತೀಯ ಚಿತ್ರೋದ್ಯಮದ ಟಾಪ್​ ನಟಿಯರಾದ ಕಿಯಾರಾ ಅಡ್ವಾಣಿ (ಬಾಲಿವುಡ್​), ನಯನತಾರಾ (ಕಾಲಿವುಡ್​), ರುಕ್ಮಿಣಿ ವಸಂತ್ (ಸ್ಯಾಂಡಲ್​ವುಡ್​), ಹುಮಾ ಖುರೇಷಿ (ಬಾಲಿವುಡ್​) ಮತ್ತು ತಾರಾ ಸುತಾರಿಯಾ (ಬಾಲಿವುಡ್​) ಪ್ರಮುಖ ಪಾತ್ರಗಳಲ್ಲಿ ಮಿಂಚಿದ್ದಾರೆ. ಈ ಸ್ಟಾರ್​ ನಟಿಮಣಿಯರಿಗೆ ಎಷ್ಟು ದುಬಾರಿ ಮೊತ್ತದ ಸಂಭಾವನೆ ಸಿಕ್ಕಿರಬಹುದು ಎಂಬ ಪ್ರಶ್ನೆಗಳು ಸದ್ಯ ಸಿನಿರಸಿಕರಲ್ಲಿ ತೀವ್ರವಾಗಿ ಕಾಡುತ್ತಿತ್ತು. ಕಡೆಗೂ ಯಾರಿಗೆ ಎಷ್ಟು ಸಂಭಾವನೆ ದೊರೆತಿದೆ ಎಂಬುದರ ವಿವರ ಹೀಗಿದೆ ನೋಡಿ.  

'ಟಾಕ್ಸಿಕ್'​ನ ರೂವಾರಿ ಆಗಿರುವ ಯಶ್​, 'ರಾಯ' ಪಾತ್ರದಲ್ಲಿ ಅಬ್ಬರಿಸಲಿದ್ದಾರೆ. ಈಗಾಗಲೇ ಪೋಸ್ಟರ್​, ಟೀಸರ್, ಟ್ರೇಲರ್​​ನಲ್ಲಿ ಕಪ್ಪು ಬಣ್ಣದ ಉಡುಗೆ ಮತ್ತು ರಗಡ್​ ಲುಕ್​ನಲ್ಲಿ ಕಾಣಿಸಿಕೊಂಡಿರುವ ಯಶ್​, ಸಿನಿಪ್ರಿಯರಲ್ಲಿ ಭಾರಿ ನಿರೀಕ್ಷೆ ಹುಟ್ಟಿಸಿದ್ದಾರೆ. ಈ ಚಿತ್ರದಲ್ಲಿ ನಟನೆ ಮಾತ್ರವಲ್ಲದೇ, ಕಥೆ, ನಿರ್ಮಾಣದಲ್ಲೂ ಯಶ್​ ಪ್ರಮುಖ ಪಾತ್ರ ವಹಿಸಿದ್ದಾರೆ. ಕೇವಲ ನಟನೆಗೆ ಅವರು ಬರೋಬ್ಬರಿ 50 ಕೋಟಿ ರೂ. ಸಂಭಾವನೆ ಪಡೆದಿದ್ದಾರೆ ಎಂದು ವರದಿಯಾಗಿದೆ. 

ಬಹುನಿರೀಕ್ಷಿತ ಚಿತ್ರದಲ್ಲಿ 'ಗಂಗಾ' ಪಾತ್ರವನ್ನು ನಿಭಾಯಿಸಿರುವ ಬಹುಭಾಷಾ ನಟಿ ನಯನತಾರ, ಮೊದಲ ಲುಕ್​, ಟ್ರೇಲರ್​ನಲ್ಲಿ ಯಶ್​ರ ಸಹೋದರಿ ಪಾತ್ರದಲ್ಲಿ ನೋಡುಗರ ಹುಬ್ಬೇರಿಸಿದ್ದಾರೆ. ಈ ಚಿತ್ರದಲ್ಲಿ ನಟಿಸಲು ಅವರು 12 ಕೋಟಿ ರೂ. ಸಂಭಾವನೆ ಸ್ವೀಕರಿಸಿದ್ದಾರೆ ಎನ್ನಲಾಗಿದೆ. 

ನೆಟ್‌ಫ್ಲಿಕ್ಸ್‌ ವೀಕ್ಷಕರಿಂದ ಮೆಚ್ಚುಗೆ ಪಡೆದ 'ಡೆಲ್ಲಿ ಕ್ರೈಮ್ ಸೀಸನ್ 3'ರಲ್ಲಿ ವಿಲನ್​ ಪಾತ್ರದಲ್ಲಿ ಮಿಂಚಿರುವ ನಟಿ ಹುಮಾ ಖುರೇಷಿ, ಟಾಕ್ಸಿಕ್​ನಲ್ಲಿ 'ಎಲಿಜಿಬೆತ್' ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ವರದಿಗಳ ಪ್ರಕಾರ, ಖುರೇಷಿ 2ರಿಂದ 3 ಕೋಟಿ ರೂ. ಸಂಭಾವನೆ ಪಡೆದಿದ್ದಾರೆ ಎಂದು ಹೇಳಲಾಗಿದೆ. 

ಕನ್ನಡದ ಬ್ಯೂಟಿ ರುಕ್ಮಿಣಿ ವಸಂತ್, ನಟ ಯಶ್ ಅವರ ಗ್ಯಾಂಗ್‌ಸ್ಟರ್ ಚಿತ್ರದಲ್ಲಿ 'ಮೆಲಿಸಾ' ಪಾತ್ರದಲ್ಲಿ ನಟಿಸಿದ್ದಾರೆ. ಚಿತ್ರದಲ್ಲಿ ಸಖತ್​ ಸ್ಟೈಲಿಶ್ ಆಗಿ ಕಾಣಿಸಿಕೊಂಡಿರುವ ರುಕ್ಕು, ಬಹುಮುಖ ಪಾತ್ರವನ್ನೇ ಮಾಡಿದ್ದಾರೆ ಎಂಬುದು ಟ್ರೇಲರ್​ನಲ್ಲಿ ಸ್ಪಷ್ಟವಾಗಿದೆ. ವರದಿಗಳ ಪ್ರಕಾರ, ರುಕ್ಮಿಣಿ ಅವರ ಸಂಭಾವನೆ 3 ಕೋಟಿ ರೂ. ಆಗಿದೆ. 

ಚಿತ್ರದಲ್ಲಿ 'ರೆಬೆಕಾ' ಪಾತ್ರದಲ್ಲಿ ಕಾಣಿಸಿಕೊಂಡಿರುವ ಬಾಲಿವುಡ್​ ಬೆಡಗಿ ತಾರಾ ಸುತಾರಿಯಾ, ತಮ್ಮ ಪಾತ್ರಕ್ಕೆ 2 ರಿಂದ 3 ಕೋಟಿ ರೂ. ಸಂಭಾವನೆ ಪಡೆದಿದ್ದಾರೆ ಎಂದು ವರದಿಯಾಗಿದೆ. 

ಬಾಲಿವುಡ್​ ಚೆಲುವೆ ಕಿಯಾರಾ ಅಡ್ವಾಣಿ 'ಟಾಕ್ಸಿಕ್'​ನಲ್ಲಿ ನಾಡಿಯಾ ಪಾತ್ರದಲ್ಲಿ ನಟಿಸಿದ್ದಾರೆ. ಐವರು ನಟಿಮಣಿಯರ ಪೈಕಿ ಕಿಯಾರಾ ಅವರ ಲುಕ್​ ಮಾತ್ರ ಸಿನಿಪ್ರಿಯರ ಕುತೂಹಲ ದುಪ್ಪಟ್ಟಾಗಿಸಿದೆ. ಟ್ರೇಲರ್​ನಲ್ಲಿ ತೋರಿಸಿರುವಂತೆ, ಚಿತ್ರದ ಕಥೆಯಲ್ಲಿ ಅವರ ಪಾತ್ರವೇ ಟ್ವಿಸ್ಟ್​ ಅಂಡ್​ ಟರ್ನ್​ಗಳಿಗೆ ಮುಖ್ಯ ಕಾರಣ ಎನ್ನಲಾಗಿದೆ. ತಮ್ಮ ಪಾತ್ರಕ್ಕಾಗಿ ನಟಿ ಸುಮಾರು 15 ಕೋಟಿ ರೂ. ಸಂಭಾವನೆ ಪಡೆದಿದ್ದಾರೆ ಎಂದು ವರದಿಗಳು ತಿಳಿಸಿದೆ. ಅಷ್ಟಕ್ಕೂ, ಇತರೆ ನಟಿಯರಿಗೆ ಹೋಲಿಸಿದರೆ ಕಿಯಾರಾ ಅವರ ಪೇಮೆಂಟ್​ ಎಲ್ಲರಿಗಿಂತ ಹೆಚ್ಚಿದೆ,(ಏಜೆನ್ಸೀಸ್).