CITYLIGHTS REVIEW: ಕತ್ತಲ ಕರಾಳತೆಯಿಂದ ಬೆಳಕಿನ ಬದುಕಿನೆಡೆಗೆ...

ಚಿತ್ರ: ಸಿಟಿಲೈಟ್ಸ್

ನಿರ್ದೇಶನ: ವಿಜ ಕುಮಾರ್ (ದುನಿಯಾ)

ತಾರಾಗಣ: ವಿನಯ್ ರಾಜಕುಮಾರ್, ಮೋನಿಷಾ ವಿಜಯ್, ಉಮಾಶ್ರೀ, ಬಿ.ಎಂ.ಗಿರಿರಾಜ್ ಮತ್ತಿತರರು.

‘ಸಲಗ’, ‘ಭೀಮ’ ಸಿನಿಮಾಗಳಲ್ಲಿ ಭೂಗತ ಲೋಕ, ಡ್ರಗ್ಸ್ ಮಾಫಿಯಾ ಹಿನ್ನೆಲೆಯಲ್ಲಿ ಕಥೆ ಹೇಳಿದ್ದ ‘ದುನಿಯಾ’ ವಿಜಯ್ ಇದೀಗ ಮೂರನೇ ಸಿನಿಮಾ ‘ಸಿಟಿ ಲೈಟ್ಸ್’ನಲ್ಲೂ ವಿಭಿನ್ನ ವಿಷಯವನ್ನು ಆಯ್ಕೆ ಮಾಡಿಕೊಂಡಿದ್ದಾರೆ. ಹಳ್ಳಿಯಿಂದ ನಗರಕ್ಕೆ ಬರುವ ಮುಗ್ಧರ ಅಸಹಾಯಕತೆಯ ದುರ್ಬಳಕೆ, ಮಹಿಳಾ ಕಳ್ಳ ಸಾಗಾಣಿಕೆ, ತೃತೀಯ ಲಿಂಗಿಗಳ ಸ್ಥಿತಿ-ಗತಿ ಹಾಗೂ ಅಮಾಯಕ ಯುವಕರು ರೌಡಿಸಂಗೆ ಬಲಿಪಶುಗಳಾಗುವ ವಿಷಯಗಳ ಮೇಲೆ ಗಮನ ಹರಿಸಿದ್ದಾರೆ. ಅದಕ್ಕಾಗಿ ಅವರು ಬೆಂಗಳೂರಿನ ಹೃದಯ ಭಾಗ ಮೆಜೆಸ್ಟಿಕ್ ಆಯ್ಕೆ ಮಾಡಿಕೊಂಡಿರುವುದು ಕಥೆಗೆ ಪೂರಕವಾಗಿದೆ.

ತಂದೆ-ತಾಯಿಯಿಲ್ಲದೆ ಅನಾಥವಾಗಿ ಮಾವನ ಆಸರೆಯಲ್ಲಿ ಬೆಳೆದ ಶಿವು (ವಿನಯ್) ಮಾವನ ನಿಧನದ ಬಳಿಕ ದಿಕ್ಕು ತೋಚದೆ ಬೆಂಗಳೂರಿಗೆ ಬರುತ್ತಾನೆ. ಗೆಳೆಯ ‘ಅಲ್-ಹಕ್’ ನಿರಂಜನ್‌ನ ತಂಡ ಸೇರಿ ಆತನ ನೆರವಿನಿಂದ ಕೆಲಸ ಗಿಟ್ಟಿಸಿಕೊಳ್ಳುತ್ತಾನೆ. ಅದೇ ಸಮಯದಲ್ಲಿ ಸಕಲೇಶಪುರದ ಮೋನಿಷಾ ಕೂಡ ಕಾಣೆಯಾಗಿರುವ ಸಹೋದರನನ್ನು ಹುಡುಕುತ್ತಾ ಮಹಾನಗರಕ್ಕೆ ಬರುತ್ತಾಳೆ. ಆಕೆಯ ಅಸಹಾಯಕತೆ ಬಳಸಿಕೊಂಡು ಕೆಲ ದುರುಳರು ಮೋನಿಷಾಳನ್ನು ವೇಶ್ಯಾವಾಟಿಕೆಗೆ ತಳ್ಳಲು ಮುಂದಾಗುತ್ತಾರೆ. ಅದು ಶಿವುಗೆ ತಿಳಿದು ಆಕೆಯನ್ನು ರಕ್ಷಿಸುತ್ತಾನೆ. ಹೀಗೆ ಎರಡು ಹಳ್ಳಿ ಹಕ್ಕಿಗಳಿಂದ ಆರಂಭವಾಗುವ ‘ಸಿಟಿಲೈಟ್ಸ್’ ಬಳಿಕ ಬೇರೆಯದ್ದೇ ಆಯಾಮ ಪಡೆಯುತ್ತದೆ.

ಇನ್ನು ಹೇಳಬೇಕಾದ ವಿಷಯಗಳನ್ನು ದುನಿಯಾ ವಿಜಯ್ ಸ್ಪಷ್ಟವಾಗಿ ಹೇಳಿದ್ದಾರೆ. ಕೇವಲ ಲವ್‌ಸ್ಟೋರಿಯತ್ತ ಗಮನಹರಿಸದೆ ಬೀದಿ ದೀಪಗಳಡಿ ಬದುಕುವ ಜನಸಾಮಾನ್ಯರ ಬದುಕು, ಬವಣೆಯನ್ನು ಬಿಡಿ ಬಿಡಿಯಾಗಿ ಬಿತ್ತರಿಸಿದ್ದಾರೆ. ಅದಕ್ಕಾಗಿ ಹಲವಾರು ಪಾತ್ರಗಳನ್ನು ಸೃಷ್ಟಿಸಿದ್ದು, ಅವರ ಮಧ್ಯೆಯೇ ವಿನಯ್ ರಾಜಕುಮಾರ್ ಹಾಗೂ ಮೋನಿಷಾ ಪಾತ್ರಗಳು ಕಳೆದುಹೋದಂತೆ ಭಾಸವಾಗುತ್ತದೆ. ಇನ್ನು ಪೊಲೀಸ್ ಅಧಿಕಾರಿಗಳ ಸಂಭಾಷಣೆ ಕೆಲವೆಡೆ ನಗು ತರಿಸಿದರೆ, ಇನ್ನು ಕೆಲವೆಡೆ ಕಿರಿಕಿರಿ ಅನಿಸುತ್ತದೆ. ಚರಣ್ ರಾಜ್ ಸಂಗೀತ ಸಂಯೋಜನೆ ಇಡೀ ಸಿನಿಮಾದ ಆತ್ಮ. ಕಥೆಗೆ ಪೂರಕವಾಗಿ ಸಾಹಿತ್ಯ, ಹಿನ್ನೆಲೆ ಸಂಗೀತ ಚೆನ್ನಾಗಿ ಮೂಡಿಬಂದಿದೆ. ಮಾಸ್ತಿ ಸಂಭಾಷಣೆ ಹರಿತವಾಗಿದೆ. ಬೆಂಗಳೂರು ಮಹಾನಗರದ ಓಣಿ-ಸಂಧಿಗಳನ್ನು ಛಾಯಾಗ್ರಾಹಕ ಶಿವಸೇನಾ ಅದ್ಭುತವಾಗಿ ಸೆರೆಹಿಡಿದಿದ್ದಾರೆ. ಇನ್ನು ವಿನಯ್ ರಾಜಕುಮಾರ್ ನಟನೆ ಸಹಜವಾಗಿ ಮೂಡಿಬಂದಿದೆ. ಮೋನಿಷಾ ವಿಜಯ್ ಕುಮಾರ್ ಕಣ್ಣುಗಳಲ್ಲಿಯೇ ನಟಿಸಿ, ಚೊಚ್ಚಲ ಚಿತ್ರದಲ್ಲೇ ‘ಫುಲ್ ಮಾರ್ಕ್ಸ್ ಪಡೆದಿದ್ದಾರೆ. ಉಳಿದಂತೆ ಉಮಾಶ್ರೀ, ಗಿರಿರಾಜ್, ವಿನೋದ್, ಪುನೀತ್ ಕೊಟ್ಟ ಜವಾಬ್ದಾರಿಯನ್ನು ಅಚ್ಚುಕಟ್ಟಾಗಿ ನಿರ್ವಹಿಸಿದ್ದಾರೆ.