‘ಅಮೆರಿಕಾ ಅಮೆರಿಕಾ’ (1997) ನಾಗತಿಹಳ್ಳಿ ಚಂದ್ರಶೇಖರ್ ನಿರ್ದೇಶನದ ಯಶಸ್ವಿ ಕಲ್ಟ್ ಕ್ಲಾಸಿಕ್ ಸಿನಿಮಾ. ಹಾಗಂತ, ‘ಅಮೆರಿಕಾ ಅಮೆರಿಕಾ 2’ ಅದರ ಮುಂದುವರಿದ ಭಾಗವಲ್ಲ. ಬೇರೆಯದ್ದೆ ಕಥೆ. ‘ಹಳೇ ಕಥೆಯಿಂದಲೇ ಹೊಸ ಕಥೆಗಳು ಹುಟ್ಟುವುದು’ ಎಂಬ ಸಿನಿಮಾ ಟ್ಯಾಗ್ಲೈನ್ನಂತೆ ಲೇಖಕಿ ಸಹನಾ ವಿಜಯ್ ಕುಮಾರ್ ಅವರ ‘ಕ್ಷಮೆ’ ಕಾದಂಬರಿ ಆಧಾರವಾಗಿಟ್ಟುಕೊಂಟು ಈ ಚಿತ್ರ ನಿರೂಪಿಸಲಾಗಿದೆ. ಇಲ್ಲಿ ಅಮೆರಿಕಾ ಕೇವಲ ಸ್ಥಳವಷ್ಟೇ ಪಾತ್ರವಾಗಿಲ್ಲ. ದಾಂಪತ್ಯ ಜೀವನದ ಸಂಕೀರ್ಣ ವಿಷಯಗಳು, ಹೆಣ್ಣಿನ ತಲ್ಲಣಗಳ ಜತೆಗೆ ಆಧುನಿಕ ತಾಂತ್ರಿಕ ಕಾಲಘಟ್ಟದ ಜೀವನಶೈಲಿ ಮೇಲೆ ಬೆಳಕು ಚೆಲ್ಲಲಾಗಿದೆ. ಇದು ಕೂಡ ತ್ರಿಕೋನ ಪ್ರೇಮಕಥೆಯಾಗಿದ್ದು, ಮೊದಲ ಭಾಗದ ಭೂಮಿ, ಸೂರ್ಯ ಹಾಗೂ ಶಶಾಂಕ್ ಪಾತ್ರಗಳ ಛಾಯೆ ಇದೆ. ‘ಭೂಮಿ’ಯ ತುಂಟುತನ ಮಿಸ್ ಆದರೂ, ನುಡಿಯಲ್ಲಿ ‘ಭೂಮಿ ತೂಕದ ಸಹನೆ’ ಕಾಣಬಹುದು. ‘ಅಮೆರಿಕಾ ಅಮೆರಿಕಾ 2’ ಕೇವಲ ಭಾವನಾತ್ಮಕ ನಿರೂಪಣೆಯಲ್ಲ, ಬದಲಾಗಿ ಬದುಕಿನ ಹಾಗೂ ಆಧುನಿಕ ಯುಗದ ಸಂಕೀರ್ಣ ವಿಷಯಗಳ ಕುರಿತ ಸಿನಿಮಾ. ಅದಕ್ಕೆ ತಕ್ಕಂತೆ ಪಾತ್ರಗಳನ್ನು ಸೃಷ್ಟಿಸಲಾಗಿದೆ. ಎಐ ಇಂಜಿನಿಯರ್ ಆಗಿರುವ ನುಡಿ, ರೋಬೋ ಮೂಲಕ ತೀರಿಹೋದ ಅಜ್ಜಿಯ ಧ್ವನಿಯನ್ನು ಮರುಸೃಷ್ಟಿಸಿ, ಆಕೆಯ ಜತೆಗೆ ಸಂವಾದಿಸುವುದು, ‘ಗಂಡ ಬೇಕಾಗಿದ್ದಾನೆ’ ಎಂದು ಜಾಹೀರಾತು ನೀಡುವುದು, ಪತಿ ನಿನಾದ್ (ನಿರೂಪ್) ಮಕ್ಕಳು ಬೇಕು ಎಂದು ಮೂಢನಂಬಿಕೆಯ ಮೊರೆ ಹೋಗುವುದು ಹೀಗೆ ಹಲವು ಯಾಂತ್ರಿಕ, ಸಾಮಾಜಿಕ ವಿಚಾರಗಳ ಮೂಲಕ ಪ್ರೇಮಕಥೆಯೊಂದು ವಿಸ್ತಾರ ರೂಪ ಪಡೆದುಕೊಂಡಿದೆ. ಇನ್ನು ಕೆಲವು ಕಡೆ ಲಾಜಿಕ್ ಮಿಸ್ ಆಗಿದೆ. ವಿವಾಹಿತ ಹೆಣ್ಣು ಹಾಗೂ ಅವಿವಾಹಿತ ಗಂಡು ಇಬ್ಬರು ಕೂಡಿ ಮಗು ಮಾಡಿಕೊಳ್ಳುವ ವಿಚಾರವನ್ನು ಅಮೆರಿಕದಂತಹ ಮುಂದುವರಿದ ರಾಷ್ಟ್ರದಲ್ಲಿ ನಿಂತು ಸಂಸ್ಕೃತಿಯ ಪರಧಿ, ಸಾಮಾಜಿಕ ಸ್ಥಿತಿಗಳಲ್ಲಿ ನೋಡುವ ಸಂಭಾಷಣೆಗಳು ಅಷ್ಟು ಎಫೆಕ್ಟ್ ಅನಿಸುವುದಿಲ್ಲ.
