ನಗಿಸಲು ಸಜ್ಜಾದ ಭುವನ್ ಪೊನ್ನಣ್ಣ: ‘ಹಲೋ 123’, ‘ಬುಲ್ಲಿ’ ಬೆನ್ನಲ್ಲೇ ಹೊಸ ಚಿತ್ರ ಘೋಷಿಸಿದ ನಟ

ಮೊದಲ ಬಾರಿಗೆ ಕಾಮಿಡಿ ಚಿತ್ರದಲ್ಲಿ ನಟಿಸುತ್ತಿರುವುದರಿಂದ ಪಾತ್ರಕ್ಕಾಗಿ ನಡೆಸುತ್ತಿರುವ ಸಿದ್ಧತೆ ಮತ್ತು ಸವಾಲಿನ ಬಗ್ಗೆ ಭುವನ್, ‘ಪಾತ್ರದ ಮೂಲಕ ನಗಿಸುವುದು, ಅಳಿಸುವುದು ತುಂಬಾ ಕಷ್ಟ. ನಾನೀಗ ತೆರೆ ಮೇಲೆ ನಗಿಸಬೇಕು ಎಂದರೆ, ನನಗೆ ನಾನೇ ಬದಲಾಗಬೇಕಿದೆ. ಹಾವಭಾವ, ದೇಹಭಾಷೆ ಹಾಗೂ ಮಾತಿನ ವೈಖರಿಯನ್ನು ಬದಲಿಸಿಕೊಳ್ಳಬೇಕಿದೆ. ಅದಕ್ಕಾಗಿ ಈ ಪಾತ್ರ ಸವಾಲಿನದು. ಪಾತ್ರಕ್ಕಾಗಿ ಇಂಟೆನ್ಸ್ ಟ್ರೇನಿಂಗ್ ಕ್ಲಾಸ್‌ಗೆ ಹೋಗುತ್ತಿದ್ದೇನೆ. ಈಗಾಗಲೇ 12 ದಿನಗಳ ಕ್ಲಾಸ್ ಮುಗಿಸಿದ್ದೇನೆ. ಇದೇ ಜೂನ್ 12ರಿಂದ ಶೂಟಿಂಗ್ ಆರಂಭವಾಗಲಿದ್ದು, 45-50 ದಿನಗಳ ಕಾಲ ಬೆಂಗಳೂರು, ಮೈಸೂರು ಸೇರಿ ವಿವಿಧೆಡೆ ಚಿತ್ರೀಕರಣ ನಡೆಯಲಿದೆ. ಹೀರೋಯಿನ್‌ಗೆ ಹುಡುಕಾಟ ನಡೆದಿದ್ದು, ಸದ್ಯದಲ್ಲೇ ಅಂತಿಮಗೊಳಿಸಲಾಗುವುದು’ ಎಂದು ಮಾಹಿತಿ ನೀಡಿದರು.

ಭುವನ್ ಪೊನ್ನಣ್ಣ- ಹರ್ಷಿಕಾ ಪೂಣಚ್ಚ ದಂಪತಿ ಸದ್ಯ ಎರಡನೇ ಮಗುವಿನ ನಿರೀಕ್ಷೆಯಲ್ಲಿದ್ದಾರೆ. ‘ಹರ್ಷಿಕಾ ಮೊದಲ ಬಾರಿಗೆ ಗರ್ಭಿಣಿಯಾಗಿದ್ದಾಗ ನಾನೇ ಹೆಚ್ಚು ಕಾಳಜಿ ವಹಿಸಿದ್ದೆ. ಆದರೆ, ಇದೀಗ ಕೆಲಸ ಹಾಗೂ ಶೂಟಿಂಗ್ ಒತ್ತಡ ಇರುವುದರಿಂದ ಹರ್ಷಿಕಾರತ್ತ ಹೆಚ್ಚು ಗಮನ ಹರಿಸಲಾಗುತ್ತಿಲ್ಲ. ಎರಡನೇ ಮಗುವಿನ ನಿರೀಕ್ಷೆಯಲ್ಲಿರುವ ನಮ್ಮ ಕುಟುಂಬಕ್ಕೆ ಖುಷಿಯಿದೆ. ಮಗಳು ತ್ರಿದೇವಿ ಹುಟ್ಟಿದ ಬಳಿಕವೇ ನನ್ನ ಅದೃಷ್ಟ ಬದಲಾಗಿದ್ದು. ಮಕ್ಕಳೆಂದರೆ ನನಗೆ ಪಂಚಪ್ರಾಣ. ಆಗಸ್ಟ್ ಕೊನೆಯ ವಾರ ಅಥವಾ ಸೆಪ್ಟೆಂಬರ್ ಮೊದಲ ವಾರ ಹೆರಿಗೆಯಾಗುವ ನಿರೀಕ್ಷೆಯಿದೆ’ ಎಂದು ಭುವನ್ ಖುಷಿ ಹಂಚಿಕೊಳ್ಳುತ್ತಾರೆ. ಅಂದಹಾಗೆ, ಈಗಾಗಲೇ ಕಥೆ ರೆಡಿ ಮಾಡಿಕೊಂಡಿರುವ ಭುವನ್ 2027ರಲ್ಲಿ ಮೊದಲ ಬಾರಿಗೆ ಆ್ಯಕ್ಷನ್-ಕಟ್ ಹೇಳಲಿದ್ದಾರೆ.