ಸರಳತೆ ಹಾಗೂ ಶಿಸ್ತಿನ ವಿಚಾರವಾಗಿ ಅಪ್ಪಾಜಿ ಅವರನ್ನು ದಿನಂಪ್ರತಿ ನೆನಪಿಸಿಕೊಳ್ಳುತ್ತೇನೆ. ಅವರೊಬ್ಬ ದೊಡ್ಡ ಸೂಪರ್ಸ್ಟಾರ್ ಆದರೂ ಎಂದಿಗೂ ಸ್ಟಾರ್ಡಂ ಪ್ರದರ್ಶಿಸಿದವರಲ್ಲ. ಹಾಗೆಯೇ ಅಭಿಮಾನಿಗಳು ನೀಡುವ ಪ್ರೀತಿ, ಅಭಿಮಾನವನ್ನು ಉಳಿಸಿಕೊಳ್ಳಬೇಕು ಎಂಬ ಅರಿವು, ಜವಾಬ್ದಾರಿ ಅವರಲ್ಲಿ ಕಂಡಿದ್ದೆ. ಇನ್ನು, ಶೂಟಿಂಗ್ ಇರಲಿ, ಬಿಡಲಿ ಎಂದಿಗೂ ಶಿಸ್ತು ಮರೆತವರಲ್ಲ. ಪ್ರತಿ ದಿನ ವ್ಯಾಯಾಮ ಮಾಡುತ್ತಿದ್ದರು. ಹೇಳಿದ ಸಮಯಕ್ಕೆ ಮುಂಚೆಯೇ ಶೂಟಿಂಗ್ ಸ್ಥಳದಲ್ಲಿ ಇರುತ್ತಿದ್ದರು. ಕೆಲಸದ ವಿಚಾರದಲ್ಲಿ ಯಾವತ್ತೂ ರಾಜೀ ಆದವರಲ್ಲ. ಒಂದು ಪಾತ್ರ ಮಾಡುತ್ತಿದ್ದಾರೆ ಎಂದರೆ ಅದಕ್ಕಾಗಿ ಸಾಕಷ್ಟು ಅಧ್ಯಯನ ಮಾಡುತ್ತಿದ್ದರು. ಕನ್ನಡದಲ್ಲಿ 200ಕ್ಕೂ ಅಧಿಕ ಸಿನಿಮಾಗಳಲ್ಲಿ ಅಪ್ಪಾಜಿ ಭಿನ್ನ, ವಿಭಿನ್ನ ಪಾತ್ರಗಳಲ್ಲಿ ನಟಿಸಿದ್ದಾರೆ. ಮುಂದಿನ ಸಿನಿಮಾದಲ್ಲಿ ಹಿಂದಿನ ಪಾತ್ರಗಳ ಛಾಯೆ ಇರಲೇಬಾರದು ಎಂದು ವಿಭಿನ್ನತೆ ಕಾಪಾಡಿಕೊಳ್ಳುವುದಕ್ಕಾಗಿ ಸಾಕಷ್ಟು ತಯಾರಿ ನಡೆಸುತ್ತಿದ್ದರು. ಅಷ್ಟು ಶ್ರದ್ಧೆ, ನಿಷ್ಠೆಯಿಂದ ಕೆಲಸ ಮಾಡುತ್ತಿದ್ದರು. ಅದುವೇ ನಮಗೆ ದಾರಿದೀಪ. ಅವರ ಒಡನಾಟದಿಂದ ಸಾಕಷ್ಟು ಕಲಿತಿದ್ದೇನೆ. ಬಹುಮುಖ್ಯವಾಗಿ ಸಮಾಜಸೇವೆ ಮಾಡಬೇಕು ಎನ್ನುವುದು ಅಪ್ಪಾಜಿಯಿಂದಾನೇ ಕಲಿತಿದ್ದು. ಇಷ್ಟೆಲ್ಲಾ ನಮಗೆ ನೀಡಿರುವಾಗ ಸಮಾಜಕ್ಕೆ ನಾವು ಏನಾದರೂ ಕೊಡುಗೆ ನೀಡಬೇಕು ಎನ್ನುವುದು ಅವರ ಕಾಳಜಿಯಾಗಿತ್ತು.
