ಹೇಳಿಕೇಳಿ ಇದು ‘ಟ್ವೆಂಟಿ ಟ್ವೆಂಟಿ’. ಸದ್ಯದ ಲಕ್ಷಣಗಳನ್ನು ಗಮನಿಸಿದರೆ 2020ರಲ್ಲಿ ಸ್ಯಾಂಡಲ್ವುಡ್ನಲ್ಲಿ ಭರ್ಜರಿ ಬೌಂಡರಿ-ಸಿಕ್ಸರ್ಗಳ ಸಾಧ್ಯತೆ ಗೋಚರಿಸುತ್ತಿದೆ. ಈ ಸಲ ಎಲ್ಲ ಸ್ಟಾರ್ಗಳ ಸಿನಿಮಾ ತೆರೆ ಕಾಣಲಿರುವುದು ಒಂದೆಡೆಯಾದರೆ, ಮತ್ತೊಂದೆಡೆ ಚಿತ್ರಗಳ ಸಂಖ್ಯೆ ಲೆಕ್ಕದಲ್ಲೂ ಹ್ಯಾಟ್ರಿಕ್ ಲಕ್ಷಣ ಕಾಣುತ್ತಿದೆ. ಕಳೆದ ಸಲ ಯಶ್ ಎಂಟ್ರಿ ಆಗಲಿಲ್ಲ. ಆದರೆ ಈ ಸಲ ‘ಕೆಜಿಎಫ್: ಚಾಪ್ಟರ್ 2’ ಈಗಾಗಲೇ ಸದ್ದು ಮಾಡುತ್ತಿದ್ದು, ಅದರ ಶೂಟಿಂಗ್ ಕೂಡ ಬಹುತೇಕ ಮುಗಿದಿರುವುದರಿಂದ ಅವರು ಇದೇ ವರ್ಷ ತೆರೆ ಮೇಲೆ ಅಬ್ಬರಿಸುವ ಸಾಧ್ಯತೆಗಳಿವೆ. ಇನ್ನು ‘ಅವನೇ ಶ್ರೀಮನ್ನಾರಾಯಣ’ ಸಿನಿಮಾಗಾಗಿ 3 ವರ್ಷ ತೆಗೆದುಕೊಂಡರೂ, ರಕ್ಷಿತ್ ತಮ್ಮ ಮುಂದಿನ ಚಿತ್ರಕ್ಕೆ ಅಷ್ಟೊಂದು ದೀರ್ಘಾವಧಿ ತೆಗೆದುಕೊಳ್ಳದಿರುವ ಸೂಚನೆ ನೀಡಿರುವುದರಿಂದ ಅವರೂ ಈ ವರ್ಷ ಮತ್ತೊಂದು ಅದ್ದೂರಿ ಸಿನಿಮಾ ಮೂಲಕ ಹ್ಯಾಟ್ರಿಕ್ ಬಾರಿಸುವ ಸಾಧ್ಯತೆ ಇದೆ. ಕಳೆದ ವರ್ಷ ಒಂದೇ ಸಿನಿಮಾದಲ್ಲಿ ಅಭಿನಯಿಸಿದ್ದ ಉಪೇಂದ್ರ, ಈ ಸಲ ಆರು ಸಿನಿಮಾಗಳಲ್ಲಿ ತೊಡಗಿಸಿಕೊಂಡಿರುವುದರಿಂದ ಹೆಚ್ಚಿನ ನಿರೀಕ್ಷೆ ಮೂಡಿಸಿದ್ದಾರೆ. ಪುನೀತ್ ರಾಜ್ಕುಮಾರ್, ದರ್ಶನ್, ಸುದೀಪ್ ಮೂವರೂ ಬಿಗ್ಬಜೆಟ್ನ ತಲಾ ಒಂದೊಂದು ಬಹುನಿರೀಕ್ಷೆಯ ಅದ್ದೂರಿ ಸಿನಿಮಾಗಳಲ್ಲಿ ತೊಡಗಿಸಿಕೊಂಡಿದ್ದು, ಅವೆಲ್ಲವೂ ಇದೇ ವರ್ಷದಲ್ಲಿ ಬಿಡುಗಡೆ ಆಗಲಿವೆ. ಇನ್ನೊಂದೆಡೆ ಯೋಗರಾಜ್ ಭಟ್, ದುನಿಯಾ ಸೂರಿ ಮುಂತಾದ ನಿರ್ದೇಶಕರ ಜತೆಗೆ ಪ್ರತಿಭಾನ್ವಿತ ಉದಯೋನ್ಮುಖ ಕಿರಿಯರ ನಿರ್ದೇಶನದಲ್ಲಿಯೂ ಹಲವಾರು ಸಿನಿಮಾಗಳು ಮೂಡಿ ಬರಲಿರುವುದರಿಂದ ಎಂದಿನಂತೆ ಮತ್ತಷ್ಟು ವೆರೈಟಿಯ ಚಿತ್ರಗಳು ಈ ಸಲವೂ ಬಿಡುಗಡೆ ಆಗಲಿರುವುದಂತೂ ಖಚಿತ.
