‘ಏನೇ ಬಂದರೂ ತಾಳ್ಮೆಯಿಂದ ಇರಬೇಕು, ಎಲ್ಲದಕ್ಕೂ ಸಮಯ ಬರಬೇಕು, ಅಲ್ಲಿಯವರೆಗೂ ಪ್ರಯತ್ನ ಜಾರಿಯಲ್ಲಿರಬೇಕು..’ - ಇದು ಸ್ಯಾಂಡಲ್ವುಡ್ ನಟಿ, ಕರಾವಳಿ ಬೆಡಗಿ ಸಂಚಿತಾ ಪಡುಕೋಣೆ ತಮ್ಮ ಹತ್ತು ವರ್ಷಗಳ ವೃತ್ತಿಜೀವನದಲ್ಲಿ ಕಂಡುಕೊಂಡ ಸತ್ಯ. ಚಂದನವನಕ್ಕೆ ಪದಾರ್ಪಣೆ ಮಾಡಿ ಒಂದು ದಶಕ ಪೂರೈಸಿರುವ ಅವರು ಇದೀಗ ‘ಗಡಿನಾಡು’ ಪ್ರವೇಶಿಸಿದ್ದಾರೆ. ಅಂದರೆ ‘ಗಡಿನಾಡು’ ಎಂಬ ಸಿನಿಮಾದಲ್ಲಿ ಅಭಿನಯಿಸಿರುವ ಅವರು ಜ. 24ರಂದು ಮರಾಠಿ ಹುಡುಗಿಯಾಗಿ ಪರದೆ ಮೇಲೆ ಮಿಂಚಲಿದ್ದಾರೆ. ‘ಇದು ಹದಿಹರೆಯದ ಪ್ರೀತಿ ಹಾಗೂ ಭಾಷಾಭಿಮಾನದ ಕಥಾಹಂದರ ಇರುವ ಸಿನಿಮಾ. ನಾನಿಲ್ಲಿ ಮಹಾರಾಷ್ಟ್ರದ ಯುವತಿಯಾಗಿ ಕಾಣಿಸಿಕೊಂಡಿದ್ದು ವಿದ್ಯಾರ್ಥಿನಿ ಪಾತ್ರ ಮಾಡಿದ್ದೇನೆ. ಬೆಳಗಾವಿ ಹುಡುಗ ಹಾಗೂ ಮರಾಠಿ ಹುಡುಗಿ ನಡುವೆ ಪ್ರೇಮಾಂಕುರವಾದರೆ ಏನಾಗುತ್ತದೆ ಎಂಬುದೇ ಸಿನಿಮಾದ ಕಥೆ’ ಎನ್ನುತ್ತ ಪಾತ್ರ ಹಾಗೂ ಚಿತ್ರದ ಕುರಿತು ಮಾಹಿತಿ ಹಂಚಿಕೊಂಡರು ಸಂಚಿತಾ ಪಡುಕೋಣೆ.
ಪ್ರಯತ್ನ ನಿರಂತರ: ‘ರಾವಣ’ ಸಿನಿಮಾ ಮೂಲಕ ನಾಯಕಿಯಾಗಿ ಸ್ಯಾಂಡಲ್ವುಡ್ಗೆ ಪ್ರವೇಶಿಸಿರುವ ಸಂಚಿತಾ, ಚಿತ್ರರಂಗದಲ್ಲಿ ಇದೀಗ ಒಂದು ದಶಕವನ್ನೇ ಕಳೆದಿದ್ದಾರೆ. ಈ ಅವಧಿ ಅವರಿಗೆ ಸಾಕಷ್ಟು ಅನುಭವಗಳನ್ನು ನೀಡಿದೆ. ‘ಈ ಹತ್ತು ವರ್ಷಗಳ ವೃತ್ತಿಜೀವನದಲ್ಲಿ ಏಳು-ಬೀಳು ಎರಡನ್ನೂ ಕಂಡಿದ್ದೇನೆ. ಆದರೆ ನಾನು ಅಂದುಕೊಂಡಷ್ಟರ ಮಟ್ಟಿಗೆ ಯಶಸ್ಸು ಸಿಕ್ಕಿಲ್ಲ. ಕೆಲವೊಮ್ಮೆ ತುಂಬ ಬೇಸರವಾಗುತ್ತದೆ. ಹಾಗಂತ ಪ್ರಯತ್ನ ಬಿಡಬಾರದು’ ಎನ್ನುತ್ತ ತಾವು ಸಾಗಿ ಬಂದ ಹಾದಿಯನ್ನು ನೆನಪಿಸಿಕೊಂಡರು. ಅಂದಹಾಗೆ ಸಂಚಿತಾ ಈ ಕ್ಷೇತ್ರಕ್ಕೆ ಬಯಸಿ ಬಂದವರಲ್ಲ. ಅನಿರೀಕ್ಷಿತವಾಗಿ ಚಲನಚಿತ್ರರಂಗಕ್ಕೆ ಪ್ರವೇಶ ಮಾಡಿದ್ದರೂ ಭವಿಷ್ಯದ ಬಗ್ಗೆ ಇಲ್ಲಿಯೇ ನಿರೀಕ್ಷೆ ಇರಿಸಿಕೊಂಡಿದ್ದಾರೆ. ‘ನಟಿ ಆಗಬೇಕು ಎಂಬ ಕನಸು ನನಗೆ ಇರಲಿಲ್ಲ. ಆದರೂ ಯಾವುದೇ ಬ್ಯಾಕ್ಗ್ರೌಂಡ್ ಇಲ್ಲದೆ ಚಿತ್ರರಂಗಕ್ಕೆ ಪ್ರವೇಶ ಮಾಡಿದ್ದೇನೆ. ಒಂದು ದಿನ ಗೆಲುವು ಸಿಕ್ಕೇ ಸಿಗುತ್ತದೆ ಎಂಬ ನಂಬಿಕೆ ನನಗಿದೆ. ಎಲ್ಲದಕ್ಕೂ ಕಾಲಕೂಡಿ ಬರಬೇಕು. ನಮ್ಮ ಪ್ರಯತ್ನವನ್ನು ಬಿಡಬಾರದು’ ಎನ್ನುತ್ತಾರೆ ಅವರು. ಮುಂದಿನ ಕನಸು-ಯೋಜನೆಗಳು ಏನು ಎಂಬುದಾಗಿ ಕೇಳಿದರೆ ಅವರ ಉತ್ತರ, ಸಿನಿಮಾ ಸಿನಿಮಾ ಸಿನಿಮಾ. ಹೌದು.., ‘ಸಿನಿಮಾ ಬಿಟ್ಟು ಬೇರೇನೂ ಗೊತ್ತಿಲ್ಲ..’ ಎನ್ನುವ ಸಂಚಿತಾ, ‘ಏನೇ ಆದರೂ ಚಿತ್ರರಂಗದಲ್ಲಿರುತ್ತೇನೆ. ಇಲ್ಲಿಯೇ ಬದುಕು ಕಟ್ಟಿಕೊಳ್ಳುತ್ತೇನೆ’ ಎಂಬ ಆತ್ಮವಿಶ್ವಾಸ ವ್ಯಕ್ತಪಡಿಸುತ್ತಾರೆ.
