ರಿಲೀಸ್​ನಲ್ಲಿ ಫ್ಲಾಪ್​​, ರಿ-ರಿಲೀಸ್​ನಲ್ಲಿ ಹಿಟ್​! 50 ಕೋಟಿ ರೂ. ಗಳಿಕೆ ಮಾಡಿದ "ಸನಮ್​ ತೇರಿ ಕಸಮ್​'

ಒಟಿಟಿಗಳ ಅಬ್ಬರಿಂದಾಗಿ ಬಿಡುಗಡೆಯಾದ ಹೊಸ ಚಿತ್ರಗಳೇ ಥಿಯೇಟರ್​ಗಳಲ್ಲಿ ನಿಲ್ಲಲು ಪರದಾಡುವಂತಹ ದುಸ್ಥಿತಿ ನಿರ್ಮಾಣವಾಗಿದೆ. ಇನ್ನು ರಿ&ರಿಲೀಸ್​ ಆಗುವ ಚಿತ್ರಗಳನ್ನು ಕೇಳುವವರು ಯಾರು? ಅಂತನ್ನಿಸಬಹುದು. ಆದರೆ, ಕಳೆದ ಸೆಪ್ಟೆಂಬರ್​ನಲ್ಲಿ ರಿ-ರಿಲೀಸ್​ ಆದ "ತುಂಬಾದ್​' ಸಿನಿಮಾ, ಆ ಮಾತನ್ನು ಸುಳ್ಳಾಗಿಸಿತ್ತು. 2018ರಲ್ಲಿ ಮೊದಲ ಬಾರಿ ತೆರೆಗೆ ಬಂದಿದ್ದ ಅನಿಲ್​ ಬಾರ್ವೆ ನಿರ್ದೇಶನದ ಈ ಹಾರರ್​ ಚಿತ್ರ, ಬಾಕ್ಸಾಫಿಸಿನಲ್ಲಿ ದೊಡ್ಡ ಮಟ್ಟದಲ್ಲಿ ಸದ್ದು ಮಾಡಲು ಸಾಧ್ಯವಾಗಿರಲಿಲ್ಲ. ಆದರೆ, ಕಳೆದ ಸೆಪ್ಟೆಂಬರ್​ನಲ್ಲಿ ರಿ-ರಿಲೀಸ್​ ಆದಾಗ 38 ಕೋಟಿ ರೂ. ಗಳಿಕೆ ಮಾಡಿಕೊಳ್ಳುವ ಮೂಲಕ ಸೂಪರ್​ಹಿಟ್​ ಎನಿಸಿಕೊಂಡಿತ್ತು.

"ತುಂಬಾದ್​'ಗೆ ಸಿಕ್ಕ ಯಶಸ್ಸಿನಿಂದ ಎಚ್ಚೆತ್ತುಕೊಂಡ ಹರ್ಷವರ್ಧನ್​ ರಾಣೆ ಮತ್ತು ಮರ್ವಾ ಹೊಕೇನ್​ ಮುಖ್ಯ ಭೂಮಿಕೆಯಲ್ಲಿ ನಟಿಸಿದ್ದ "ಸನಮ್​ ತೇರಿ ಕಸಮ್​' ಚಿತ್ರತಂಡ ಪ್ರೇಮಿಗಳ ದಿನದ ಪ್ರಯುಕ್ತ ಚಿತ್ರವನ್ನು ಮರುಬಿಡುಗಡೆ ಮಾಡಿತ್ತು. ವಿಶೇಷ ಅಂದರೆ, ಈ ಸಿನಿಮಾಗೂ ಬಾಕ್ಸಾಫಿಸಿನಲ್ಲಿ ಉತ್ತಮ ಪ್ರತಿಕ್ರಿಯೆ ದೊರೆಯುತ್ತಿದೆ. 18ರಿಂದ 20 ಕೋಟಿ  ರೂ. ಬಜೆಟ್​ನಲ್ಲಿ ನಿರ್ಮಾಣವಾಗಿದ್ದ "ಸನಮ್​ ತೇರಿ ಕಸಮ್​' 2016ರಲ್ಲಿ ಮೊದಲ ಬಾರಿ ರಿಲೀಸ್​ ಆದಾಗ ಕೇವಲ 16 ಕೋಟಿ ರೂ. ಕಲೆಕ್ಷನ್​ ಮಾಡಿಕೊಂಡಿತ್ತು.

ಇದೀಗ ರಿ-ರಿಲೀಸ್​ ಆಗಿ 17 ದಿನಗಳಲ್ಲಿ 50 ಕೋಟಿ ರೂ.ಗೂ ಹೆಚ್ಚು ಗಳಿಕೆ ಮಾಡಿಕೊಳ್ಳುವ ಮೂಲಕ, ಮರುಬಿಡುಗಡೆಯಾಗಿ ಅತಿಹೆಚ್ಚು ಗಳಿಕೆ ಮಾಡಿಕೊಂಡ ಭಾರತೀಯ ಸಿನಿಮಾ ಎಂಬ ದಾಖಲೆ ಬರೆದಿದೆ. ಇದೇ ಖುಷಿಯಲ್ಲಿ "ಸನಮ್​ ತೇರಿ ಕಸಮ್​' ಸೀಕ್ವೆಲ್​ಗೆ ಚಿತ್ರತಂಡ ಸಿದ್ಧತೆ ನಡೆಸುತ್ತಿದೆ.