ಮುಂದಿನ 18 ತಿಂಗಳು ಸಂದರ್ಶನಕ್ಕೆ ಫುಲ್​ಸ್ಟಾಪ್​! ರಣವೀರ್ ಸಿಂಗ್​​ ಕಟು ನಿರ್ಧಾರಕ್ಕೆ ಆ ಚಿತ್ರದ ವಿವಾದವೇ ಕಾರಣ?

ಮುಂಬೈ: ನಿರ್ದೇಶಕ ಆದಿತ್ಯ ಧರ್ ನಿರ್ದೇಶನದಲ್ಲಿ ಎರಡು ಭಾಗಗಳಾಗಿ ಮೂಡಿಬಂದ ‘ಧುರಂಧರ್’ ಸಿನಿಮಾ ಜಾಗತಿಕ ಬಾಕ್ಸ್ ಆಫೀಸ್‌ನಲ್ಲಿ ಹೊಸ ದಾಖಲೆಯನ್ನು ಬರೆದಿದೆ. ಅತಿ ಹೆಚ್ಚು ಗಳಿಕೆ ಕಾಣುವುದರ ಜೊತೆಗೆ ಹಲವು ಹಳೆಯ ರೆಕಾರ್ಡ್​ಗಳನ್ನು ಉಡೀಸ್​ ಮಾಡಿದೆ. ಜಾಗತಿಕ ಮಟ್ಟದಲ್ಲಿ ಚಿತ್ರವು ಸುಮಾರು 3,200 ಕೋಟಿ ರೂ. ಕಲೆಕ್ಷನ್ ಮಾಡಿದ್ದು, ಭಾರತದಲ್ಲೇ ಬರೋಬ್ಬರಿ 1,900 ಕೋಟಿ ರೂ. ಗಳಿಸಿದೆ. ಇಲ್ಲಿಯವರೆಗೆ ಯಾವೊಬ್ಬ ಸ್ಟಾರ್​ ನಟನಿಗೂ ಸಿಗದ ಬೃಹತ್​ ಮೊತ್ತದ ಸಂಭಾವನೆ ಮತ್ತು ಖ್ಯಾತಿ ಪಡೆದಿರುವ ರಣವೀರ್ ಸಿಂಗ್​, ಸದ್ಯ ಮುಂದಿನ 18 ತಿಂಗಳು ಯಾವುದೇ ಸಂದರ್ಶನ ನೀಡೋದಿಲ್ಲ ಎಂದಿರುವುದು ಅಚ್ಚರಿ ಮೂಡಿಸಿದೆ.

ಆರಂಭದಲ್ಲಿ 'ಡಾನ್ 3' ಚಿತ್ರಕ್ಕೆ ರಣವೀರ್ ಸಿಂಗ್ ಹೆಸರು ಕೇಳಿಬಂದಿತ್ತು. ಆದರೀಗ, ಪ್ರಾಜೆಕ್ಟ್​ನಿಂದ ಅವರು ಎಕ್ಸಿಟ್​ ಆಗಿರುವುದಾಗಿ ಸುದ್ದಿಗಳು ಹರಿದಾಡುತ್ತಿವೆ. ಈ ವಿಚಾರಕ್ಕೆ ಸಂಬಂಧಿಸಿದಂತೆ ಎಲ್ಲಿಯೂ ಮಾತನಾಡಲು ಬಯಸದ ರಣವೀರ್​, ಮುಂದಿನ 18 ತಿಂಗಳು ಸಾರ್ವಜನಿಕವಾಗಿ ವಿವಾದದ ಬಗ್ಗೆ ಎಲ್ಲಿಯೂ ಮಾತನಾಡುವುದಿಲ್ಲ ಎಂದಿದ್ದಾಗಿ ನಟನ ಟೀಮ್​ ಸ್ಪಷ್ಟಪಡಿಸಿದೆ.

ಸಿನಿ ವರದಿಗಳ ಪ್ರಕಾರ, ಇತ್ತೀಚೆಗೆ ಪತ್ರಕರ್ತರೊಬ್ಬರು ರಣವೀರ್ ಅವರೊಂದಿಗೆ ಚಿತ್ರಕ್ಕೆ ಸಂಬಂಧಿಸಿದಂತೆ ಮಾತನಾಡಿದಾಗ, "ನಾನು ಅವರನ್ನು ವೈಯಕ್ತಿಕವಾಗಿ ಭೇಟಿಯಾದೆ. ಈ ಸಂದರ್ಭದಲ್ಲಿ, ಡಾನ್ 3 ವಿವಾದದ ಬಗ್ಗೆ ನಾನೇನು ಪ್ರತಿಕ್ರಿಯೆ ನೀಡಲ್ಲ ಮತ್ತು ಕನಿಷ್ಠ 18 ತಿಂಗಳವರೆಗೆ ಯಾವುದೇ ಸಂದರ್ಶನಗಳನ್ನು ನೀಡುವುದಿಲ್ಲ ಎಂದರು ಎಂದು ತಿಳಿಸಿದ್ದಾರೆ.

ಬಾಲಿವುಡ್​ ಅಂಗಳದಲ್ಲಿ ಹರಿದಾಡುತ್ತಿರುವ ವರದಿಗಳ ಪ್ರಕಾರ, ಜೈ ಮೆಹ್ತಾ ನಿರ್ದೇಶನದ ಮುಂಬರುವ ಚಿತ್ರ 'ಪ್ರಲೇ' ಬಿಡುಗಡೆಯಾಗುವವರೆಗೂ ರಣವೀರ್, ಯಾವುದೇ ಪತ್ರಿಕಾಗೋಷ್ಠಿ ಅಥವಾ ಸಂದರ್ಶನಗಳಲ್ಲಿ ಮಾತನಾಡದಿರಲು ನಿರ್ಧರಿಸಿದ್ದಾರೆ ಎನ್ನಲಾಗಿದೆ. ಇನ್ನು 'ಡಾನ್ 3' ಚಿತ್ರತಂಡದಿಂದ ಅವರು ಎಕ್ಸಿಟ್​ ಆಗಲು ಒಂದಷ್ಟು ಆಂತರಿಕ ಭಿನ್ನಾಭಿಪ್ರಾಯ, ಪ್ರೊಡಕ್ಷನ್​ ಕೆಲಸಗಳಲ್ಲಿ ವಿಳಂಬ ಮತ್ತು ಅಂತಿಮ ಸ್ಕ್ರಿಪ್ಟ್‌ನಲ್ಲಿ ಗೊಂದಲಗಳೇ ಕಾರಣ ಎಂದು ಹೇಳಲಾಗಿದೆ. ಆದರಿದು, ಎಷ್ಟು ನಿಜ ಎಂಬುದು ಇನ್ನೂ ಸ್ಪಷ್ಟವಾಗಬೇಕಿದೆ,(ಏಜೆನ್ಸೀಸ್).