ಪುನೀತ್ ರಾಜಕುಮಾರ್ ಅವರನ್ನು ನೆನಪಿಸಿಕೊಂಡು ಬಹಳ ಭಾವುಕರಾದರು ರಮೇಶ್. ‘ಅವರು ನಿಧನರಾಗುವ ಹಿಂದಿನ ರಾತ್ರಿಯಷ್ಟೇ ಗುರುಕಿರಣ್ ಅವರ ಮನೆಯಲ್ಲಿ ಸಿಕ್ಕಿದ್ದೆವು. ಒಂದು ಮೂಲೆಯಲ್ಲಿ ಕೂತು ಇಬ್ಬರೂ ಊಟ ಮಾಡಿದೆವು. ಎರಡು ಗಂಟೆಗಳ ಕಾಲ ಕಣ್ಣಲ್ಲಿ ಕಣ್ಣಿಟ್ಟು ಮಾತನಾಡಿದವರು, ಮರುದಿನ ತಮ್ಮ ಕಣ್ಣು ದಾನ ಮಾಡಿದರು ಎಂದರೆ ಏನು ಹೇಳಬೇಕು’ ಎಂದು ಪ್ರಶ್ನಿಸುತ್ತಾರೆ ರಮೇಶ್. ಈ ಸಂದರ್ಭದಲ್ಲಿ ಡಿವಿಜಿ ಅವರ ಮಾತೊಂದನ್ನು ನೆನಪಿಸಿಕೊಂಡ ಅವರು, ‘ಹುಲ್ಲು ಹಸಿರಾಗಿರುವುದಕ್ಕೆ ಏನು ಕಾರಣ ಎಂದರೆ, ಅದಕ್ಕೆ ಒಂದೇ ಒಂದು ಕಾರಣ ಇರುವುದಿಲ್ಲ. ಬೆಳಕು, ನೀರು, ಮಣ್ಣು ... ಹೀಗೆ ಹಲವು ಕಾರಣಗಳು ಸೇರಿ ಅದು ಹಸಿರಾಗಿರುತ್ತದೆ. ಅದೇ ರೀತಿ ಪುನೀತ್ ಸಹ ಯಾವುದೋ ಒಂದು ಕಾರಣಕ್ಕೆ ಇಷ್ಟವಾಗುವುದಿಲ್ಲ. ಡ್ಯಾನ್ಸು, ಫೈಟು, ವಿನಯ, ಸರಳತೆ, ಮನೆತನ ಎಲ್ಲವೂ ಸೇರಿದ್ದರಿಂದ ಅವರನ್ನು ಜನ ಇಷ್ಟಪಡುತ್ತಾರೆ’ ಎಂದು ವ್ಯಾಖ್ಯಾನಿಸಿದರು.
