"ಮಣಿಕಣಿರ್ಕಾ: ದಿ ಕ್ವಿನ್ ಆಫ್ ಝಾನ್ಸಿ', "ಎನ್ಟಿಆರ್; ಕಥಾನಾಯಕುಡು' ಸೇರಿ ಹಲವು ಬಿಗ್ ಬಜೆಟ್ನ ಪಿರಿಯಡ್ ಡ್ರಾಮಾ ಶೈಲಿಯ ಸಿನಿಮಾ ಮಾಡಿದ್ದ ನಿರ್ದೇಶಕ ಕ್ರಿಶ್ ಜಗರ್ಲಮುಡಿ ಪವನ್ ಕಲ್ಯಾಣ್ ಸಿನಿಮಾ ಕೈಗೆತ್ತಿಕೊಂಡಿರುವುದು ಗೊತ್ತಿರುವ ವಿಚಾರ, ಇದೀಗ ಇದೇ ಸಿನಿಮಾ ಕುರಿತ ಹೊಸ ಸುದ್ದಿಯೊಂದು ಟಾಲಿವುಡ್ ಅಂಗಳದಲ್ಲಿ ಸದ್ದು ಮಾಡುತ್ತಿದೆ. ಅದೇನೆಂದರೆ, ಈ ಪಿರಿಯಡ್ ಡ್ರಾಮಾ ಶೈಲಿಯ ಸಿನಿಮಾದಲ್ಲಿ ರಾಮ್ಚರಣ್ ತೇಜ ಸಹ ಪ್ರಮುಖ ಪಾತ್ರವೊಂದರಲ್ಲಿ ಕಾಣಿಸಿಕೊಳ್ಳಲಿದ್ದಾರೆ ಎನ್ನಲಾಗುತ್ತಿದೆ!
ಹೌದು, ಇಲ್ಲಿಯವರೆಗೂ ಚಿಕ್ಕಪ್ಪನ ಜತೆ ಯಾವ ಸಿನಿಮಾದಲ್ಲಿಯೂ ಕಾಣಿಸಿಕೊಳ್ಳದ ರಾಮ್ಚರಣ್ ಆ ಆಸೆಯನ್ನು ಕ್ರಿಶ್ ನಿರ್ದೇಶನದ ಸಿನಿಮಾ ಮೂಲಕ ಈಡೇರಿಸಿಕೊಳ್ಳಲಿದ್ದಾರಂತೆ. ಈಗಾಗಲೇ ಚಿತ್ರೀಕರಣ ಪೂರ್ವ ಕೆಲಸದಲ್ಲಿ ತೊಡಗಿಸಿಕೊಂಡಿರುವ ನಿರ್ದೇಶಕರು, ಲಾಕ್ಡೌನ್ ಮುಗಿಯುತ್ತಿದ್ದಂತೆ ಶೂಟಿಂಗ್ಗೆ ಚಾಲನೆ ನೀಡಲಿದ್ದಾರಂತೆ.
ಮೊಘಲ್ ಸಾಮ್ರಾಜ್ಯದ ಹಿನ್ನೆಲೆಯಲ್ಲಿ ಸಿನಿಮಾ ಸಾಗಲಿರುವುದರಿಂದ ಚಿತ್ರದ ವಿಶೇಷ ಅತಿಥಿ ಪಾತ್ರವೊಂದಕ್ಕಾಗಿ ರಾಮ್ ಚರಣ್ ಸೂಕ್ತ ಎಂಬುದನ್ನು ಪವನ್ ಹತ್ತಿರ ಚರ್ಚಿಸಿದ್ದಾರಂತೆ. ಕಥಾನಾಯಕನ ಹಿನ್ನೆಲೆಯನ್ನು ವಿವರಿಸುವ ಪಾತ್ರಧಾರಿಯಾಗಿ ರಾಮ್ ಕಾಣಿಸಿಕೊಳ್ಳಲಿದ್ದಾರಂತೆ. ಎಲ್ಲ ಅಂದುಕೊಂಡಂತೆ ಆದರೆ, "ಆರ್ಆರ್ಆರ್' ಶೂಟಿಂಗ್ ಮುಗಿಯುತ್ತಿದ್ದಂತೆ ಈ ಸಿನಿಮಾ ಕುರಿತು ಚರ್ಚೆ ಮಾಡಲಿದ್ದಾರಂತೆ.
(ಏಜೆನ್ಸೀಸ್)
