Srikanth Bolla Biopic : ಅಂಧತ್ವವನ್ನು ಮೀರಿ ಸಾಧನೆಯ ಬೆಳಕು ಹರಿಸಿದ ವಿಕಲಚೇತನ

ಶ್ರೀಕಾಂತ್​ ಬೊಳ್ಳ, ಆಂಧ್ರ ಪ್ರದೇಶ ಮೂಲದ ಉದ್ಯಮಿ. ಹುಟ್ಟು ಅಂಧನಾಗಿದ್ದ, ಬಡ ಕೃಷಿಕ ಕುಟುಂಬದಿಂದ ಬಂದ ಯುವಕ. ಅಂಧನಾದ ಕಾರಣಕ್ಕೆ 10ನೇ ತರಗತಿಯ ಬಳಿಕ ವಿಜ್ಞಾನ ವಿಷಯದಲ್ಲಿ ಪಿಯು ಮಾಡಲು ಸಾಧ್ಯವಿಲ್ಲ ಎಂದ ಕಾಲೇಜಿನ ವಿರುದ್ಧ ಕೋರ್ಟ್​ ಮೆಟ್ಟಿಲೇರಿ, ಆರು ತಿಂಗಳ ಬಳಿಕ ಕಾಲೇಜು ಸೇರಿ, 12ನೇ ತರಗತಿಯಲ್ಲಿ ಶೇಕಡಾ 98ರಷ್ಟು ಅಂಕ ಪಡೆದ ಹಠವಾದಿ. ಐಐಟಿಯಲ್ಲಿ ಮತ್ತದೇ ಅಂಧತ್ವ ಅಡ್ಡ ಬಂದಾಗ, ಅಮೆರಿಕದ ಮಸಾಚುಸೆಟ್ಸ್​ ಇನ್​ಸ್ಟಿಟ್ಯೂಟ್​ ಆಫ್​ ಟೆಕ್ನಾಲಜಿ ಸೇರಿದ ಮೊದಲ ಅಂತಾರಾಷ್ಟ್ರೀಯ ವಿದ್ಯಾರ್ಥಿ ಎಂಬ ಹೆಗ್ಗಳಿಕೆ ಪಡೆದ ಗಟ್ಟಿಗ.

2018ರಲ್ಲಿ ಬೊಳ್ಳಾಂಟ್​ ಇಂಡಸ್ಟ್ರೀಸ್​ ಹೆಸರಿನಲ್ಲಿ ಕೈಗಾರಿಕೋದ್ಯಮ ಪ್ರಾರಂಭಿಸಿ ಸಾವಿರಾರು ಜನರಿಗೆ ಉದ್ಯೋಗ ನೀಡಿರುವ, ನೂರಾರು ಕೋಟಿ ರೂ. ವಹಿವಾಟು ನಡೆಸುತ್ತಿರುವ ಖ್ಯಾತಿ ಶ್ರೀಕಾಂತ್​ಗೆ ಸಲ್ಲುತ್ತದೆ. ಇದೀಗ ಅವರದೇ ಹೆಸರಿನ "ಶ್ರೀಕಾಂತ್​' ಚಿತ್ರದ ಮೂಲಕ ಬೊಳ್ಳ ಅವರ ಜೀವನದ ಮೇಲೆ ಬೆಳಕು ಚೆಲ್ಲುವ ಪ್ರಯತ್ನ ಮಾಡಿದ್ದಾರೆ ನಿರ್ದೇಶಕ ತುಷಾರ್​ ಹೀರಾನಂದಾನಿ.

"ಶಾಹಿದ್​', "ಅಲೀಗಢ್​'ನಂತಹ ಬಯೋಪಿಕ್​ಗಳಲ್ಲಿ ನಟಿಸಿರುವ ರಾಜಕುಮಾರ್​ ರಾವ್​ ಈ ಚಿತ್ರದಲ್ಲಿ ಶ್ರೀಕಾಂತ್​ ಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ಇತ್ತೀಚೆಗಷ್ಟೆ ಸಿನಿಮಾದ ಟ್ರೇಲರ್​ ರಿಲೀಸ್​ ಆಗಿದ್ದು, ಕುತೂಹಲ ಮೂಡಿಸುವಂತಿದೆ. "ಶ್ರೀಕಾಂತ್​' ಚಿತ್ರ ಇದೇ ಮೇ 10ರಂದು ತೆರೆಗೆ ಬರಲಿದೆ.