ಅದು ಮಾರ್ಲೂರು. ಕಾಂಟ್ರಾಕ್ಟರ್ ರವಿ ಅಣ್ಣ (ಶನೀಲ್ ಗೌತಮ್) ಊರಿನ ಅಘೋಷಿತ ಲೀಡರ್. ಊರಿನಲ್ಲಿ ತಿಥಿ, ಮದುವೆ ಅಥವಾ ಏನೇ ಕಾರ್ಯಕ್ರಮ ನಡೆದರೂ ಅದರ ಮುಂದಾಳತ್ವ ಆತನದು. ಆತ ರೆಡಿ ಇಲ್ಲದಿದ್ದರೂ ಆತನ ಹಿಂಬಾಲಕ ಸತೀಶಣ್ಣ (ದೀಪಕ್ ರೈ) ಬಿಡುವುದಿಲ್ಲ. ಆದರೆ, ಮಾರ್ಲೂರಿನ ನಿವೃತ್ತ ಬ್ಯಾಂಕ್ ಮ್ಯಾನೇಜರ್ ಯದು ಅಣ್ಣನಿಗೆ (ಮೈಮ್ ರಾಮದಾಸ್) ತಾನು ಅಲ್ಲಿನ ಲೀಡರ್ ಆಗಬೇಕು ಎಂಬಾಸೆ. ಅದರ ನಡುವೆಯೇ ಊರಿನಲ್ಲಿ ಮದುವೆಯ ಸಂಭ್ರಮ ಮನೆ ಮಾಡಿರುತ್ತದೆ. ಅದೇ ಸಮಯದಲ್ಲಿ ಅಜ್ಜಿಯೊಬ್ಬರು ವಿಧಿವಶರಾಗುತ್ತಾರೆ. ಅದೆರಡರ ನಡುವೆಯೇ ಪೇಂಟರ್ ಅಶೋಕನಿಗೆ (ಜೆಪಿ ತುಮಿನಾಡ್) ದೆವ್ವ ಮೆಟ್ಟಿಕೊಳ್ಳುತ್ತದೆ. ಅದು ಸೋಮೇಶ್ವರದ ಸುಲೋಚನ ಆತ್ಮ ಅಂತ ಊರಿನವರಿಗೆ ತಿಳಿಯುತ್ತದೆ. ಅಶೋಕನಿಗೆ ಹಿಡಿದ ದೆವ್ವವನ್ನು ಬಿಡಿಸಲು ಊರಿನವರೆಲ್ಲ ಒಂದಾಗುತ್ತಾರೆ? ತಮ್ಮ ಕೆಲಸದಲ್ಲಿ ಯಶಸ್ವಿ ಆಗುತ್ತಾರಾ? ಎಂಬುದೇ "ಸು ಫ್ರಮ್ ಸೋ'. ಆದರೆ ಚಿತ್ರದಲ್ಲಿ ಅದಕ್ಕೂ ಮೀರಿದ ಅಂಶಗಳಿವೆ, ಸಂದೇಶವಿದೆ. ಕರಾವಳಿಯ ಗ್ರಾಮೀಣ ಪ್ರದೇಶದಲ್ಲಿ ಒಂಟಿ ಮಹಿಳೆಯರು ಎದುರಿಸುವ ಸಮಸ್ಯೆಗಳು, ಜನರ ಮೂಢನಂಬಿಕೆ, ಆಚರಣೆಗಳ ಜತೆಗೆ ಗೆಳೆತನ, ಸಾಹಸ, ಸಸ್ಪೆನ್ಸ್, ಪ್ರೀತಿ... ಎಲ್ಲಕ್ಕಿಂತ ಮಿಗಿಲಾಗಿ ಹೊಟ್ಟೆ ಹುಣ್ಣಾಗುವಷ್ಟು ನಗಿಸುವ ಹಾಸ್ಯವಿದೆ.
