ಈ ಬಗ್ಗೆ ಆಯುಷ್ ಮಲ್ಲಿ, ‘‘ಪಪ್ಪಿ’ ಚಿತ್ರಕ್ಕೆ ಎಲ್ಲೆಡೆ ಉತ್ತಮ ಪ್ರತಿಕ್ರಿಯೆ ವ್ಯಕ್ತವಾಗುತ್ತಿದ್ದು, ಸಿನಿಮಾ ವೀಕ್ಷಿಸಿದ ಬಹುತೇಕ ಪ್ರೇಕ್ಷಕರು ‘ಪಪ್ಪಿ 2’ ಸಿನಿಮಾ ಮಾಡಿ ಎಂದು ಆಪೇಕ್ಷೆ ವ್ಯಕ್ತಪಡಿಸಿದರು. ನಮಗೂ ಹೌದು ಅಂತನ್ನಿಸಿತು. ಹೀಗಾಗಿ ನಾವು ಕೂಡ ಸಿದ್ಧತೆ ನಡೆಸುತ್ತಿದ್ದೇವೆ. ಖಂಡಿತವಾಗಿಯೂ ‘ಪಪ್ಪಿ 2’ ಬರಲಿದೆ. ಈಗಾಗಲೇ ಸ್ಕ್ರಿಪ್ಟ್ ಹಂತ ಮುಗಿಸಿದ್ದು, ಶೂಟಿಂಗ್ ಹೋಗುವ ಯೋಚನೆ ಮಾಡುತ್ತಿದ್ದೇವೆ. ‘ಪಪ್ಪಿ 2’ ಚಿತ್ರದಲ್ಲಿ ಉತ್ತರ ಕರ್ನಾಟಕ ಜನರ ಜೀವನ, ಸಂಸ್ಕೃತಿಗಳ ಮೇಲೆ ಬೆಳಕು ಚೆಲ್ಲುವ ಪ್ರಯತ್ನ ಮಾಡುತ್ತೇವೆ. ಇದೇ ಕಲಾ ಬಳಗ ಮುಂದುವರಿಯಲಿದೆ. ಜತೆಗೆ ಒಂದಿಷ್ಟು ಹೊಸ ಕಲಾವಿದರು ಸೇರ್ಪಡೆಯಾಗಲಿದ್ದಾರೆ. ಪ್ರೇಕ್ಷಕರ ಅಪೇಕ್ಷೆಯೇ ನಮ್ಮ ಸಿನಿಮಾಕ್ಕೆ ನಾಂದಿಯಾಯಿತು’ ಎಂದು ಖುಷಿ ವ್ಯಕ್ತಪಡಿಸುತ್ತಾರೆ. ಸದ್ಯ ‘ಪಪ್ಪಿ’ ಬೆಂಗಳೂರು, ಹುಬ್ಬಳ್ಳಿ, ರಾಯಚೂರು, ಸಿಂಧನೂರು, ಇಳಕಲ್, ಶಿವಮೊಗ್ಗ ಸೇರಿ ರಾಜ್ಯಾದ್ಯಂತ 20 ಪ್ರದರ್ಶನಗಳನ್ನು ಕಾಣುತ್ತಿದೆ. ಒಟಿಟಿ ಹಾಗೂ ಟಿವಿ ರೈಟ್ಸ್ ಮಾತುಕತೆಯಾಗಿದ್ದು, ಅದರ ಬಗ್ಗೆಯೂ ಸದ್ಯದಲ್ಲೇ ಮಾಹಿತಿ ನೀಡುವುದಾಗಿ ನಿರ್ದೇಶಕ ಆಯುಷ್ ಮಲ್ಲಿ ಹೇಳಿಕೊಳ್ಳುತ್ತಾರೆ.
