ಅದು ಕೊತ್ತಲವಾಡಿ. ಅಲ್ಲೊಬ್ಬ ಅನಾಥ ಮೋಹನ (ಪೃಥ್ವಿ). ಕೂಲಿಗೆ, ಅನಾಥ ಹೆಣಗಳ ಮುಂದೆ ಅಳೋಕೆ ಜನರನ್ನು ಕಳಿಸುವ ಮೇಸ್ತ್ರಿ. ಮೋಹನನಿಗೂ ಅಪ್ಪ, ಅಮ್ಮನ್ನ ಕಳೆದುಕೊಂಡು ಅಜ್ಜಿ ನೆರಳಲ್ಲಿರುವ ಮಂಜಿಗೂ (ಕಾವ್ಯ) ಪ್ರೀತಿ. ಅದೇ ಊರಿನ ಗುಜರಿ ವ್ಯಾಪಾರಿ ರಮೇಶ್ ಬಾಬು ಆಲಿಯಾಸ್ ಸ್ಕ್ರ್ಯಾಪ್ ಬಾಬು (ಗೋಪಾಲಕೃಷ್ಣ). "ತುಟಿಗೆ ಜೇನು ಸವರಿ, ತುತ್ತಿಗೆ ವಿಷ ಬೆರೆಸೋ ಕುತಂತ್ರಿ', "ರಕ್ತಬೀಜಾಸುರನ ಸಂತಾನ'. ಬಾಬಣ್ಣನ ದೇವರು ಕೊಟ್ಟ ತಮ್ಮ ಈ ಮೋಹನ. ರಾಜಕೀಯ ಮತ್ತು ಧರ್ಮ ಎರಡೂ ಜಗತ್ತಿನಲ್ಲೇ ಅತಿಹೆಚ್ಚು ಸಂಪಾದನೆ ತಂದುಕೊಡುವ ಆಟಗಳು ಅಂತ ಗೊತ್ತಾಗಿ, ಜನರನ್ನು ಮಾತಿನಿಂದ ಮರುಳು ಮಾಡಿ ಅಕ್ರಮ ಮರಳು ಸಾಗಾಣಿಕೆ ದಂಧೆ ಪ್ರಾರಂಭಿಸುತ್ತಾನೆ. ಹಿಂದೆ ಹೆಂಡತಿಯಿಲ್ಲ, ಮುಂದೆ ಮಕ್ಕಳಿಲ್ಲ ಆದರೂ ಬಾಬಣ್ಣನಿಗೆ "ಪವರ್' ಮೇಲೆ ಆಸೆ ಹೆಚ್ಚುತ್ತದೆ. ಕೊತ್ತಲವಾಡಿ ಎಂಎಲ್ಎ ತಮ್ಮಣ್ಣ ತೀರಿಕೊಂಡ ವಿಷಯ ಕೇಳಿ ತಾನೇಕೆ ಶಾಸಕನಾಗಬಾರದು ಎಂಬ ಐಡಿಯಾ ಹೊಳೆಯುತ್ತದೆ. ಅದರ ನಡುವೆಯೇ ಮತ್ತೊಂದೆಡೆ ಎಸ್ಪಿ ಪರಶುರಾಮ್ (ರಾಜೇಶ್) ಶತಾಯಗತಾಯ ಅಕ್ರಮ ಮರಳು ಮಾಫಿಯಾಗೆ ಅಂತ್ಯ ಹಾಡಲು ಮುಂದಾಗುತ್ತಾರೆ. ಹಾಗಾದರೆ ಮಣ್ಣಿಗಾಗಿ ನಡೆಯುವ ಹೋರಾಟದಲ್ಲಿ ಯಾರು ಮಣ್ಣು ಮುಕ್ಕಿಸುತ್ತಾರೆ? ಯಾರು ಮಣ್ಣಾಗುತ್ತಾರೆ? ತಿಳಿಯಲು "ಕೊತ್ತಲವಾಡಿ' ನೋಡಿ.
