ಪಾತ್ರಕ್ಕಾಗಿ ತಲೆ ಬೋಳಿಸಿಕೊಳ್ತಾರಾ ಪವನ್​ ಕಲ್ಯಾಣ್​?

ಹೈದರಾಬಾದ್​: ಲಾಕ್​ಡೌನ್​ ಮುಗಿದ ನಂತರ ಟಾಲಿವುಡ್​ ನಟ 'ಪವರ್​ ಸ್ಟಾರ್​' ಪವನ್​ ಕಲ್ಯಾಭ್​ ಅವರು ಸದ್ದಿಲ್ಲದೆ 'ವಕೀಲ್​ ಸಾಬ್​' ಚಿತ್ರ ಮುಗಿಸಿದ್ದಾರೆ. ಸದ್ಯದಲ್ಲೇ ಮಲಯಾಳಂ ಹಿಟ್​ 'ಅಯ್ಯಪ್ಪನುಂ ಕೋಶಿಯುಂ' ಚಿತ್ರದ ತೆಲುಗು ರೀಮೇಕ್​ನಲ್ಲಿ ರಾಣಾ ದಗ್ಗುಬಾಟಿ ಅವರ ಜತೆಗೆ ಕಾಣಿಸಿಕೊಳ್ಳುವುದಕ್ಕೆ ಸಜ್ಜಾಗಿದ್ದಾರೆ.

ಇದನ್ನೂ ಓದಿ: ಈ ವರ್ಷ ಬಾಲಿವುಡ್​ನಲ್ಲಿ ಗಟ್ಟಿಮೇಳ ಗಟ್ಟಿಮೇಳ …

ಈ ಮಧ್ಯೆ, ಪವನ್ ಕಲ್ಯಾಣ್​, ಕೃಷ್​​ ನಿರ್ದೇಶನದಲ್ಲಿ ಹೊಸ ಚಿತ್ರವೊಂದರಲ್ಲಿ ನಟಿಸುವುದಕ್ಕೆ ಒಪ್ಪಿಕೊಂಡಿದ್ದಾರೆ. ಈ ಕೃಷ್​ ಯಾರು ಗೊತ್ತಲ್ಲಾ? ಈ ಹಿಂದೆ, ನಂದಮೂರಿ ಬಾಲಕೃಷ್ಣ ಅಭಿನಯದ 'ಗೌತಮಿಪುತ್ರ ಶಾತಕರ್ಣಿ' ಮತ್ತು 'ಕಂಚೆ' ಚಿತ್ರಗಳನ್ನು ನಿರ್ದೇಶಿಸಿದ್ದರು. ಇದೀಗ ಕೃಷ್​, 'ವಿರೂಪಾಕ್ಷ' ಎಂಬ ಚಿತ್ರವನ್ನು ನಿರ್ದೇಶಿಸುತ್ತಿದ್ದು, ಇದರಲ್ಲಿ ಪವನ್​ ಕಲ್ಯಾಣ್​ ನಾಯಕನಾಗಿ ಅಭಿನಯಿಸುತ್ತಿದ್ದಾರೆ.

ಕೊಹಿನೂರ್​ ವಜ್ರದ ಕಳ್ಳತನದ ಹಿನ್ನೆಲೆಯಲ್ಲಿ ಈ ಚಿತ್ರದ ಕಥೆ ಸಾಗಲಿದ್ದು, ಈ ಚಿತ್ರದಲ್ಲಿ ಪವನ್​ ಕಲ್ಯಾಣ್ ಕಳ್ಳನ ಪಾತ್ರದಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರೆ ಎಂದು ಹೇಳಲಾಗುತ್ತಿದೆ. ತಮ್ಮ ಪಾತ್ರಕ್ಕಾಗಿ ಪವನ್​ ಕಲ್ಯಾಣ್​ ಸಂಪೂರ್ಣ ಬಾಲ್ಡ್​ ಆಗಬೇಕಿದೆಯಂತೆ. ಪ್ರಾಸ್ಥೆಟಿಕ್ಸ್​ ಮತ್ತು ವಿಗ್​ ಹಾಕಿ ಏನಾದರೂ ಮಾಡಿದರಾಯಿತು ಎಂದು ಪವನ್​ ಕಲ್ಯಾಣ್​ ಹೇಳಿದರಂತೆ. ಆದರೆ, ಅದಕ್ಕಿಂತ ಹೆಚ್ಚಾಗಿ ತಲೆ ಬೋಳಿಸಿಕೊಂಡರೆ ಸಖತ್​ ನ್ಯಾಚುರಲ್​ ಆಗಿರುತ್ತದೆ ಎಂದು ಕೃಷ್​ ಹೇಳಿದ್ದಾರಂತೆ.

ತಲೆ ಬೋಳಿಸುವುದರಿಂದ ಪವನ್​ಗೆ ಅಷ್ಟೇನೂ ಸಮಸ್ಯೆ ಇಲ್ಲವಂತೆ. ಆದರೆ, ತಲೆ ಬೋಳಿಸಿದರೆ, ಮುಂದಿನ ಚಿತ್ರಗಳ ಗತಿಯೇನು ಎಂಬುದು ಅವರ ಪ್ರಶ್ನೆ. ಅಷ್ಟೇ ಅಲ್ಲ, ಕೂದಲು ಬೆಳೆಯುವುದಕ್ಕೆ ಒಂದಿಷ್ಟು ಸಮಯ ಬೇಕಾಗುವದರಿಂದ, ಮತ್ತೆ ಒಂದಿಷ್ಟು ದಿನಗಳ ಕಾಲ ಸುಮ್ಮನೆ ಕಾಯಬೇಕಾಗುತ್ತದೆ ಎಂಬುದು ಪವನ್​ ಯೋಚನೆ. ಅದೇ ಕಾರಣಕ್ಕೆ, ನಿರ್ದೇಶಕರ ಮಾತಿಗೆ ಒಪ್ಪುವುದೋ, ಬೇಡವೋ ಎಂಬ ತೀರ್ಮಾನಕ್ಕೆ ಅವರಿಗೆ ಬರಲಾಗುತ್ತಿಲ್ಲವಂತೆ.

ಇದನ್ನೂ ಓದಿ: ಚಿತ್ರ ವಿಮರ್ಶೆ| ತಾತ್ಸಾರ ತಾಕಲಾಟಗಳ ಬಂಧದೊಳಗೆ ಅಮೃತವಾಹಿನಿ…

ಈ ಚಿತ್ರವನ್ನು ಎ.ಎಂ. ರತ್ನಂ ನಿರ್ಮಿಸುತ್ತಿದ್ದು, ಅನಸೂಯ ಭಾರದ್ವಾಜ್​ ಒಂದು ಪ್ರಮುಖ ಪಾತ್ರದಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರಂತೆ. ಆಕೆ ತೆರೆಯ ಮೇಲೆ ಕೇವಲ ಅರ್ಧ ಗಂಟೆ ಬಂದರೂ, ಆಕೆಯ ಪಾತ್ರ ಇಡೀ ಚಿತ್ರಕ್ಕೆ ಒಂದು ತಿರುವು ನೀಡುತ್ತದೆ ಎಂದು ಹೇಳಲಾಗುತ್ತಿದೆ.

https://www.vijayavani.net/advance-booking-for-master-starts/