ಈ ಲಾಕ್ಡೌನ್ ಸಮಯದಲ್ಲಿ ನಾನು ತುಂಬಾ ಸಿನಿಮಾ ನೋಡಿದ್ದೆ. ಅದರಲ್ಲಿ ಈಗಿನ ಸಮಯಕ್ಕೆ ಹೆಚ್ಚು ಸೂಕ್ತ ಅನಿಸುವಂಥ ಒಂದು ಸಿನಿಮಾ ಎಂದರೆ ‘ಒನ್ ಪ್ಲಾ್ಯನೆಟ್’. ಐವತ್ತು ನಿಮಿಷಗಳ ಡಾಕ್ಯುಮೆಂಟರಿಯಂಥ ಈ ಸಿನಿಮಾ ಮಾಹಿತಿ-ಮನರಂಜನೆ ಎರಡನ್ನೂ ಒಳಗೊಂಡಿದೆ. ಇದನ್ನು ನೋಡಿದರೆ ನಮಗೆ ಪ್ರಾಣಿ, ಪಕ್ಷಿ, ನೀರು ಹಾಗೂ ಭೂಮಿ ಕುರಿತ ಕಲ್ಪನೆಯೇ ಬದಲಾಗಿ ಬಿಡುತ್ತದೆ. ಈ ಸಿನಿಮಾ ನೋಡಿ ಅಂತ ಮೊನ್ನೆ ವಿಶ್ವ ಭೂಮಿ ದಿನ ನಾನು ಬಹಳಷ್ಟು ಮಂದಿಗೆ ಹೇಳಿದ್ದೆ, ನೋಡಿದವರೆಲ್ಲರೂ ಒಳ್ಳೆಯ ಪ್ರತಿಕ್ರಿಯೆ ನೀಡಿದ್ದಾರೆ. ಅದೇ ಮಾತನ್ನು ಈಗ ಮತ್ತೊಮ್ಮೆ ಹೇಳುತ್ತೇನೆ. ಈ ಸಿನಿಮಾ ಎಲ್ಲರೂ ನೋಡಲೇಬೇಕಾದಂಥದ್ದು, ಅದರಲ್ಲೂ ಕರೊನಾ ಕಾಡುತ್ತಿರುವ ಈ ಸಮಯದಲ್ಲಿ ಇದು ಹೇಳಿ ಮಾಡಿಸಿದಂಥ ಸಿನಿಮಾ. ಮನುಷ್ಯ ನಾನೇ ಎಲ್ಲ, ನಾನು ಏನು ಬೇಕಾದರೂ ಮಾಡಬಲ್ಲೆ ಎಂದುಕೊಂಡಿರುತ್ತಾನೆ. ಆದರೆ ಈಗ ಕಣ್ಣಿಗೆ ಕಾಣದ ಸಣ್ಣ ವೈರಸ್ ಜಗತ್ತನ್ನೇ ನಡುಗಿಸಿಬಿಟ್ಟಿದೆ. ಅದಕ್ಕೆ ಹೆದರಿದ ಮನುಷ್ಯ ಮನೆಯೊಳಗೇ ಕುಳಿತಿರುವುದರಿಂದ ಪ್ರಕೃತಿ ಕೂಡ ನಳನಳಿಸುತ್ತಿದೆ. ನಾನಿಲ್ಲ ಎಂದರೆ ಏನೂ ಇರುವುದಿಲ್ಲ ಎಂಬ ಅಹಂ ಮನುಷ್ಯನಿಗಿದೆ. ಅಂಥ ಅಹಂ ನೀಗಿಸುವ ಚಿತ್ರಣ ಈ ಸಿನಿಮಾದಲ್ಲಿದೆ. ಮನುಷ್ಯ ತಾನೇ ಎಲ್ಲದರ ಕೇಂದ್ರ ಬಿಂದು ಎಂದಕೊಂಡಿರುತ್ತಾನೆ. ಆದರೆ ಅವೆಲ್ಲ ಸುಳ್ಳು ಎನ್ನುವುದು ಈ ಸಿನಿಮಾದಿಂದ ತಿಳಿಯತ್ತದೆ. ಮನುಷ್ಯ ಇಲ್ಲ ಅಂದರೆ ಈ ಜಗತ್ತಿಗೆ ಏನೂ ಆಗುವುದಿಲ್ಲ. ಅದು ಈ ಕರೊನಾ ಸಮಯದಲ್ಲಿ ಎಲ್ಲರ ಗಮನಕ್ಕೂ ಬಂದಿದೆ. ಈ ಸೃಷ್ಟಿ ಅದೆಷ್ಟು ವಿಶಿಷ್ಟವಾದದ್ದು ಎನ್ನುವುದನ್ನು ತಿಳಿಯ ಬೇಕಿದ್ದರೆ ‘ಒನ್ ಪ್ಲಾ್ಯನೆಟ್’ ಖಂಡಿತ ನೋಡಿ.
