ಚಿತ್ರದ ಇನ್ನೊಂದು ಹೈಲೈಟ್ ಎಂದರೆ, ಆಗಿನ ಕಾಲಕ್ಕೆ ರೌಡಿಸಂನಲ್ಲಿ ಗುರುತಿಸಿಕೊಂಡವರು ನಟಿಸಿದ್ದು. ಈ ಕುರಿತು ಮಾತನಾಡುವ ಉಪೇಂದ್ರ, ‘ರೌಡಿಸಂ ಬೇಡ ಅನ್ನೋಕೆ ಮೂರು ಪಾತ್ರಗಳ ಅವಶ್ಯಕತೆ ಇತ್ತು. ಆ ಸಂದೇಶವನ್ನು ನಿಜವಾದ ರೌಡಿಗಳಿಂದಲೇ ಹೇಳಿಸಿದರೆ ಹೇಗೆ ಎಂಬ ಐಡಿಯಾ ಬಂತು. ಆದರೆ, ಅದು ಸಾಧ್ಯವಾ ಎಂಬ ಪ್ರಶ್ನೆ ಇತ್ತು. ಕೊನೆಗೆ ಕೆಲವರ ಮೂಲಕ ಜೇಡರಹಳ್ಳಿ ಕೃಷ್ಣಪ್ಪ, ಬೆಕ್ಕಿನ ಕಣ್ಣು ರಾಜೇಂದ್ರ, ಕೊರಂಗು ಕೃಷ್ಣ, ತನ್ವೀರ್ ಅಹ್ಮದ್ ಅವರ ಭೇಟಿಯಾಯಿತು. ಅವರಿಗೆ ಕಥೆ ಹೇಳಿದಾಗ, ನಾವು ಸಹ ಆಕ್ಟ್ ಮಾಡಬೇಕಾ ಎಂದು ಥ್ರಿಲ್ ಆದರು. ನಟನೆ ಬೇಡ, ನೈಜವಾಗಿರಿ ಅಂತ ಹೇಳಿ, ಅವರಿಂದ ಪಾತ್ರ ಮಾಡಿಸಲಾಯಿತು’ ಎಂದು ನೆನಪಿಸಿಕೊಳ್ಳುತ್ತಾರೆ ಉಪೇಂದ್ರ.
