ಬೆಂಗಳೂರು: ‘ನನಗೆ ಬೇಕಾಗಿರುವುದು ಸಾವು. ನನಗೆ ದಯಾಮರಣ ಕೊಡಿ ...’ ಎಂದು ಇತ್ತೀಚೆಗಷ್ಟೇ ಕೇಳಿದ್ದ ನಟಿ ಜಯಶ್ರೀ ರಾಮಯ್ಯ, ಇದೀಗ ಆಸ್ಪತ್ರೆಯಿಂದ ಚೇತರಿಸಿಕೊಂಡು ಬಂದಿದ್ದಾರೆ. ಅಷ್ಟೇ ಅಲ್ಲ, ತಮ್ಮ ಕೇಶಮುಂಡನ ಮಾಡಿಸಿರುವ ಅವರು, ‘ಒಳ್ಳೆಯ ನಾಳಿನ ಕಡೆಗೆ ಮೊದಲ ಹೆಜ್ಜೆ ...’ ಎಂದು ಸೋಷಿಯಲ್ ಮೀಡಿಯಾದಲ್ಲಿ ಬರೆದುಕೊಂಡಿದ್ದಾರೆ. ಕೆಲವು ದಿನಗಳ ಹಿಂದೆ ಜಯಶ್ರೀ ರಾಮಯ್ಯ ತೀವ್ರ ಮಾನಸಿಕ ಒತ್ತಡದಿಂದ ಆತ್ಮಹತ್ಯೆ ಮಾಡಿಕೊಳ್ಳುವುದಾಗಿ ಸೋಷಿಯಲ್ ಮೀಡಿಯಾದಲ್ಲಿ ಬರೆದುಕೊಂಡಿದ್ದರು. ಈ ಖಿನ್ನತೆ ತಡೆದುಕೊಳ್ಳಲಾಗುತ್ತಿಲ್ಲ, ಜೀವನ ಸಾಕಾಗಿದೆ ಎಂದು ಹೇಳಿಕೊಂಡಿದ್ದರು. ಇದರಿಂದ ಅವರ ಆಪ್ತರು ಸಾಕಷ್ಟು ಆತಂಕಗೊಂಡಿದ್ದರು. ಆ ನಂತರ ಇನ್ನೊಂದು ವಿಡಿಯೋದಲ್ಲಿ ಮಾತನಾಡಿದ್ದ ಅವರು, ‘ನನಗೆ ಧನಸಹಾಯದ ಅವಶ್ಯಕತೆ ಇಲ್ಲ. ನಾನು ಯಾರ ಬಳಿಯೂ ಧನಸಹಾಯ ಕೇಳಿಲ್ಲ. ನನಗೀಗ ಬೇಕಿರುವುದು ಸಾವು. ತುಂಬಾ ಖಿನ್ನತೆಗೊಳಗಾಗಿದ್ದೇನೆ. ನನ್ನಿಂದ ಸಹಿಸಿಕೊಳ್ಳಲು ಸಾಧ್ಯವಾಗುತ್ತಿಲ್ಲ. ನನಗೆ ದಯಾಮರಣ ಕೊಡಿ’ ಎಂದು ಕೇಳಿದ್ದರು. ಈ ವಿಷಯವಾಗಿ, ನಟ ಸುದೀಪ್ ಸೇರಿದಂತೆ ಹಲವರು ಅವರಿಗೆ ಧೈರ್ಯ ತುಂಬಿದ್ದರು. ಹೊಸ ಭರವಸೆಗಳೊಂದಿಗೆ ಬದುಕು ಪ್ರಾರಂಭಿಸಲು ಸಲಹೆ ನೀಡಿದ್ದರು. ಅದರಂತೆ, ಜಯಶ್ರೀ ಈಗ ಹೊಸ ಹೆಜ್ಜೆ ಇಟ್ಟಿದ್ದಾರೆ. ಮೊದಲ ಹಂತವಾಗಿ ತಲೆ ಬೋಳಿಸಿಕೊಂಡಿರುವ ಅವರು, ಆ ಫೋಟೋ ಹಂಚಿಕೊಂಡಿದ್ದಾರೆ.
