ಬೆಂಗಳೂರು: ಕರೊನಾ ಕುರಿತು ಈಗಾಗಲೇ ಸಾಕಷ್ಟು ಹಾಡುಗಳು ಮೂಡಿಬಂದಿವೆ. ಬಗೆಬಗೆ ಸಾಹಿತ್ಯದ, ನಾನಾ ಪರಿಕಲ್ಪನೆಗಳ ಹಾಡುಗಳನ್ನು ಕೇಳಿದ್ದೇವೆ. ಇದೀಗ ಅವೆಲ್ಲದಕ್ಕಿಂತ ಕೊಂಚ ವಿಭಿನ್ನ ಪ್ರಯತ್ನ ಮಾಡಿದ್ದಾರೆ ನಟ-ನಿರ್ದೇಶಕ ನವೀನ್ ಕೃಷ್ಣ. ವಾದ್ಯಗಳ ಬಳಕೆ ಮಾಡಿಕೊಳ್ಳದೆ, ಕೇವಲ ಬಾಯಿಂದಲೇ ವಾದ್ಯದ ರೀತಿಯ ನಾದವನ್ನು ಹೊರಡಿಸಿ ಹಾಡನ್ನು ಸೃಷ್ಟಿಸಿದ್ದಾರೆ. ‘ಏನೇ ಮಾಡು ಕರೊನಾ, ನಡಿಯಬೇಕು ಜೀವನ, ನೋಡೇ ಬಿಡೋಣ, ಇನ್ನು ನಾನಾ ಇಲ್ಲ ನೀನಾ ...’ ಎಂಬ ಸಾಹಿತ್ಯವಿರುವ ಹಾಡು ಈಗಾಗಲೇ ಸಿದ್ಧವಾಗಿದ್ದು, ಸೆ. 25ಕ್ಕೆ ನವೀನ್ ಕೃಷ್ಣ ಯೂಟ್ಯೂಬ್ ಚಾನೆಲ್ನಲ್ಲಿ ಬಿಡುಗಡೆ ಆಗಲಿದೆ. ಅಂದಹಾಗೆ, ಈ ಹಾಡಿಗೆ ಸಾಯಿ ಸುಕನ್ಯಾ ಎಂಬುವವರು ಸಾಹಿತ್ಯ ಬರೆದಿದ್ದು, ಸಂಗೀತ ಸಂಯೋಜನೆ ಮಾಡಿ, ಧ್ವನಿಯನ್ನು ನೀಡಿರುವುದು ನವೀನ್ ಕೃಷ್ಣ.
