ಚಿಕ್ಕಂದಿನಿಂದಲೂ ದೊಡ್ಡ ಸ್ಟಾರ್ ಆಗಬೇಕು ಎಂದು ಕನಸು ಕಂಡವನು ರಾಜ (ದೀಪಕ್ ಸುಬ್ರಹ್ಮಣ್ಯ). ಆತನ ಹೀರೋ ಕನಸಿಗೆ ಅಪ್ಪನೇ ವಿಲನ್. ಮಗ ಚೆನ್ನಾಗಿ ಓದಿ ಇಂಜಿನಿಯರ್ ಆಗಬೇಕೆಂಬುದು ಅವರ ಕನಸು. ಆದರೆ, ರಾಜ ಮಾತ್ರ ತನ್ನ ಹೀರೋ ಕನಸನ್ನು ಈಡೇರಿಸಿಕೊಳ್ಳಲು ಸುಳ್ಳು ಕಥೆ ಕಟ್ಟುತ್ತಾನೆ. ಸಿನಿಮಾ ಅವಕಾಶಕ್ಕಾಗಿ ಬೀದಿ ಬೀದಿ ಅಲೆದಾಡುತ್ತಾನೆ. ಆದರೂ ಅವಕಾಶ ಸಿಗುವುದಿಲ್ಲ. ಈ ಸಮಯದಲ್ಲಿ ಬಣ್ಣ ಬದಲಿಸಿಕೊಂಡು, ಹೀರೋಯಿನ್ ವೇಷ ಧರಿಸುವ ರಾಜ, ರಾಣಿಯಾಗುತ್ತಾನೆ. ಬಳಿಕ ಅದೃಷ್ಟವೇ ಬದಲಾಗಿಬಿಡುತ್ತದೆ. ನಂ.1 ಹೀರೋ ಆಗಬೇಕೆಂದು ಕನಸು ಕಂಡಾತ, ನಂ.1 ಹೀರೋಯಿನ್ ಆಗುತ್ತಾನೆ. ‘ಅವಳು ಅವಳಲ್ಲ, ಅವನು’ ಎಂಬ ಸತ್ಯ ಜನರಿಗೆ ಗೊತ್ತಾಗುತ್ತಾ? ಮುಂದೆ ಅವನಿಗೆ ಹೀರೋ ಆಗುವ ಕನಸು ಏನಾಗುತ್ತದೆ ಎಂಬುದೇ ‘ಮಿಸ್ಟರ್ ರಾಣಿ’ ಚಿತ್ರದ ಕಥೆ.
