ಮೂಲ ಚಿತ್ರ ಜನಮನ್ನಣೆ ಪಡೆದಿದ್ದೇ ಈ ಕಾರಣಗಳಿಂದ ಎಂದರೆ ತಪ್ಪಿಲ್ಲ. ಆದರೆ, ಅದು ರಿಮೇಕ್ ಆಗಿ ಇಲ್ಲಿಗೆ ಬರುವಾಗ ಸಾಕಷ್ಟು ಬದಲಾವಣೆಗಳಾಗಿವೆ. ಹೊಸಬರ ಬದಲು ಹಳಬರು ಬಂದಿದ್ದಾರೆ. ಪ್ರತಿ ದೃಶ್ಯವನ್ನು ಸ್ಟೈಲಿಶ್ ಆಗಿ ಸೆರೆಹಿಡಿಯಲಾಗಿದೆ. ಎಲ್ಲಕ್ಕಿಂತ ಹೆಚ್ಚಾಗಿ ಚಿತ್ರ ಕ್ಲಾಸ್ ಆಗಿ ಮೂಡಿಬಂದಿದೆ. ಹೀಗೆ ಸಾಕಷ್ಟು ಬದಲಾವಣೆಗಳ ನಡುವೆಯೂ ಚಿತ್ರದ ಆತ್ಮ ಹಿಡಿದಿಡುವಲ್ಲಿ ಚಿತ್ರತಂಡ ತಕ್ಕಮಟ್ಟಿಗೆ ಯಶಸ್ವಿಯಾಗಿದೆ. ನಾಲ್ಕು ಕಥೆಗಳ ಮೂಲಕ ಪ್ರೀತಿಯ ವಿವಿಧ ಮಜಲುಗಳನ್ನು ಹೇಳುವ ಪ್ರಯತ್ನವನ್ನು ಇಲ್ಲಿ ಮಾಡಿರುವುದು ವಿಶೇಷ. ಇಲ್ಲಿ ಜಾತಿ-ಧರ್ಮದ ಸಮಸ್ಯೆ ಇದೆ. ಅಂತಸ್ತಿನ ಸವಾಲಿದೆ. ವಯಸ್ಸಿನ ಅಂತರವಿದೆ. ಇದೆಲ್ಲವನ್ನೂ ಮೀರುವ ಸಹೃದತೆಯೂ ಇದೆ. ಚಿತ್ರದ ಪೋಸ್ಟರ್ ನೋಡಿ, ಇಡೀ ಚಿತ್ರವನ್ನು ಧನಂಜಯ್ ಮತ್ತು ರಚಿತಾ ರಾಮ್ ಅವರಿಬ್ಬರೇ ಆವರಿಸಿಕೊಂಡಿರುತ್ತಾರೆ ಅಂದುಕೊಂಡರೆ ನಿರೀಕ್ಷೆ ಹುಸಿಯಾಗುತ್ತದೆ. ಈ ಚಿತ್ರದಲ್ಲಿ ಅವರಿಬ್ಬರೂ ಒಂದು ಭಾಗವಷ್ಟೇ ಹೊರತು, ಅವರ ಕಥೆಯೇ ಇಡೀ ಚಿತ್ರದ ಕಥೆಯಲ್ಲ. ಮೊದಲೇ ಹೇಳಿದಂತೆ, ಚಿತ್ರದಲ್ಲಿ ಬೇರೆಯ ಕಥೆಗಳೂ ಇವೆ ಮತ್ತು ಇನ್ನಷ್ಟು ಪಾತ್ರಗಳಿವೆ. ಅವರೆಲ್ಲರ ಸುತ್ತ ಕಥೆ ಸುತ್ತುತ್ತಲೇ ಇರುತ್ತದೆ. ಈ ಪೈಕಿ ಹೆಚ್ಚು ಇಷ್ಟವಾಗುವುದು ಅಚ್ಯುತ್ ಕುಮಾರ್ ಮತ್ತು ಸುಹಾಸಿನಿ ಅವರ ಕಥೆ. ಅವರಿಬ್ಬರ ಲವಲವಿಕೆ, ಅಭಿನಯವೇ ಚಿತ್ರದ ಹೈಲೈಟ್ ಎಂದರೆ ತಪ್ಪಿಲ್ಲ. ಅವರಿಬ್ಬರೂ ತೆರೆಯ ಮೇಲಿದ್ದಾಗ, ಚಿತ್ರಕ್ಕೆ ಇನ್ನಷ್ಟು ವೇಗ ಇರುತ್ತದೆ. ಚಿತ್ರ ಸಲೀಸಾಗಿ ನೋಡಿಸಿಕೊಂಡು ಹೋಗುತ್ತದೆ. ಅದೇ ವಿಷಯವನ್ನು ಬೇರೆ ಕಥೆಗಳ ಬಗ್ಗೆ ಹೇಳುವುದು ಕಷ್ಟ.
