ಮೈಯೆಲ್ಲ ಒದ್ದೆ, ನಾನು ಮುಟ್ಟಾಗಿದ್ದೆ... ಗಂಭೀರ ಆರೋಪ ಮಾಡಿದ ಮಲಯಾಳಂ ಬ್ಯೂಟಿ ಪಾರ್ವತಿ! Parvathy Thiruvottu

Parvathy Thiruvottu : ಮಲಯಾಳಂ ಬ್ಯೂಟಿ ಪಾರ್ವತಿ ಥಿರುವೊತ್ತು ಅವರನ್ನು ಕನ್ನಡಿಗರಿಗೆ ವಿಶೇಷವಾಗಿ ಪರಿಚಯಿಸಬೇಕಿಲ್ಲ. ದಿವಂಗತ ನಟ ಪವರ್​ಸ್ಟಾರ್​ ಪುನೀತ್​ ರಾಜ್​ಕುಮಾರ್​ ಅಭಿನಯದ ಮಿಲನ ಹಾಗೂ ಪೃಥ್ವಿ ಸಿನಿಮಾದಲ್ಲಿ ನಟಿಸುವ ಮೂಲಕ ಕನ್ನಡಿಗರ ಮನಗೆದ್ದಿದ್ದಾರೆ. ತಮಿಳು ಮತ್ತು ತೆಲುಗು ಸಿನಿಮಾಗಳಲ್ಲಿಯೂ ಪಾರ್ವತಿ ನಟಿಸಿದ್ದು, ತಮ್ಮ ನಟನೆಯಿಂದಲೇ ಒಳ್ಳೆಯ ಹೆಸರು ಮಾಡಿದ್ದಾರೆ. ಕೇವಲ ನಟನೆ ಮಾತ್ರವಲ್ಲದೆ, ಸಮಾಜದಲ್ಲಿ ನಡೆಯುವ ಅನ್ಯಾಯ ಹಾಗೂ ಮಹಿಳೆಯ ಮೇಲಿನ ದೌರ್ಜನ್ಯದ ವಿರುದ್ಧ ಪಾರ್ವತಿ ಅವರು ಸದಾ ಧ್ವನಿ ಎತ್ತುತ್ತಾರೆ. ಹೀಗಾಗಿ, ಪಾರ್ವತಿ ಅವರನ್ನು ಸಾಕಷ್ಟು ಮಂದಿ ಇಷ್ಟಪಡುತ್ತಾರೆ.

ತಾಜಾ ಸಂಗತಿ ಏನೆಂದರೆ, ಪಾರ್ವತಿ ಅವರು ಗ್ಲಾಮರ್ ಜಗತ್ತಿನ ಹಿಂದೆ ಅಡಗಿರುವ ಕಹಿ ಸತ್ಯ ಮತ್ತು ನಟಿಯರು ಎದುರಿಸುವ ತೊಂದರೆಗಳ ಬಗ್ಗೆ ಆಘಾತಕಾರಿ ಹೇಳಿಕೆಗಳನ್ನು ನೀಡಿದ್ದಾರೆ. ತಮ್ಮ ವೃತ್ತಿಜೀವನದ ಆರಂಭದಲ್ಲಿ ಸೂಪರ್​ ಸ್ಟಾರ್​ ಧನುಷ್ ಜತೆ ನಟಿಸಿದ ಮಾರ್ಯಾನ್​ ಸಿನಿಮಾದ ಶೂಟಿಂಗ್​ ವೇಳೆ ತನಗಾದ ಕಹಿ ಘಟನೆಯನ್ನು ಪಾರ್ವತಿ ಇತ್ತೀಚಿನ ಮಾಧ್ಯಮ ಸಂದರ್ಶನವೊಂದರಲ್ಲಿ ಮೆಲುಕು ಹಾಕಿದ್ದಾರೆ.

ಒಂದು ಸೀನ್​ನಲ್ಲಿ ಪಾರ್ವತಿ ಅವರು ನೀರಿನಲ್ಲಿ ನೆನದಂತೆ ಕಾಣಬೇಕಿತ್ತು. ಹೀಗಾಗಿ ಸಿನಿಮಾ ತಂಡವು ಅವರ ಮೇಲೆ ನೀರು ಸುರಿಯುತ್ತಲೇ ಇತ್ತು. ಅದೇ ಸಮಯದಲ್ಲಿ ಪಾರ್ವತಿ ಅವರು ಪೀರಿಯಡ್​ನಲ್ಲಿದ್ದರು. ಚಿತ್ರೀಕರಣದ ಉದ್ದಕ್ಕೂ ನೀರು ಸುರಿದಿದ್ದು ಮತ್ತು ಗಂಟೆಗಟ್ಟಲೆ ಒದ್ದೆಯಾದ ಬಟ್ಟೆಯಲ್ಲಿ ಇದ್ದಿದ್ದರಿಂದ ಋತುಚಕ್ರದ ಸಮಯದಲ್ಲಿ ದೈಹಿಕ ಅಸ್ವಸ್ಥತೆ ತುಂಬಾ ಕಾಡಿತು ಎಂದಿದ್ದಾರೆ. ಅಲ್ಲದೆ. ಬಟ್ಟೆ ಬದಲಾಯಿಸಲು ಹೆಚ್ಚುವರಿ ಬಟ್ಟೆಗಳು ಸಹ ಇರಲಿಲ್ಲ. ಆ ಸಮಯದಲ್ಲಿ ಶೂಟಿಂಗ್ ಸ್ಥಳದಲ್ಲಿ ಓರ್ವ ಮಹಿಳಾ ಸಿಬ್ಬಂದಿಯೂ ಇರಲಿಲ್ಲ ಎನ್ನುತ್ತಾ ಬೇಸರ ಹೊರಹಾಕಿದರು.

ಒಂದು ಹಂತದಲ್ಲಿ ಪಾರ್ವತಿಗೆ ಸಹಿಸಿಕೊಳ್ಳಲು ಸಾಧ್ಯವಾಗಲಿಲ್ಲ. ಹೀಗಾಗಿ ನಿರ್ದೇಶಕರ ಬಳಿ ತೆರಳಿ, ಹೋಟೆಲ್‌ಗೆ ಹೋಗಿ ಬಟ್ಟೆ ಬದಲಾಯಿಸಿ ಬರುತ್ತೇನೆ ಎಂದು ಕೇಳಿದರು. ಆದರೆ, ನಿರ್ದೇಶಕರು ಪಾರ್ವತಿ ಅವರ ಸಂಕಟವನ್ನು ಅರ್ಥಮಾಡಿಕೊಳ್ಳದೆ, ನಮಗೆ ಹೆಚ್ಚು ಸಮಯವಿಲ್ಲ, ಶೂಟಿಂಗ್ ತಕ್ಷಣ ಮುಗಿಸಬೇಕು ಎಂದು ಕೂಗಾಡಿದರು. ಆದರೆ, ನನ್ನಿಂದ ಇನ್ನಷ್ಟು ಸಹಿಸಲು ಆಗಲಿಲ್ಲ. ಕೊನೆಗೆ ನನ್ನ ಅಸ್ವಸ್ಥತೆ ಕೋಪವಾಗಿ ಬದಲಾಯಿತು, ಬಳಿಕ ಎಲ್ಲರ ಮುಂದೆಯೇ ಜೋರಾಗಿ ಕೂಗಿ, ನಾನು ಮುಟ್ಟಿನಲ್ಲಿದ್ದೇನೆಂದು ಹೇಳಿದೆ. ಆನಂತರ ಎಲ್ಲವು ಸರಿಯಾಯಿತು ಎಂದು ಪಾರ್ವತಿ ಹೇಳಿದರು.

ಅಂದಹಾಗೆ, ಭಯ ಅಥವಾ ಮುಜುಗರದಿಂದ ಸತ್ಯವನ್ನು ಮರೆಮಾಡಲು ಪ್ರಯತ್ನಿಸಿದ್ದೆ. ಆದರೆ, ನನ್ನಿಂದ ಸಾಧ್ಯವಾಗಲಿಲ್ಲ, ನಿರ್ದೇಶಕರ ವರ್ತನೆಯಿಂದ ಬೇಸತ್ತು ಆ ರೀತಿ ಸಾರ್ವಜನಿಕವಾಗಿ ಪ್ರತಿಕ್ರಿಯಿಸಬೇಕಾಯಿತು ಎಂದು ಪಾರ್ವತಿ ಹೇಳಿದರು. ಮುಟ್ಟು ಒಂದು ನೈಸರ್ಗಿಕ ಪ್ರಕ್ರಿಯೆ ಆದರೆ, ಸಮಾಜದಲ್ಲಿ, ಹುಡುಗಿಯರು ಅದನ್ನು ಪಾಪ ಮತ್ತು ಅವಮಾನವೆಂದು ಪರಿಗಣಿಸಿ ಮರೆಮಾಡಲು ಪ್ರಯತ್ನಿಸುತ್ತಾರೆ. ಹೀಗಾಗಿ, ಕೆಲಸದಲ್ಲಿ ಸ್ಥಳಗಳಲ್ಲಿ ಕನಿಷ್ಠ ಸೌಲಭ್ಯಗಳು ಮತ್ತು ಸಹ ಮಹಿಳೆಯರ ಬಗ್ಗೆ ಜಾಗೃತಿ ತುಂಬಾ ಅಗತ್ಯ ಎಂದು ಪಾರ್ವತಿ ತಿಳಿಸಿದರು, (ಏಜೆನ್ಸೀಸ್​).